ខេត្តកណ្ដាល ៖ កម្លាំងនគរបាលព្រហ្មទណ្ឌនៃអធិការដ្ឋានស្រុកអង្គស្នួលបានធ្វើការឃាត់ខ្លួនអ្នកលេងល្បែងបៀរ និងអាប៉ោង មានប្រុសមានស្រីចំនួន៦នាក់ ក្នុងខណៈពេលដែលក្រុមអ្នកទាំងនោះកំពុងលេងជាក់ស្ដែង។
ចំណែកប្រជាពលដ្ឋដែលបានឃើញពីសកម្មភាពលេងល្បែងស៊ីសងនោះក៏លួចរាយការណ៍ជូននគរបាលឲ្យចុះទៅបង្ក្រាប និងចាប់ខ្លួនដោយស្ងាត់ៗ រួចនាំយកទៅកាន់អធិការដ្ឋានស្រុកដើម្បីសាកសួរ ប៉ុន្តែក្រោយ
មកនគរបាលមិនបានកសាងសំណុំរឿងបញ្ជូនទៅកាន់សាលាដំបូងខេត្តកណ្ដាលដើម្បីចាត់ការតាមច្បាប់នោះឡើយ គឺត្រឹមធ្វើការអប់រំរួចក៏បានដោះលែងឲ្យមានសេរីភាពវិញ។
ហេតុការណ៍ខាងលើនោះបានកើតឡើងកាលពីវេលាម៉ោង២និង៣០នាទីរសៀលថ្ងៃទី៥ ខែមេសា ឆ្នាំ២០១៩ ស្ថិតនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល ។
នគរបាលបានឲ្យដឹងថា អ្នកដែលត្រូវសមត្ថកិច្ចចាប់ឃាត់ខ្លួនខាងលើរួមមាន១-ឈ្មោះឆេង ស្រេង ភេទប្រុស អាយុ៥៦ឆ្នាំ មុខរបរកសិករ មានទីលំនៅក្នុងភូមិព្រៃមានឃុំព្រៃពួច ស្រុកអង្គស្នួល ខេត្តកណ្តាលជាអ្នកបាញ់មេអាប៉ោង ២-ឈ្មោះ ឡេង ម៉េងសុង ភេទប្រុសអាយុ ៤៤ឆ្នាំ មានទីលំនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ជាម្ចាស់ផ្ទះផ្ដល់ទីតាំងសម្រាប់លេងល្បែង ហើយក៏ជាអ្នកចាក់អាប៉ោងផងដែរ ៣-ឈ្មោះសាត ធានាត ភេទស្រី អាយុ២០ឆ្នាំ មានទីលំនៅក្នុងភូមិកណ្តាល ឃុំលំហាច ស្រុក អង្គស្នួល ខេត្តកណ្តាលជាអ្នកចាក់អាប៉ោង ។
៤-ឈ្មោះផន សៀន ភេទស្រី អាយុ៦១ឆ្នាំ មុខរបរលក់ដូរ មានទីលំនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ជាអ្នកចាក់អាប៉ោង ៥-ឈ្មោះរិន ចាន់ណា ភេទស្រី អាយុ២៧ឆ្នាំ មានទីលំនៅក្នុងភូមិថ្នល់ទទឹង ជាអ្នកលេងបៀរ និង៦-ឈ្មោះហេង សុខងីម ភេទប្រុស អាយុ៦១ឆ្នាំ មានទីលំនៅក្នុងភូមិថ្នល់ទទឹង ជាអ្នកលេងបៀរ។
ប្រភពដដែលបានបន្តថា ពេលសមត្ថកិច្ចចុះបង្ក្រាប និងឃាត់ខ្លួនក្រុមអ្នកលេងល្បែងស៊ីសងខាងលើ កម្លាំងសមត្ចកិច្ចដកហូតបានវត្ថុតាងមួយចំនួនមានដូចជា ចានបាញ់អាប៉ោង១, គម្របចានអាប៉ោង១,កម្រាលរុន្ធអាប៉ោង១, មេអាប៉ោង១, បៀរចំនួន៥២សន្លឹក, សារុងក្រាលលេងបៀរ១, ទូរស័ព្ទម៉ាកណូកគាចុចអិនចុចពិល១គ្រឿង, ប្រាក់ចំនួន៦,១៥០០រៀល។
ប្រភពដដែលបានបន្តទៀតថា មុនពេលចុះទៅបង្ក្រាបប្រុសស្រីមួយក្រុមមានគ្នា៦នាក់ខាងលើបានជុំគ្នាលេងល្បែងអាប៉ោងនិងបៀរ ខណៈនោះមានអ្នកភូមិបានលួចរាយការណ៍ជាសម្ងាត់ឲ្យកម្លាំងនគរបាលព្រហ្មទណ្ឌស្រុកអង្គស្នួលចុះទៅបង្ក្រាប និងចាប់ឃាត់ខ្លួនតែម្ដង។ បន្ទាប់មកបាននាំក្រុមអ្នកលេងល្បែងស៊ីសងទាំង៦នាក់នោះទៅសាកសួរនៅអធិការដ្ឋានស្រុក ប៉ុន្តែមិនបានកសាងសំណុំរឿងបញ្ជូនទៅកាន់សាលាដំបូងខេត្តឡើយ គឺត្រឹមឃុំខ្លួន២៤ម៉ោងនៅផ្នែកព្រហ្មទណ្ឌស្រុក និងធ្វើការអប់រំព្រមទាំងឱ្យធ្វើកិច្ចសន្យាបញ្ឈប់ការលែងល្បែងតទៅទៀត រួចក៏ដោះលែងទៅវិញ៕
ចែករំលែកព័តមាននេះ