សហរដ្ឋអាមេរិក-អុីរ៉ង់ ៖ សហរដ្ឋអាមេរិកកាលពីថ្ងៃទី៨ មេសា បានបញ្ចូលកងឆ្មាំបដិវត្តន៍អុីរ៉ង់ ក្នុងបញ្ជីខ្មៅនៃអង្គការភេរវកម្មបរទេស ដែលនោះជាកាយវិការមួយពុំធ្លាប់មានពីមុនមក ដើម្បីពង្រឹងការគាបសង្កត់ខាងសេដ្ឋកិច្ចរបស់ខ្លួន ដែលមកទល់ពេលនេះពុំទាន់អាចឲ្យអុីរ៉ង់ចុះញ៉ម។
អុីរ៉ង់បានថ្កោលទោសភ្លាមៗថា នោះបង្ហាញថា អាមេរិកជាគ្រោះថ្នាក់មួយក្នុងតំបន់។ អុីរ៉ង់បានតបតវិញដោយអះអាងថា ចាប់ពីពេលនេះតទៅយើងចាត់ទុករបបអាមេរិកជារដ្ឋដែលជួយទ្រទ្រង់ដល់ភេរវកម្ម ហើយកងទ័ពអាមេរិកនៅមជ្ឈឹមបូព៌ាក៏ជាក្រុមភេរវកម្មដែរ។
ក្នុងសេចក្ដីប្រកាសមួយពីការសម្រេចចិត្តនោះ ដែលចូលជាធរមានចាប់ពីថ្ងៃទី១៥មេសាទៅលោកត្រាំថ្លែងថា នេះជាលើកទី១ដែលអង្គការរបស់បរទេសមួយ ត្រូវបានវាយប្រហារដោយក្រុងវ៉ាស៊ិនតោន។
ចំណែកក្រុមប្រឹក្សាជាន់ខ្ពស់នៃសន្តិសុខអុីរ៉ង់ កាលពីថ្ងៃទី៨មេសា ចាត់ទុកកងទ័ពអាមេរិកថា ជាអង្គការភេរវកម្ម។
អុីរ៉ង់ចាប់តាំងពីឆ្នាំ១៩៨៤មក ស្ថិតរួចហើយ ក្នុងបញ្ជីបណ្ដារដ្ឋដែលជួយទ្រទ្រង់ដល់ភេរវកម្ម។ គំនិតនេះមានទិសដៅយ៉ាងច្បាស់ប្រឆាំងកងកម្លាំងឆ្មាំបដិវត្តន៍ ជាកងកម្លាំងពិសេសបង្កើតឡើងពីឆ្នាំ១៩៧៩មក ក្នុងគោលបំណងការពារបដិវត្តន៍អ៊ិស្លាមអុីរ៉ង់។
សម្រាប់រដ្ឋបាលអាមេរិកយល់ថា កងឆ្មាំបដិវត្តន៍ជាអ្នកទទួលខុសត្រូវមួយផ្នែកធំ ដល់ការបង្កអស្ថេរភាពនៅមជ្ឈឹមបូព៌ា។ កងកម្លាំងនេះក៏ត្រូវអាមេរិកចាត់ទុកជាក្រុមម៉ាហ្វីយ៉ាមួយ ដែលត្រួតត្រាយ៉ាងតិចពាក់កណ្ដាលនៃសេដ្ឋកិច្ចអុីរ៉ង់៕
ចែករំលែកព័តមាននេះ