លោក លឺ ឡាយស្រេង ត្រឡប់មកកម្ពុជាវិញ ក្រោយបើកភ្លើងខៀវពីសម្តេចតេជោ
- ភ្នំពេញ
រាជធានីភ្នំពេញ ៖ លោក លឺ ឡាយស្រេង អតីតឧបនាយករដ្ឋមន្ត្រីបានវិលត្រឡប់មកដល់ស្រុកខ្មែរវិញហើយ នៅព្រឹកថ្ងៃទី៧ ខែមេសា ឆ្នាំ២០១៩នេះ ។…
រាជធានីភ្នំពេញ ៖ លោក លឺ ឡាយស្រេង អតីតឧបនាយករដ្ឋមន្ត្រីបានវិលត្រឡប់មកដល់ស្រុកខ្មែរវិញហើយ នៅព្រឹកថ្ងៃទី៧ ខែមេសា ឆ្នាំ២០១៩នេះ ។ ការវិលចូលប្រទេសកំណើតវិញរបស់លោកលឺ ឡាយស្រេង បន្ទាប់ពីសម្តេចតេជោ ហ៊ុន សែន អនុញ្ញាតហៅឲ្យលោកចូលប្រទេសវិញគ្មានការចាប់ខ្លួន។
នៅពេលមកដល់ទឹកដីកំណើតវិញលោក លឺ ឡាយស្រេង បានមកដល់ទឹកដីកំណើតជាលើកដំបូង បន្ទាប់ពីនិរទ្ទេសខ្លួនទៅនៅប្រទេសថៃ ក្រោយមានបណ្តឹងពីមេធាវីសម្តេចតេជោ និងមេធាវីតំណាងគណបក្សហ្វ៊ុនស៊ិនប៉ិច ក្នុងករណីប្រមាថព្រះមហាក្សត្រ និងមាក់ងាយគណបក្សហ្វ៊ុនស៊ិនប៉ិចបានបង្ហាញភាពសប្បាយរីករាយ។
ក្រោយពេលមកដល់នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី៧ មេសានេះ លោកលឺ ឡាយស្រេងបានថ្លែងប្រាប់ដោយការត្រេកអរថា មិននឹកស្មានថាបានវិលត្រឡប់មកស្រុកកំណើតវិញទេ គឺពិតជាសប្បាយជាខ្លាំង ដោយបានមកចូលរួមបុណ្យចូលឆ្នាំខ្មែរជាមួយជនរួមជាតិនៅទូទាំងប្រទេស។
លោកបញ្ជាក់ថា «ខ្ញុំសប្បាយចិត្តដែលបានចូលមកស្រុកខ្មែរវិញ ដោយបានមកទាន់ចូលឆ្នាំ ។ ចូលឆ្នាំថ្មីនេះ ជូនព្រះពរដល់ហ្លូងម៉ែ ព្រះករុណា ព្រមទាំងសាច់សាលោហិតញាតិវង្សទាំងអស់ឲ្យជួបតែសេចក្តីសុខ សេចក្តីចម្រើន ។ សូមជូនពរសម្តេចដែលបានឲ្យចូលមកវិញ។ ជូនពរសម្តេច និងក្រុមគ្រួសារឲ្យបានជួបសេចក្តីសុខ និងសេចក្តីសប្បាយ»។
សូមបញ្ជាក់ថា លោក លឺ ឡាយស្រេង បានទៅរស់នៅបរទេសក្រោយពីជាប់ពាក់ព័ន្ធប្រមាថព្រះមហាក្សត្រកម្ពុជា ។ ហើយកាលពីខែតុលា ឆ្នាំ២០១៧ លោក លឺ ឡាយស្រេង និងលោកស្រី គី លំអង អតីតមន្ត្រីហ្វ៊ុនស៊ិនប៉ិចបានបើកសន្ទនាគ្នាតាមទូរស័ព្ទដោយលើកឡើងថា ប្រសិនបើព្រះមហាក្សត្រទ្រង់មិនអាចអន្តរាគមន៍ដោះស្រាយវិបត្តិនយោបាយនេះបានទេ ទ្រង់គួរដាក់រាជ្យវិញទៅ ។ ក្នុងនោះលោក លឺ ឡាយស្រេង ថ្លែងថា «អត់ទេ បើមិនហ៊ានទេឲ្យដាក់រាជ្យ ទៅឲ្យយកគេទៅធ្វើម្តងវិញ មាន់គ្រាវអុីចឹងនោះ» ។
ការសន្ទនាជាង៤នាទីនោះ លោក លឺ ឡាយស្រេង ក៏បានរិះគន់សម្ដេចក្រុមព្រះ ព្រះប្រធានគណបក្សហ្វ៊ុនស៊ិនប៉ិចថា ជាអ្នកនយោបាយដែលអង្គុយចាំទទួលយកតែផល ដោយមិនចេះអៀនខ្មាស់ និងធ្វើឲ្យបាត់ព្រះកិត្តិនាម ព្រះរាជវង្សានុវង្ស ។
ប៉ុន្តែក្រោយពីបែកធ្លាយសារសន្ទនានេះក៏មានការដាក់ពាក្យបណ្តឹងពីខាងក្រុមមេធាវីសម្តេចតេជោ និងគណបក្សហ្វ៊ុនស៊ិនប៉ិច ។ ក្រោយមកទាំងលោកព្រឹទ្ធាចារ្យ និងលោកស្រី គី លំអង ក៏បានសុំទោសជាសាធារណៈ បើទោះជាមានការសុំទោសបែបនេះក្តី ម្ចាស់បណ្ដឹង គឺគណបក្សហ្វ៊ុនស៊ិនប៉ិចក៏នៅតែមិនអើពើ ។
ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដានាព្រឹកថ្ងៃទី១ ខែមេសា ឆ្នាំ២០១៩ សម្តេចតេជោ ហ៊ុនសែនបានថ្លែងថា លោក លឺ ឡាយស្រេង ចូលស្រុកវិញបាន ដោយមិនចាំចាប់ធ្វើជាលិខិតស្នើសុំអ្វីនោះទេ ។ សម្តេចក៏បានបក់ដៃឲ្យលោកចូលស្រុកឆាប់ផងដែរ។ កាលពីថ្ងៃទី២៩ ខែមីនា ឆ្នាំ២០១៩ តាមរយៈការឡាយវីដេអូប្រហែលជា៦នាទី លោក លឺ ឡាយស្រេង បានស្នើសុំសម្តេចតេជោត្រឡប់មកស្រុកកំណើតវិញ ។
តាមរយៈវីដេអូដដែលនោះ លោកបានរៀបរាប់ពីទុក្ខលំបាកនៅស្រុកគេដែលរស់នៅដោយគ្មានសាច់ញាតិ រស់នៅផ្ទះជួលក្នុង១ខែ២០០ដុល្លារ ។ ជាពិសេសលោកបាននិយាយថា ចុងបញ្ចប់នៃជីវិតរបស់លោក គឺចង់ស្លាប់នៅលើទឹកដីកំណើតខ្លួនឯង៕
ចែករំលែកព័តមាននេះ