រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអំពាវនាវដល់ប្រជាពលរដ្ឋមានការប្រុងប្រយ័ត្នក្នុងការបើកបរនៅចូលឆ្នាំប្រពៃណីជាតិខ្មែរ ។ សម្តេចតេជោ ហ៊ុន សែនបានសរសេរលើបណ្តាញសង្គមយ៉ាងដូច្នេះសុខសប្បាយជាទេបងប្អូនជនរួមជាតិ និងកូនក្មួយជាទីស្រឡាញ់ ។
សម្តេចបានបញ្ជាក់ថា« នៅ៨ថ្ងៃទៀត ថ្ងៃចូលឆ្នាំថ្មីប្រពៃណីជាតិយើងនឹងមកដល់ ។ ស្រុកទេសមានសុខសន្តិភាព បងប្អូនជនរួមជាតិក៏មានឱកាសបានសប្បាយរីករាយក្នុងការធ្វើដំណើរទៅកម្សាន្តទីជិតឆ្ងាយទាំងក្នុង និងក្រៅប្រទេសដោយសេរី» ។ ជាមួយសម្តេចតេជោបានសរសេរឆ្នាំនេះនៅតាមបណ្តាខេត្តនានាក៏មានរៀបចំកម្មវិធីសង្ក្រាន្តអបអរសាទរឆ្នាំថ្មី ដើម្បីផ្តល់នូវការកម្សាន្តរីករាយជូនដល់បងប្អូនប្រជាពលរដ្ឋក៏ដូចជា ទេសចរណ៍ជាតិ និងអន្តរជាតិផងដែរ ។ ហើយជាពិសេសទៀតនោះ គឺបងប្អូនប្រជាពលរដ្ឋ និងកូនក្មួយកម្មករកម្មការនីអាចជិះឡានក្រុងពីភ្នំពេញទៅកាន់ខេត្ត ឬពីខេត្តមកភ្នំពេញវិញចាប់ពីថ្ងៃទី១២ ដល់ថ្ងៃទី១៨ ដោយមិនបង់ប្រាក់ទៀតផង ។
សាលាក្រុងរាជធានីបានត្រៀមឡាន១២០គ្រឿងរួចស្រេចហើយ ។ ដើម្បីសុវត្ថិក្នុងការធ្វើដំណើរសម្តេចអំពាវនាវយ៉ាងដូច្នេះថា«សូមបងប្អូនប្រជាពលរដ្ឋ ជាពិសេសកូនក្មួយយុវជន បើកបរគោរពច្បាប់ចរាចរណ៍ កុំបើកវ៉ាប្រជែងយកលឿនតែម្នាក់ឯង ដែលអាចបង្កគ្រោះថ្នាក់ដល់ខ្លួនឯងផង និងអ្នកដទៃផងដែលធ្វើអោយយើងសោកស្តាយអស់មួយជីវិត ជាពិសេសនៅក្នុងរដូវបុណ្យចូលឆ្នាំថ្មី» ។ សម្តេចបន្ថែមថា សុំជូនពរបងប្អូន និងកូនក្មួយធ្វើដំណើរមានសុខសុវត្ថិភាពគ្រប់ទីកន្លែង និងបានសប្បាយរីករាយក្នុងថ្ងៃសម្រាកចុងសប្តាហ៍ ៕
ចែករំលែកព័តមាននេះ