រាជធានីភ្នំពេញ ៖ រដ្ឋមន្ត្រីក្រសួង ទេសចរណ៍លោក ថោង ខុន ថ្មីៗនេះបានធ្វើការព្រមានចាត់ការតាមច្បាប់ ចំពោះអាជីវកម្មណាលក់វត្ថុអនុស្សាវរីយ៍ក្លែងក្លាយ ជូនភ្ញៀវទេសចរ ព្រមជាមួយគ្នានោះក៏បានបញ្ជា…
រាជធានីភ្នំពេញ ៖ រដ្ឋមន្ត្រីក្រសួង ទេសចរណ៍លោក ថោង ខុន ថ្មីៗនេះបានធ្វើការព្រមានចាត់ការតាមច្បាប់ ចំពោះអាជីវកម្មណាលក់វត្ថុអនុស្សាវរីយ៍ក្លែងក្លាយ ជូនភ្ញៀវទេសចរ ព្រមជាមួយគ្នានោះក៏បានបញ្ជា និងជំរុញណែនាំ ដល់មន្ទីរទេសចរណ៍គ្រប់រាជធានី-ខេត្ត អគ្គាធិការដ្ឋាននៃក្រសួងទេសចរណ៍ (ផ្នែកអធិការកិច្ច) សហការជាមួយក្រសួង-ស្ថាប័ន វិស័យឯកជន និងផ្នែកពាក់ព័ន្ធទាំងអស់ ត្រូវចូលរួមទប់ស្កាត់ ការលក់វត្ថុអនុស្សាវរីយ៍ ឬផលិតផលក្លែងក្លាយ ពីព្រោះបញ្ហានេះ ធ្វើឱ្យខូចនូវភាពជឿជាក់ពីសំណាក់ភ្ញៀវទេសចរ ប៉ះពាល់ធ្ងន់ធ្ងរដល់កិត្តិយស និងកិត្យានុភាពរបស់ជាតិ។
ការប្រមាននិងការណែនាំយ៉ាងម៉ឺងម៉ាត់នេះ ត្រូវបានធ្វើឡើងក្នុងពិធីបើកសន្និបាតផ្ទៃក្នុងក្រសួង ដើម្បីបូកសរុបការងារប្រចាំឆ្នាំ២០១៨ ត្រីមាសទី១ ឆ្នាំ២០១៩ និងលើកទិសដៅបន្តនៅត្រីមាសទី២ និងទី៣ ឆ្នាំ២០១៩ ដែលពិធីនេះ ធ្វើឡើងនៅទីស្ដីការក្រសួងទេសចរណ៍ រយៈពេល២ថ្ងៃ ចាប់ពីថ្ងៃទី០២-០៣ ខែមេសា ឆ្នាំ២០១៩។
លោករដ្ឋមន្ត្រីបានលើកឡើងថា «ធ្លាប់មានករណីភ្ញៀវទេសចរបានទិញទំនិញពីកម្ពុជា ក្រោយមកក៏ដឹងថា ជាគ្រឿងអលង្ការក្លែងក្លាយ ហើយពួកគេក៏បានប្ដឹងមកក្រសួងការបរទេសយើង តាមរយៈស្ថានទូតគេនៅកម្ពុជា ហើយករណីថ្មីៗនេះ មានការប្តឹងផ្ទាល់ មកអង្គភាពប្រឆាំងអំពើពុករលួយ (ACU) ហើយ ACU បានដាក់លិខិតមកក្រសួងទេសចរណ៍»។ លោកថោង ខុន ចាត់ទុកបញ្ហានេះជារឿងសំខាន់មួយ ដែលរូបលោកផ្តាល់តែងតែដាស់តឿនជំរុញជារឿយៗ ដល់គ្រប់ភាគីពាក់ព័ន្ធ ហើយលោកបានដាក់បញ្ជាយ៉ាងម៉ឺងម៉ាត់សារជាថ្មីឡើងវិញ ដល់អគ្គាធិការដ្ឋាននៃក្រសួងទេសចរណ៍ ត្រូវរួមគ្នាជាមួយមន្ទីរទេសចរណ៍គ្រប់រាជធានី-ខេត្ត ស្ថាប័ន និងសមត្ថកិច្ចពាក់ព័ន្ធ ចុះធ្វើអធិការកិច្ចលើមូលដ្ឋានអាជីវកម្មលក់ដូរវត្ថុអនុស្សាវរីយ៍ ពិសេសសហការជាមួយក្រសួងពាណិជ្ជកម្ម ក្នុងការត្រួតពិនិត្យមូលដ្ថានអាជីកម្មលក់គ្រឿង អលង្កា ដើម្បីទប់ស្កាត់ និងលុបបំបាត់បញ្ហាដ៏អាក្រក់នេះ។
