រាជធានីភ្នំពេញ ៖ បុរសម្នាក់ដែលជាអ្នកបើកបររថយន្តដឹកសិស្សរបស់សាលារៀនសុវណ្ណភូមិម្នាក់ បានដើរចេញពីផ្ទះសំដៅទៅរថយន្ត លុះពេលកំពុងទាញទ្វាររថយន្តដើម្បីឡើងបើកបររថយន្តចេញដំណើរទៅដឹកសិស្ស ស្រាប់តែដួលសន្លប់ស្ដូកស្ដឹងនៅក្បែររថយន្តបង្កឱ្យមានការភ្ញាក់ផ្អើលដល់ប្រជាពលរដ្ឋ និងក្រុមគ្រួសារហៅក្រុមសង្គ្រោះអង្គភាព៧១១មកដឹកយកទៅសង្គ្រោះបន្ទាន់ ហើយជនរងគ្រោះបានរួចផុតពីគ្រោះថ្នាក់ដល់ជីវិត។
ហេតុការណ៍នោះបានកើតឡើង កាលពីវេលាម៉ោង៧និង១៥នាទីព្រឹកថ្ងៃទី៩ ខែមេសា ឆ្នាំ២០១៩ នៅក្នុងបុរីសុខសាន្ត ស្ថិតនៅក្នុងភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះខាងលើឈ្មោះ ម៉ម សំណាង អាយុ៣៣ឆ្នាំ មុខរបរបើកបររថយន្តដឹកសិស្សសាលារៀនសុវណ្ណភូមិ សព្វថ្ងៃគាត់ស្នាក់នៅកន្លែងកើតហេតុខាងលើ ។
តាមប្រភពពីអ្នកភូមិបាននិយាយថា នៅមុនកើតហេតុ ពួកគាត់ឃើញបុរសដែលជាជនរងគ្រោះខាងលើបានដើរចេញពីក្នុងផ្ទះរបស់គាត់សំដៅទៅកន្លែងចតរថយន្ត ក្នុងបំណងបើកទៅដឹកសិស្សតាមផ្ទះនានាយកទៅដាក់នៅសាលារៀនសុវណ្ណភូមិ ប៉ុន្តែពេលបុរសរងគ្រោះទៅដល់រថយន្ត គ្រាន់តែទាញទ្វាររថយន្ត រៀបនឹងឡើងបើករថយន្តចេញដំណើរទៅហើយ ស្រាប់តែមានអាការៈងងឹតមុខ ហើយជនរងគ្រោះបានស្រែកថា «ជួយផង» បានបន្តិចប៉ុណ្ណោះ ក៏បានដួលសន្លប់ស្តូកស្តឹងនៅក្បែររថយន្តតែម្ដង។
ប្រភពដដែលបានបន្តថា ខណៈនោះបង្កឲ្យមានការភ្ញាក់ផ្អើលយ៉ាងខ្លាំង ហើយអ្នកជិតខាងនិងក្រុមគ្រួសារបាននាំគ្នារត់ទៅជួយ និងធ្វើចលនាបេះដូងសង្គ្រោះបឋម ព្រមទាំងហៅរកក្រុមសង្គ្រោះអង្គភាព៧១១ឲ្យចុះមកជួយភ្លាមៗដែរ។ ក្រោយពីទទួលបានដំណឹងនេះភ្លាម ក្រុមសង្គ្រោះខាងលើបានចេញទៅជួយដល់ជនរងគ្រោះភ្លាមៗដោយមិនបង្អង់យូរឡើយ ដោយបានដឹកជនរងគ្រោះបញ្ជូនទៅកាន់មន្ទីរពេទ្យព្រះកុសុមៈទើបបុរសនេះបានរួចផុតពីគ្រោះថ្នាក់ដល់អាយុជីវិត។
ប្រភពខាងលើបានបន្តថា នេះក៏ចាត់ទុកថាជាសំណាងល្អផងដែរ ដែលបុរសខាងលើនេះមានអាការៈមិនស្រួលខ្លួនងងឹតមុខដួលសន្លប់ពេលមិនទាន់ឡើងបើករថយន្តនោះ តែប្រសិនបើកំពុងបើកបររថយន្តដឹកសិស្សសុខៗហើយបែរជាមានអាការៈបែបនេះវិញ ប្រាកដជារេចង្កូតបុកនេះបុកនោះ បណ្ដាលឲ្យសិស្សសាលាជាច្រើននាក់ដែលជិះក្នុងរថយន្តនោះរួមនឹងអ្នកដទៃផ្សេងទៀតមានគ្រោះថ្នាក់ជាក់ជាមិនខានឡើយ មិនតែប៉ុណ្ណោះខ្លួនគាត់ផ្ទាល់ក៏មិនអាចត្រូវជួយសង្គ្រោះបានដែរ៕
ចែករំលែកព័តមាននេះ