រាជធានីភ្នំពេញ ៖ បើទោះបីជាមានការប្រឆាំងជាបន្តបន្ទាប់ពីសំណាក់ប្រទេសជាសមាជិកសហភាពអឺរ៉ុបក៏ដោយ ក៏ «ស្ករត្នោតកំពង់ស្ពឺ» ត្រូវបានសហភាពអឺរ៉ុបចុះបញ្ជីការពារនិងទទួលស្គាល់ជាផ្លូវការកាលពីថ្ងៃទី ២ ខែមេសា ឆ្នាំ ២០១៩…
រាជធានីភ្នំពេញ ៖ បើទោះបីជាមានការប្រឆាំងជាបន្តបន្ទាប់ពីសំណាក់ប្រទេសជាសមាជិកសហភាពអឺរ៉ុបក៏ដោយ ក៏ «ស្ករត្នោតកំពង់ស្ពឺ» ត្រូវបានសហភាពអឺរ៉ុបចុះបញ្ជីការពារនិងទទួលស្គាល់ជាផ្លូវការកាលពីថ្ងៃទី ២ ខែមេសា ឆ្នាំ ២០១៩ នេះដែលធ្វើឲ្យស្ករត្នោតកំពង់ស្ពឺ នៃប្រទេសកម្ពុជា ក្លាយជាផលិតផលសម្គាល់ភូមិសាស្ត្ររបស់ខ្មែរទីពីរហើយ បន្ទាប់ពីម្រេចកំពតរបស់កម្ពុជាត្រូវបានចុះបញ្ជីការពារដោយសហភាពអឺរ៉ុបកាលពីខែកុម្ភៈ ឆ្នាំ ២០១៦។
ជាមួយនឹងដំណឹងដ៏ល្អមួយនេះ ផលិតករស្ករត្នោតកំពង់ស្ពឺ បានបង្ហាញនូវសុទិដ្ឋិនិយមថា ស្ករត្នោតកំពង់ស្ពឺ នឹងទទួលបានតម្លៃខ្ពស់មុន នឹងមានទីផ្សារកាន់តែទូលំទូលាយថែមទៀត ស្របពេលផលិតផលនេះ ទទួលស្គាល់ពីសហគមន៍អឺរ៉ុបនោះ ព្រោះតម្លៃស្ករត្នោតបច្ចុប្បន្នដែលត្រូវលក់ចេញ គឺមានកម្រិតក្នុងតម្លៃប្រមាណតែ ៥,៣ លានរៀល ក្នុងមួយតោន ដូច្នេះសមាគមផលិតស្ករត្នោត រំពឹងថានឹងលក់បានប្រមាណ៦លានរៀលក្នុងមួយតោន ក្រោយពីត្រូវបានសហភាពអឺរ៉ុបចុះបញ្ជីការពារនិងទទួលស្គាល់ជាផ្លូវការ ។
បើតាម លោក សំ សារឿន ប្រធានសមាគមស្ករត្នោតកំពង់ស្ពឺបានមានប្រសាសន៍តាមទូរស័ព្ទ កាលពីថ្ងៃទី ០៤ មេសា ២០១៩នេះថា សហគមន៍អឺរ៉ុបបានទទួលស្គាល់ និងចុះបញ្ជីការពារម៉ាកនៅសហគមន៍អឺរ៉ុបជាផ្លូវការហើយ ថាជាផលិតផលសម្គាល់ភូមិសាស្ត្រ ដែលដំណឹងល្អនេះពិតជាធ្វើឲ្យកសិករផលិតស្ករត្នោត មានកម្លាំងចិត្តឥតឧបមា ។
លោក សំ សារឿន មានប្រសាសន៍បញ្ជាក់ថា «ដំណឹងនេះ ជាដំណឹងមួយដ៏ល្អសម្រាប់អាជីវកម្មផលិតស្ករត្នោតនៅក្នុងខេត្តកំពង់ស្ពឺរបស់កសិករ ក្នុងមូលដ្ឋាន ហើយវានឹងផ្ដល់អត្ថប្រយោជន៍កាន់តែច្រើន ដល់កសិករដែលផលិតស្ករត្នោត » ។ លោកបន្តថា ក្រោយពេលទទួលបានការការពារ និងទទួលស្គាល់ពីសហគមន៍ នូវផលិតផលនេះកសិករ ដែលជាអ្នកផលិតស្ករត្នោត នឹងជំរុញការផលិតអោយបានកាន់តែច្រើន ដោយរំពឹងថានឹងទទួលបានតម្លៃថ្មីមួយខ្ពស់ជាងមុន ដើម្បីលើកកម្ពស់ជីវភាពគ្រួសារកសិករ និងជាពិសេសលើកកម្ពស់ផលិតផលខ្មែរនៅលើទីផ្សារអន្តរជាតិ ជាពិសេសទីផ្សារសហគមន៍អឺរ៉ុប ដែលជាទីផ្សារសំខាន់សម្រាប់ការនាំចេញរបស់ផលិតផលខ្មែរ ។ប្រធានសមាគមស្ករត្នោតកំពង់ស្ពឺ បន្ថែមទៀតថា « បច្ចុប្បន្ននេះតម្លៃស្ករត្នោតដែលកសិករផលិតបាន ត្រូវលក់ចេញក្នុងតម្លៃប្រមាណ៥,៣ លានរៀល ក្នុងមួយតោន ហើយយើងរំពឹងថានឹងលក់បានប្រមាណ៦លានរៀលក្នុងមួយតោន ក្រោយពេលផលិតផលនេះត្រូវបានចុះបញ្ជីម៉ាកនៅសហគមន៍អឺរ៉ុប »។
