រាជធានីភ្នំពេញ ៖ ប្រៃសណីយ៍កម្ពុជា ថ្មីៗនេះបានបញ្ចេញរបាយការណ៍មួយបង្ហាញឲ្យឃើញថាក្នងឆ្នាំ ២០១៨ កន្លងមកស្ថាប័នមួយនេះ គឺរកចំណូលសរុបប្រមាណជាង ១៣លានដុល្លារអាមេរិក ប្រៀបធៀបនឹងឆ្នាំ២០១៧ ដែលមានប្រមាណតែជាង ៨លានដុល្លារ ពោលគឺមានការកើនឡើងជាង ៥៦ ភាគរយ ។
របាយការណ៍ដដែលបានបញ្ជាក់ថា ឆ្នាំ២០១៨ ប្រៃសណីយ៍កំណត់ផែនការរកចំណូលពីទីស្នាក់ការកណ្តាលតែ ជាង៥,១លានដុល្លារ, ចំណូលតាមបណ្តាខេត្តមាន ២លានដុល្លារអាមេរិក ។ ក៏ប៉ុន្តែសម្រាប់ការអនុវត្តជាក់ស្តែង ទីស្នាក់ការកណ្តាលរកចំណូលបានរហូតដល់ជាង១០,៥លានដុល្លារអាមេរិក កើនឡើងប្រមាណ១០៦% រីឯនៅតាមបណ្តាខេត្តរកចំណូលបានដល់២,៧លានដុល្លារអាមេរិកកើនឡើង៣០% ធៀបនិងផែនការ។ ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅឆ្នាំ២០១៩ កាលពីថ្ងៃទី ៤មេសា ឆ្នាំ២០១៩ ម្សិលមិញ នៅទីស្តីការប្រៃសណីយ៍កម្ពុជា លោក អោក បូរ៉ា អគ្គនាយកប្រៃសណីយ៍កម្ពុជាមានប្រសាសន៍ថា ក្នុងរយៈពេល៨ឆ្នាំកន្លងទៅ ប្រៃសណីយ៍កម្ពុជាបានបង្កើននូវប្រាក់ចំណូលពីជាង២,១លានដុល្លារនៅឆ្នាំ២០១០ កើនឡើងដល់ជាង១៣លានដុល្លារនៅឆ្នាំ២០១៨ ទទួលបានប្រាក់ចំណេញរៀងរាល់ឆ្នាំ ។ ជាក់ស្តែងចំណូលឆ្នាំ២០១៨ សរុបមានចំនួនជាង១៣លានដុល្លារ មានប្រាក់ចំណេញមុនបង់ពន្ធជាង១,១ លានដុល្លារអាមេរិក។
លោក អោក បូរ៉ា មានប្រសាសន៍បញ្ជាក់ថា «ទន្ទឹមនិងលទ្ធផលសម្រេចបានខាងលើ ប្រៃសណីយ៍កម្ពុជា បានប្រែក្លាយការបម្រើសេវាប្រៃសណីយ៍ប្រពៃណីទៅជា 3D Postal service និងបង្កើតក្រុមហ៊ុនដឹកជញ្ជូនបញ្ញើផ្ទាល់ខ្លួនឱ្យមានប្រសិទ្ធិភាពនិងរហ័សទាន់ចិត្តនិងសិក្សាស្វែងរកសេវាថ្មីៗ ដោយបំពាក់បច្ចេកវិទ្យាព័ត៌មានវិទ្យាក្នុងការគ្រប់គ្រងអាជីវកម្ម ។ ពិសេសក្នុងពេលខាងមុខដ៏ខ្លីយើងនឹងដាក់ឱ្យដំណើរការនូវE-commerce សម្រាប់ផ្តល់សេវាដូចជា Online Shopping, Online Ticketing, E-Payment, E-Banking, Logistics and Courier ជាដើម »។
