រាជធានីភ្នំពេញ ៖ ផ្ទះមួយកន្លែងត្រូវបានជនសង្ស័យមួយក្រុមធ្វើសកម្មភាពគាស់ទម្លាយទ្វារនិងបង្អួចចូលលួចយកទ្រព្យសម្បត្តិ និងសម្ភារៈប្រើប្រាស់នៅក្នុងនោះអស់គ្មានសល់ដែលសរុបជាទឹកប្រាក់មានចំនួន១ម៉ឺនដុល្លារ ខណៈដែលម្ចាស់ផ្ទះបានបិទទ្វារចាក់សោចោល ហើយនាំគ្នាទៅនៅផ្ទះមួយកន្លែងផ្សេងទៀត ។លុះក្រោយពេល ដឹងថាមានក្រុមជនសង្ស័យធ្វើសកម្មភាពគាស់ផ្ទះលួចយកទ្រព្យសម្បត្តិអស់បែបនេះ ទើបស្ត្រីជាម្ចាស់ផ្ទះបានទៅដាក់ពាក្យប្ដឹងសុំការអន្តរាគមន៍ពីកម្លាំងនគរបាលប៉ុស្តិ៍ចោមចៅ២ ហើយនគរបាលបានធ្វើការស្រាវជ្រាវរហូតឈានដល់ការចាប់ខ្លួនជនសង្ស័យបានចំនួន៣នាក់ជាបន្តបន្ទាប់។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង១និង៣០នាទី ថ្ងៃទី៨ ខែមេសា ឆ្នាំ២០១៩ នៅក្នុងភូមិព្រៃសណ្ដែក សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ ។
ក្រុមជនសង្ស័យដែលធ្វើសកម្មភាពគាស់ផ្ទះខាងលើមានគ្នាចំនួន៦នាក់ ក្នុងនោះ៣នាក់ត្រូវបានសមត្ថកិច្ចចាប់ខ្លួនរួមមាន ១-ឈ្មោះ អឹម សុខអុី ភេទប្រុស អាយុ២៤ឆ្នាំ មុខរបរកម្មករសំណង់ ២-ឈ្មោះ ម៉ៅ ជីន ភេទប្រុស អាយុ២៨ឆ្នាំ មុខរបរមិនពិត និង៣-ឈ្មោះ ស៊ូ ព្រិច អាយុ២៧ឆ្នាំ មុខរបរមិនពិត ។ ជនសង្ស័យទាំ៣នេះស្នាក់នៅភូមិកើតហេតុខាងលើ ។ ក្រោយចាប់ខ្លួនក្រុមជនសង្ស័យទាំង៣នាក់នេះ នគរបាលបានដកហូតក្បាលគ្រែឈើចំនួន៣ និងម៉ូតូម៉ាកស៊ុយហ្ស៊ុយគីនិច១គ្រឿង ពណ៌ក្រហម ពាក់ស្លាកលេខ ភ្នំពេញ ១FF-៨២២៧។
រីឯបក្ខពួកជនសង្ស័យចំនួន៣នាក់ផ្សេងទៀតដែលរត់គេចខ្លួន រួមមាន ១-ឈ្មោះ ថេត ភេទប្រុស ២-ឈ្មោះ ចាន់ ភេទប្រុស និង៣-ឈ្មោះ ឆៃ ភេទប្រុស ។
ចំណែកស្ត្រីរងគ្រោះជាម្ចាស់ផ្ទះកើតហេតុខាងលើឈ្មោះ រ៉ា គន្ធា អាយុ៣៩ឆ្នាំ មុខរបរនៅផ្ទះ ស្នាក់នៅអចិន្ត្រៃយ៍នៅក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ។ រីឯទ្រព្យសម្បត្តិមួយចំនួនធំដែលបាត់បង់គិតជាទឹកប្រាក់សរុបមានចំនួន១ម៉ឺនដុល្លារ។
តាមប្រភពពីស្ត្រីម្ចាស់ផ្ទះរងគ្រោះខាងលើបានប្រាប់ឲ្យនគរបាលដឹងថា គាត់មិនបានដឹងថាក្រុមជនសង្ស័យខាងលើធ្វើសកម្មភាពគាស់ផ្ទះចូលលួចទ្រព្យសម្បត្តិរបស់គាត់តាំងពីពេលណាឡើយ ព្រោះគាត់បានចាក់សោទ្វារផ្ទះចោលមិននៅទីនោះទេ ដោយគាត់ទៅនៅផ្ទះមួយកន្លែងផ្សេងទៀតស្ថិតក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ។
ប្រភពដដែលបានបន្តថា លុះដល់ថ្ងៃទី៨ ខែមេសា ឆ្នាំ២០១៩ គាត់បានចាកចេញពីផ្ទះនៅក្នុងភូមិត្នោតជ្រុំទៅកាន់ផ្ទះកើតហេតុវិញ ស្រាប់តែឃើញមានស្នាមគាស់ទម្លាយទ្វារ និងបង្អួចខ្ទេចខ្ទី ហើយមើលទៅខាងក្នុងផ្ទះបាត់ទ្រព្យសម្បត្តិអស់គ្មានសល់ទើបមានការភ្ញាក់ផ្អើលនិងទៅដាក់ពាក្យបណ្ដឹងនៅប៉ុស្តិ៍នគរបាលចោមចៅ២ឱ្យជួយអន្តរាគមន៍តែម្ដង។
តាមប្រភពពីនគរបាលបាននិយថា ក្រោយពេលទទួលបានពាក្យបណ្ដឹងពីស្ត្រីរងគ្រោះភ្លាម កម្លាំងនគរបាលបានចុះធ្វើការស្រាវជ្រាវរហូតកំណត់បានមុខសញ្ញាក្រុមជនសង្ស័យខាងលើ ទើបចុះទៅចាប់ខ្លួនបាន៣នាក់ជាបន្តបន្ទាប់ ព្រមទាំងដកហូតបានវត្ថុតាងខាងលើ ប៉ុន្តែបក្សពួកក្រុមជនសង្ស័យចំនួន៣នាក់ផ្សេងទៀតកំពុងរត់គេចខ្លួននៅឡើយ ។
បច្ចុប្បន្ន ក្រុមជនសង្ស័យទាំង៣នាក់ខសាងលើ ត្រូវបានសមត្ថកិច្ចនាំទៅធ្វើការសាកសួរ និងកសាងសំណុំរឿងដើម្បីចាត់ការតាមច្បាប់៕
ចែករំលែកព័តមាននេះ