ខេត្តព្រះសីហនុ ៖ ប្រទេសជប៉ុនតាមរយៈអង្គការJICA ក្នុងគម្រោងODAលើគម្រោងកែលម្អបច្ចេកទេសផលិតកូនត្រីពូជ និងក្តាមសមុទ្រ បានបង្កើតមជ្ឈមណ្ឌលអភិវឌ្ឍន៍និងស្រាវជ្រាវមួយដែលមានទីតាំងក្នុងខេត្តព្រះសីហនុ ។ សមត្ថភាពរបស់មជ្ឈមណ្ឌលនេះ សម្រាប់អភិវឌ្ឍនិងស្រាវជ្រាវវារីវប្បកម្មសមុទ្រ ក្នុងការអភិវឌ្ឍបច្ចេកទេសផលិតកម្មកូនពូជត្រីសមុទ្រកម្ពុជា ។
កាលពីសប្តាហ៍មុននេះ យោងតាមអង្គការJICAបានអះអាងថា គោលដៅទូទៅរបស់មជ្ឈ មណ្ឌលនេះ ផលិតកម្មក្នុងស្រុកនិងការផ្គត់ផ្គង់កូនត្រីដែលមានគុណភាពនៃប្រភេទកូនពូជគោលដៅត្រូវបានបង្កើន និងសកម្មភាពវារីវប្បកម្មសមុទ្រត្រូវបានផ្សព្វផ្សាយ និងលើកទឹកចិត្តដល់ប្រជាពលរដ្ឋនៅតាមបណ្តាខេត្តឆ្នេរសមុទ្រ ។
អង្គការJICA បានបង្ហាញពីលទ្ធផលរំពឹងទុកថា ប្រត្តិបត្តិការនិងសមត្ថភាពគ្រប់គ្រងសម្រាប់ផលិតកម្មកូនពូជត្រីសមុទ្រ ត្រូវបានពង្រឹង ។ បច្ចេកទេសផលិតកូនពូជ ដូចជាការគ្រប់គ្រងមេពូជ ផលិតកម្មចំណីរស់ ការថែបំប៉នកូនត្រីម្សៅ និងផ្សាំកូនត្រីនៃប្រភេទដែលជាគោលដៅត្រូវបានអភិវឌ្ឍ និងធ្វើឲ្យប្រសើរឡើងតាមរយៈការពិសោធន៍ក្នុងកំឡុងពេលផលិតកម្ម ។ ក្នុងនោះប្រព័ន្ធធ្វើរោគវិនិច្ឆ័យ និងប្រព័ន្ធទប់ស្កាត់ជំងឺត្រី សម្រាប់ប្រភេទត្រីគោលដៅត្រូវបានបង្កើត ។
លោក ម៉ម សុខដារ៉ា អ្នកគ្រប់គ្រងមជ្ឈមណ្ឌលស្រាវជ្រាវវារីវប្បកម្មផលិតកូនពូជត្រីថ្លែងថា ដោយសារតម្រូវការទីផ្សារនៃប្រភេទត្រីសមុទ្រសម្រាប់ធ្វើវារីវប្បកម្មដូចជាប្រភេទត្រីឆ្ពង់ ត្រីតុកកែ និងប្រភេទត្រីផ្សេងៗទៀត កំពុងមានការកើនឡើងជាលំដាប់ ។ ដោយសារការអភិវឌ្ឍបច្ចេកទេសវារីវប្បកម្មមិនគ្រប់គ្រាន់ ទើបកសិករចិញ្ចឹមត្រីសមុទ្រ បានប្រើប្រាស់កូនពូជត្រីដែលចាប់ពីធម្មជាតិ និងនាំចូលពីប្រទេសជិតខាងសម្រាប់ការធ្វើវារីវប្បកម្ម ។
លោកបន្តថា ស្ថិតនៅក្រោមស្ថានភាពបែបនេះ មជ្ឈមណ្ឌលអភិវឌ្ឍន៍និងស្រាវជ្រាវវារីវប្បកម្មសមុទ្រ ត្រូវបានសាងសង់ក្រោមគម្រោងជំនួយឥតសំណងរបស់ប្រទេសជប៉ុននៅក្នុងខែមីនា ឆ្នាំ២០១១ ។ បន្ទាប់ពីបញ្ចប់គម្រោងកិច្ចសហប្រតិបត្តិការបច្ចេសរយៈពេល២ឆ្នាំ(២០១២-២០១៤) រាជរដ្ឋាភិបាលកម្ពុជាបានដាក់សំណើសម្រាប់គម្រោងកិច្ចសហប្រតិបត្តិការ៣ឆ្នាំ ចាប់ពីឆ្នាំ២០១៦ដល់JICA សម្រាប់ស្ថិរភាពក្នុងការផលិតកូនពូជត្រីសមុទ្រ ដោយសុខុមាលភាព និងការធ្វើពិពិធកម្មប្រភេទកូនពូជត្រីសមុទ្រផ្សេងៗទៀត សម្រាប់ធ្វើវារីវប្បកម្ម ៕
ចែករំលែកព័តមាននេះ