ទីក្រុងឡុងដ៍៖ យោងតាមសេចក្តីរាយការណ៍របស់ភ្នាក់ងារសារព័ត៌មាន Bangkok Post ដែលបានចេញផ្សាយកាលពីថ្ងៃសៅរ៍ កន្លងមកនេះបានឲ្យដឹងថា ប្រទេសអង់គ្លេសបានចាប់ផ្តើមចេញលិខិតឆ្លងដែនថ្មីដែលលុបឈ្មោះសហភាពអ៊ឺរ៉ុបចេញពីគម្របមុខបើទោះជាការចាកចេញពីក្រុមប្រទេសនេះត្រូវបានពន្យាពេលពិតមែនក្តី ។
ការិយាល័យកិច្ចការផ្ទៃក្នុងបានបញ្ជាក់ថា លិខិតឆ្លងដែនមួយចំនួនដែលត្រូវបានចេញចាប់ពីថ្ងៃទី៣០ មីនា ទៅនឹងមិនមានឈ្មោះ EU ទៀតឡើយ ។ ប៉ុន្តែពួកគេបានបន្ថែមថា ឯកសារធ្វើដំណើរដែលទើបតែចេញថ្មីៗអាចនឹងនៅមានឈ្មោះក្រុមប្រទេសនេះដើម្បីសន្សំថវិកាសាធារណៈ។
អ្នកនាំពាក្យម្នាក់បាននិយាយថា ដើម្បីប្រើឯកសារដែលមានស្រាប់ និងចៀសវាងការខ្ជះខ្ជាយថវិកាប្រជាជន លិខិតឆ្លងដែកដែលមានឈ្មោះសហភាពអ៊ឺរ៉ុបនឹងត្រូវបានបន្តចេញមួយរយៈសិន ។ អ្នកស្រីបានបន្ថែមថា លិខិតឆ្លងដែនទាំងពីរមិនមានភាពខុសគ្នាទេ ហើយប្រជាជនអាចប្រើលិខិតឆ្លងដែនទាំងពីរប្រភេទដើម្បីធ្វើដំណើរបាន។
អ្នកស្រីនាយករដ្ឋមន្ត្រី Theresa May ត្រូវបានបង្ខំឲ្យស្នើសុំការពន្យាពេលរហូតដល់ថ្ងៃទី៣០ មិថុនា ដើម្បីចៀសវាងបង្កការប៉ះពាល់ដល់សេដ្ឋកិច្ចប្រទេសពេលដែលចាកចេញដោយមិនមានកិច្ចព្រមព្រៀងច្បាស់លាស់ ។ ប៉ុន្តែវានៅមិនទាន់ច្បាស់នៅឡើយទេថា សមាជិក EU ទាំង ២៧ប្រទេសទៀតនឹងអនុញ្ញាតឲ្យមានការពន្យាពេលនេះ ឬទាមទារឲ្យមានការពន្យាពេលកាន់តែយូរទៀតឬទេ ។
គួរបញ្ជាក់ដែរថា ប្រទេសអង់គ្លេសត្រូវចាកចេញពី EU នៅថ្ងៃទី២៩ មីនា កន្លងមកនេះ ប៉ុន្តែពួកគេត្រូវបានបង្ខំឲ្យពន្យាពេលព្រោះតែមានការខ្វែងគំនិតគ្នាទាក់ទិននឹងកិច្ចព្រមព្រៀងសម្រាប់ការចាកចេញ ៕
ចែករំលែកព័តមាននេះ