បន្ថែមពីលើនេះរដ្ឋមន្ត្រីក្រសួងទេសចរណ៍ក៏បានទទូចដល់ភាគីពាក់ព័ន្ធផងដែរ សូមចូលរួមយកចិត្តទុកដាក់ចំពោះបញ្ហានេះ ពិសេសឯក ឧត្តមបានស្នើថា បើរកឃើញមូលដ្ឋានអាជីវកម្មណាលក់របស់របរក្លែងក្លាយជូនភ្ញៀវទេសចរ សូមមេត្តាចាត់ការតាមនីតិវិធីច្បាប់ភ្លាមៗ។ គ្រប់ភាគីពាក់ព័ន្ធទាំងអស់ត្រូវចូលរួមធ្វើយ៉ាងណាធានាថា គ្រប់គោលដៅទេសចរណ៍របស់កម្ពុជា មានការទទួលបដិសណ្ឋារកិច្ចល្អប្រសើរជូនភ្ញៀវទេសចរ គ្មានការលក់ទំនិញក្លែងក្លាយដូចករណីខ្លះៗដែលបានកើតឡើងមកនេះ ដើម្បីស្របតាមការប្រសិទ្ធនាមរបស់រាជរដ្ឋាភិបាលថា «កម្ពុជា៖ ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ» ។
ក្នុងនោះផងដែរ ក្រសួងទេសចរណ៍ បានសម្រេចកំណត់គោលដៅជាយុទ្ធសាស្ត្រជាក់ លាក់ក្នុងអាណត្តិទី៦នេះ គឺជាអាណត្តិនៃការពង្រឹងគុណភាពទេសចរណ៍ និងបង្កើនប្រសិទ្ធភាពការងារ សំដៅធ្វើយ៉ាងណាឲ្យគ្រប់ផលិតផល និងសេវាកម្មទេសចរណ៍មានគុណភាព ធ្វើឲ្យគ្រប់រមណីយដ្ឋានទេសចរណ៍ សហគមន៍ទេសចរណ៍មានការប្រែប្រួល អភិវឌ្ឍន៍កាន់តែល្អ លុបបំបាត់ការលក់វត្ថុអនុស្សាវរីយ៍ក្លែងក្លាយជូនទេសចរ កាត់បន្ថយការធ្លុះធ្លាយ (ដោយខិតខំជំរុញការប្រើប្រាស់ផលិតផលក្នុងស្រុក ប្រកបដោយគុណភាព ជំនួសឲ្យការនាំចូល) ធ្វើឲ្យវិស័យទេសចរណ៍ក្លាយជាការនាំចេញនៅនឹងកន្លែងដ៏មានប្រសិទ្ធភាព និងធ្វើឲ្យវិស័យទេសចរណ៍ផ្តល់ផលប្រយោជន៍ជាអតិបរមាដល់ប្រជាពលរដ្ន និងសហគមន៍មូលដ្ឋាន។
ដើម្បីសម្រេចគោលដៅនេះ អង្គប្រជុំបានដាក់ចេញនូវផែនការយុទ្ធសាស្ត្រ និងទិសដៅអនុវត្តការងារសំខាន់ៗសម្រាប់ត្រីមាសទី២ និងឆមាសទី២ ឆ្នាំ២០១៩ ដូចជា ៖ ១) – បង្កើតផលិតផលទេសចរណ៍ថ្មីប្រកបដោយការច្នៃប្រឌិត និងនវានុវត្តន៍ (Creative & Innovative) នៅតាមតំបន់គោលដៅទេសចរណ៍អាទិភាពទាំងបួន តាមរយៈការទាក់ទាញការវិនិយោគលើវិស័យទេសចរណ៍ និងការអនុវត្តយន្តការ 4Ps។ ២) – ពង្រឹងគុណភាពផលិតផល និងសេវាកម្មទេសចរណ៍តាមទស្សនទាន «សេវាមួយ ស្តង់ដាមួយ» និងអភិវឌ្ឍធនធានមនុស្សតាមទស្សនទាន «បុគ្គលិកម្នាក់ ជំនាញមួយ»។ ៣) – ពង្រឹងការឃោសនាផ្សព្វផ្សាយទេសចរណ៍ កម្ពុជាទាំងក្នុង និងក្រៅប្រទេស។ ៤) – ពង្រឹងការគ្រប់គ្រងទេសចរណ៍តាមប្រព័ន្ធ Online (Smart Tourism)៕
ចែករំលែកព័តមាននេះ