ប្រទេសអុីរ៉ង់-អុីរ៉ាក់ ៖ ក្នុងការសន្ទនាគ្នាមួយនាទីក្រុងតេហេរ៉ង់ ជាមួយនាយករដ្ឋមន្ត្រីអុីរ៉ាក់ លោកADEL ABDEL MAHDI មេដឹកនាំកំពូលអុីរ៉ង់លោកអាយ៉ាតុលាអាលីខាមេនី បានអំពាវនាវដល់ក្រុងបាដាដឲ្យទាមទារការដកកងទាហានអាមេរិកចេញពីអុីរ៉ាក់ ដោយឆាប់រហ័សតាមដែលអាចធ្វើទៅបាន។…
ប្រទេសអុីរ៉ង់-អុីរ៉ាក់ ៖ ក្នុងការសន្ទនាគ្នាមួយនាទីក្រុងតេហេរ៉ង់ ជាមួយនាយករដ្ឋមន្ត្រីអុីរ៉ាក់ លោកADEL ABDEL MAHDI មេដឹកនាំកំពូលអុីរ៉ង់លោកអាយ៉ាតុលាអាលីខាមេនី បានអំពាវនាវដល់ក្រុងបាដាដឲ្យទាមទារការដកកងទាហានអាមេរិកចេញពីអុីរ៉ាក់ ដោយឆាប់រហ័សតាមដែលអាចធ្វើទៅបាន។
ម្យ៉ាងវិញទៀតបណ្ដាមេដឹកនាំអុីរ៉ង់ បានសន្យាកាលពីថ្ងៃទី៧ មេសាថា នឹងតបតវិញចំពោះការសម្រេចរបស់សហរដ្ឋអាមេរិក បញ្ចូលកងឆ្មាំបដិវត្តន៍អុីរ៉ង់ ទៅក្នុងបញ្ជីនៃអង្គការភេរវកម្ម។
ក្នុងការជួបពិភាក្សាគ្នាកាលពីថ្ងៃទី៦មេសា ជនលេខមួយអុីរ៉ង់លើកឡើងថា អុីរ៉ាក់ត្រូវធ្វើសកម្មភាពនានា ដើម្បីធានាថា អាមេរិកដកកងទ័ពរបស់ខ្លួនចេញពីអុីរ៉ាក់ដោយឆាប់រហ័ស ព្រោះគ្រប់ទីកន្លែង ដែលមានវត្តមានយូររបស់កងទាហានអាមេរិក តែងតែកើតមានបញ្ហា។ អាមេរិកដែលពុំចង់បានរដ្ឋាភិបាលនិងសភាបច្ចុប្បន្ននៅអុីរ៉ាក់ នឹងរួមគំនិតដើម្បីកម្ចាត់រដ្ឋាភិបាលនិងសភានោះចេញពីឆាកនយោបាយ។
អុីរ៉ង់ជាអ្នកផ្គត់ផ្គង់ធំទី២ដល់អុីរ៉ាក់ បណ្ដាផលិតផលនិងជាអ្នកផ្គត់ផ្គង់ធនធានថាមពល ក្នុងប្រទេសអុីរ៉ាក់ដែលខ្វះខាតភ្លើង។ អុីរ៉ង់និងអុីរ៉ាក់ជាប្រទេសមានពួកស៊ីអុីតភាគច្រើន ធ្លាប់ច្បាំងគ្នា ក្នុងសង្គ្រាមយ៉ាងបង្ហូរឈាមមួយពីឆ្នាំ១៩៨០ដល់១៩៨៨ ប៉ុន្តែទំនាក់ទំនងរវាងប្រទេសទាំង២ បានផ្លាស់ប្ដូរជាមួយការដួលរលំនៃរបបលោកសាដាមហ៊ូសេន កាលពីឆ្នាំ២០០៣ ក្រោយការលុកលុយរបស់អាមេរិក។ ពេលនេះអុីរ៉ង់ជាអ្នកគាំទ្រដល់គណបក្សនិងក្រុមប្រដាប់អាវុធជាច្រើននៅអុីរ៉ាក់។
បំណងប្រកាសកាលពីខែកុម្ភៈពីសំណាក់ប្រធានាធិបតីអាមេរិកលោកដូណាល់ត្រាំ រក្សាទុកកងទ័ពអាមេរិកនៅអុីរ៉ាក់ ដើម្បីតាមឃ្លាំមើលអុីរ៉ង់ ក្រោយការចាកចេញនៃកងទាហានអាមេរិកពីស៊ីរី នាំឲ្យមានការក្ដៅក្រហាយរបស់ក្រុងបាដាដ ហើយនាំឲ្យមានការអំពាវនាវដកកងទ័ពអាមេរិកចេញពីអុីរ៉ាក់៕
ចែករំលែកព័តមាននេះ