សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ ទីបំផុតកាលពីថ្ងៃទី៤មេសាបានបោះបង់ចោលវិញ ការគំរាមរបស់លោកបិទព្រំដែនជាមួយម៉ិកស៊ិក ដោយយល់ថាប្រទេសជាប់ជិតខាងគ្នានោះ បានធ្វើការខិតខំប្រឹងប្រែងនានាប៉ុន្មានថ្ងៃចុងក្រោយនេះ ប្រឆាំងពួកអន្តោប្រវេសន៍លួចលាក់។
មុនពេលធ្វើដំណើរទៅកាន់ក្រុងCALEXICO ជាទីក្រុងតូចមួយជាប់ព្រំដែនជាមួយម៉ិកស៊ិក ស្ថិតនៅចម្ងាយប្រមាណជា៣០០គីឡូម៉ែត្រភាគអាគ្នេយ៍ទីក្រុងឡូសអេនចឺឡេស លោកត្រាំបានព្រមានថា យើងត្រូវការជញ្ជាំងព្រំដែនមួយ តែយើងត្រូវការរឿងច្រើនជាងនេះទៀត។ លោកបន្តថាប្រសិនបើម៉ិកស៊ិកពុំចង់ជួយយើងនោះពុំអីទេ យើងនឹងដាក់ពន្ធគយលើរថយន្តដែលនាំចូលសហរដ្ឋអាមេរិក។ ខ្ញុំនឹងធ្វើហើយពុំមែនជាល្បែងមួយនោះទេ។ លោកគំរាមថា ខ្ញុំយល់ថាថ្ងៃណាមួយយើងនឹងបិទព្រំដែន ហើយអាវុធពន្ធគយនឹងប្រើ។
ការអះអាងបែបនេះរបស់លោកត្រាំធ្វើឲ្យម៉ិកស៊ិក ផ្ទុះប្រតិកម្មយ៉ាងខ្លាំងដោយបរិហារថា ក្រុងវ៉ាស៊ិនតោនយករឿងទាំង២នោះ មកលាយឡំបញ្ចូលគ្នា។ ក្នុងសន្និសីទសារព័ត៌មានមួយ រដ្ឋមន្ត្រីសេដ្ឋកិច្ចម៉ិកស៊ិក លោកស្រីGRACIELA MARQUEZ COLINថ្លែងថា សម្រាប់រដ្ឋាភិបាលម៉ិកស៊ិក វាសំខាន់ណាស់ដែលត្រូវរក្សាការបំបែករឿងទាំង២នោះ គឺរឿងអន្តោប្រវេសន៍និងរឿងពាណិជ្ជកម្មឲ្យដាច់ពីគ្នា។
លោកត្រាំបានប្រកាន់យកការតស៊ូប្រឆាំងអន្តោប្រវេសន៍លួចលាក់ថា ជារឿងសំខាន់មួយ ក្នុងចំណោមរឿងសំខាន់ នៃអាណត្តិរបស់លោក។ លោកតែងអំពាវនាវដល់ម៉ិកស៊ិក ឲ្យឃាត់ខ្លួនពួកអន្តោប្រវេសន៍ មកពីអាមេរិកកណ្ដាលពិសេសមកពីហុងឌូរ៉ាស់ ហ្គាតេម៉ាឡានិងសាល់វ៉ាឌ័រ ដែលធ្វើដំណើរឆ្លងកាត់ដែនដីខ្លួន៕
ចែករំលែកព័តមាននេះ