ខេត្តបន្ទាយមានជ័យ ៖ ក្មេងប្រុសស្រីចំនួន៣នាក់ត្រូវជាបងប្អូនបង្កើតនឹងគ្នាបានដើររើសខ្យងតាមស្រែដែលភ្ជួររួចនៅពេលមេឃកំពុងធ្លាក់ភ្លៀង និងខ្យល់ត្រូវរន្ទះបាញ់ បណ្តាលស្លាប់ម្នាក់ ចំណែក២នាក់ទៀតដួលសន្លប់ បង្កឱ្យមានការភ្ញាក់ផ្អើលកាលពីរសៀលថ្ងៃទី៥ ខែមេសា ឆ្នាំ២០១៩ នៅចំណុចបឹងអាគោ ភូមិសាយសាម៉ន ឃុំចំណោម ស្រុកមង្គលបូរី។
លោក រ័ត្ន ដាស៊ីណង់ អភិបាលស្រុកមង្គលបូរីបានប្រាប់ឱ្យដឹងថា ក្មេងប្រុសស្រីទាំង៣នាក់ខាងលើដែលរងគ្រោះដោយសាររន្ទះបាញ់ រួមមាន១-ឈ្មោះ ភៀន សូរិយា ភេទស្រី អាយុ១០ឆ្នាំ បានស្លាប់ ២-ឈ្មោះ ម៉ៅ សុឃីម ភេទប្រុស អាយុ១៦ឆ្នាំ បានរងរបួសសន្លប់ និង៣-ឈ្មោះ ម៉ៅ វិចិត្រ ភេទប្រុសអាយុ១៩ឆ្នាំ បានរងរបួសសន្លប់ ។ ជនរងគ្រោះទាំង៣នាក់ជាបងប្អូនបង្កើតនឹងគ្នា រស់នៅភូមិឃុំកើតហេតុខាងលើ។
បើតាមសំដីសាច់ញាតិជនរងគ្រោះបានបញ្ជាក់ប្រាប់ថា ជនរងគ្រោះទាំង៣នាក់ត្រូវជាបងប្អូនបង្កើតនឹងគ្នា ពេលទំនេរពីការសិក្សាពួកគេនាំគ្នាដើររើសខ្យងលក់ជារៀងរាល់ថ្ងៃ ជាក់ស្តែងនៅថ្ងៃកើតហេតុ បន្ទាប់ពីហូបបាយព្រឹករួចហើយ ជនរងគ្រោះទាំង៣នាក់បងប្អូនបានដើររើសខ្យងតាមវាលស្រែកន្លែងដែលភ្ជួរដោយត្រាក់ទ័រ ឬគោយន្តរួចហើយ។
នៅពេលដែលកំពុងដើររើសខ្យងនារសៀលថ្ងៃកើតហេតុ ស្រាប់តែមានខ្យល់ខ្លាំង និងភ្លៀងកំពុងធ្លាក់តែជនរងគ្រោះទាំង៣នាក់បងប្អូនបានដើររើសខ្យងបណ្តើរ ក្នុងគោលបំណងដើរសំដៅទៅផ្ទះ ស្រាប់តែមានរន្ទះបានបាញ់ បណ្តាលឱ្យជនរងគ្រោះទាំង៣នាក់បងប្អូនដួលទៅដីកណ្តាលវាលស្រែ ហើយអ្នកភូមិដែលភ្ជួរស្រែនៅក្បែរនោះរត់មកជួយឃើញក្មេងប្រុសស្រីទាំងបីនាក់ដួលសន្លប់ ហើយពួកគាត់រត់ទៅប្រាប់អ្នកជិតខាងឱ្យមកជួយទៀត ដោយដឹកជនរងគ្រោះទាំង៣នាក់តាមគោយន្តកន្ត្រៃយកទៅសង្គ្រោះបន្ទាន់នៅមន្ទីពេទ្យមិត្តភាពកម្ពុជា-ជប៉ុនមង្គលបូរី តែជាអកុសលក្នុងចំណោមជនរងគ្រោះទាំង៣នាក់បងប្អូនបង្កើត គឺបណ្តាលឱ្យក្មេងស្រីម្នាក់បានស្លាប់បាត់បង់ជីវិតទៅហើយ ចំណែកក្មេងប្រុសចំនួន២នាក់ទៀតសន្លប់រងរបួសធ្ងន់ត្រូវបានសង្គ្រោះបន្ទាន់។
លោក រ័ត្ន ដាស៊ីណង់ បានបញ្ជាក់ថា ក្រោយពេលដែលជនរងគ្រោះ៣នាក់បងប្អូនបង្កើតត្រូវរន្ទះបាញ់បណ្តាលឱ្យស្លាប់ក្មេងស្រីម្នាក់នៅពេលដែលកំពុងដើររើសខ្យងនៅកណ្តាលវាលស្រែ ហើយក្មេងប្រុស២នាក់ទៀតបានរងរបួសធ្ងន់នោះ អាជ្ញាធរបានរាយការណ៍ជូនសាខាកាកបាទក្រហមកម្ពុជាខេត្តបន្ទាយមានជ័យនាំយកអំណោយមកប្រគល់ជូនគ្រួសាររងគ្រោះ កាលពីថ្ងៃទី៦ ខែមេសា ឆ្នាំ២០១៩ដែលដឹកនាំដោយលោក លី សារី ប្រធានសាខាកាកបាទក្រហមខេត្តបន្ទាយមានជ័យរួមជាមួយអនុសាខាកាកបាទក្រហមស្រុកមង្គលបូរីផងដែរ៕
ចែករំលែកព័តមាននេះ