លោក កុយ ពុំ ប្រធានក្រុមប្រឹក្សាភិបាលប្រៃសណីយ៍កម្ពុជា មានប្រសាសន៍ថា គោល ដៅយុទ្ធសាស្ត្ររបស់ប្រៃសណីយ៍កម្ពុជា គឺបន្តអភិវឌ្ឍន៍ហេដ្ឋារចនាសម្ព័ន្ធបច្ចេកវិទ្យា ប្រសិទ្ធភាព និងគុណភាពសេវាខ្ពស់បានដល់គ្រប់គ្នា គ្រប់ទីកន្លែង។
ប្រធានក្រុមប្រឹក្សាភិបាលប្រៃសណីយ៍កម្ពុជា បន្តទៀតថា «ដើម្បីសម្រេចបាននូវគោលដៅនេះ យើងទាំងអស់ត្រូវបន្តខិតខំប្រឹងប្រែងពង្រឹងគុណភាពសេវាប្រៃសណីយ៍ ឱ្យកាន់តែមានគុណភាពលឿនជាងមុន មានទំនុកចិត្តពីអតិថិជនកាន់តែខ្លាំង ពង្រីកទីផ្សារឱ្យកាន់តែទូលំទូលាយបន្តបំពាក់ប្រព័ន្ធ IPS ឱ្យបានគ្រប់ខេត្ត បន្តការគ្រប់គ្រងប្រព័ន្ធសុវត្ថិភាពនិងមានជំនឿទុកចិត្ត បន្តពង្រីកគុណភាពសេវាហិរញ្ញវត្ថុប្រៃសណីយ៍ឱ្យបានរហ័សទាន់ចិត្ត បន្តសហការជាមួយបណ្តាប្រទេសជាដៃគូក្នុងការអនុវត្តគម្រោងរបស់UPUជាដើម» ។
លោក ត្រាំ អុីវតឹក រដ្ឋមន្ត្រីក្រសួងប្រៃស ណីយ៍ និងទូរគមនាគមន៍ មានប្រសាសន៍ឲ្យដឹងថា ជោគជ័យដែលទទួលបានរយៈពេល៨ឆ្នាំជាប់គ្នានេះ គឺភាគច្រើនបានមកពីការធ្វើអាជីវកម្ម សេវាកម្ម បែបប្រពៃណី ដូចជាជាការផ្ញើរសំបុត្រ។ ក្នុងបរិការនៃការប្រែប្រួលឆាប់រហ័សរបស់បច្ចេកវិទ្យា សេដ្ឋកិច្ច សង្គម និងការប្រែប្រួលថ្មី នៃតម្រូវការ ក៏ដូចជាការប្រែប្រួលឥរិយាបទ របស់មនុស្សពិសេសការប្រែប្រួលនៃឥរិយាបទរបស់អ្នកប្រើប្រាស់សេវាប្រៃសណីយ៍ ត្រូវការប្រើសេវាប្រៃសណីយ៍បែបទំនើប ទាមទារឱ្យប្រៃសណីយ៍កម្ពុជា ត្រូវមានការសម្រេចចិត្តឱ្យបានលឿន ឆាប់រហ័សចាប់ឱ្យបានទាន់ពេលវេលាវិនិយោគទាំងឡាយ និងត្រូវមានការប្រែប្រួលទាំងក្នុងការដឹកនាំ ការគ្រប់គ្រងធនធានមនុស្សក្នុងការគ្រប់គ្រងខ្សែសង្វាក់អាជីវកម្ម។
លោករដ្ឋមន្ត្រីបន្តថា ការគិតគូលើការបំពាក់បច្ចេកវិទ្យាថ្មីៗនិងសមស្របទៅនឹងសេចក្តីត្រូវការក្នុងអាជីវកម្ម ក៏ដូចជាធ្វើការពិចារណា ពោលគឺធ្វើការសិក្សាអំពីការដាក់ទុនវិនិយោគ ក្នុងការបំពាក់បច្ចេកវិទ្យាថ្មីៗ ជំរុញឱ្យដំណើការ E-commerce ដើម្បីបង្កើនចំណូលរបស់ខ្លួនស្របទៅតាមគោលនយោបាយសេដ្ឋកិច្ចឌីជីថលរបស់រាជរដ្ឋាភិបាលសម័យកាលបដិវត្តឧស្សាហកម្ម៤.០ ៕
ចែករំលែកព័តមាននេះ