លោក សំ សារឿន បន្ថែមថា ពីពេលនេះ កសិករ នឹងលែងបារម្ភពីទីផ្សារលក់ស្ករត្នោតទៀតហើយ ពីព្រោះមានទីផ្សារដ៏សំខាន់មួយព្រមបើកផ្លូវអោយនាំចូលទៅកាន់ទីនោះ ដូច្នេះ នៅជំហានបន្ទាប់គឺការជំរុញការផលិតអោយកាន់តែច្រើនតាមតែអាចធ្វើបាន ។ សម្រាប់ឆ្នាំនេះ បើតាមការព្យាករណ៍របស់រាជរដ្ឋាភិបាល ដែលនិយាយថា រដូវប្រាំងអូសបន្លាយយូរ និងក្ដៅជាឆ្នាំមុនៗនេះ វាជាបញ្ហាមួយរបស់អាជីវកម្មស្ករត្នោត។ នៅពេលក្ដៅខ្លាំង ទឹកត្នោតដែលនឹងយកទៅរំងាស់ស្ករនោះ ឆាប់ឡើងមេហើយមានរសជាតិជូរ ដូច្នេះយកទៅ រំងាស់ជាស្ករប្រាកដជាមានរសជាតិមិនល្អដូចទឹកត្នោតដែលផ្អែមនោះទេ ពេលខ្លះក៏មិនអាចយកទឹកត្នោតជូរនោះ មករំងាស់ជាស្ករបានដែរម៉េ្លោះហើយការផលិតឆ្នាំនេះ អាចនឹងទាបជាងឆ្នាំមុន ។
លោកបញ្ជាក់ថា ក្នុងពេលទទួលបានការចុះបញ្ជីម៉ាកពីសហគមន៍អឺរ៉ុបហើយនោះ ពួកយើងក៏ត្រូវតែពង្រឹងពីគុណភាពផលិតផលអោយកាន់តែខ្លាំងដែរ ក្នុងនោះក្រុមបច្ចេកទេសនឹងចុះពិនិត្យការផលិតរៀងរាល់សប្ដាហ៍ ដើម្បីអោយប្រាកដថាស្ករត្នោតដែលទទួលបាននោះ គឺជាស្ករត្នោតកំពង់ស្ពឺ១០០ភាគរយ ។ លោក ហ៊ឹម ពិសិដ្ឋ អគ្គនាយករងនៃក្រុមហ៊ុន Confirel ដែលជាក្រុមហ៊ុនមួយទទួលទិញផលិតផលកសិកម្មជាច្រើនទៅកាន់ទីផ្សារអន្តរជាតិនោះ បានអោយដឹងផងដែរថា ការចុះបញ្ជីម៉ាករបស់ផលិតផលស្ករត្នោតកំពង់ស្ពឺនៅទីផ្សារសហគមន៍អឺរ៉ុប គឺការជួយផ្សព្វផ្សាយផលិតផលមួយនេះ នៅទីផ្សារដ៏ធំនៅអឺរ៉ុបដូច្នេះ ផលិតផលស្ករត្នោតនឹងកាន់តែល្បី និងមានការទទួលស្គាល់ពីអ្នកប្រើប្រាស់កាន់តែច្រើន ។
លោកបន្តថា ឆ្នាំនេះ លោកបានចុះកិច្ចសន្យាទិញស្ករត្នោតដើម្បីនាំចេញប្រមាណជាង១០០តោនរួចហើយ ហើយនៅឆ្នាំក្រោយៗក្រុមហ៊ុននឹងប្រមូលទិញស្ករត្នោតពីកសិករកាន់តែច្រើនជាងនេះទៀត ពីព្រោះស្ករត្នោតកាន់តែមានទីផ្សារកាន់តែមានតម្រូវការខ្ពស់ ។ លោកនិយាយថា៖« ពីមួយឆ្នាំទៅមួយឆ្នាំផលិតផលស្ករត្នោតដែលក្រុមហ៊ុនបានទិញនិងនាំចេញ មានកំណើនជាប្រចាំ ជាពិសេសនៅសហគមន៍អឺរ៉ុប ហើយនៅពេលដែលផលិតផលនេះ បានចុះបញ្ជីម៉ាកថែមទៀតនោះ យើងជឿជាក់ថាកំណើននឹងកាន់តែខ្ពស់ថែមទៀតនៅឆ្នាំក្រោយៗ » ។ លោកបន្ថែមថា សម្រាប់តម្លៃវិញក៏នឹងត្រូវកើនឡើងជាបន្តបន្ទាប់ដែរ បន្ទាប់ពីស្ករត្នោតត្រូវបានចុះបញ្ជីនៅអឺរ៉ុប ដូច្នេះកសិករនឹងទទួលអត្ថប្រយោជន៍កាន់តែច្រើនពីរបរផលិតស្ករត្នោតនៅក្នុងខេត្តកំពង់ស្ពឺ ។
សូមបញ្ជាក់ថាក្រោយការតស៊ូយ៉ាងស្វិតស្វាញ បើទោះបីជាមានការជំទាស់ជាច្រើនពីក្រុមហ៊ុនមួយនៅប្រទេស ស្វីស ក៏ដូចជាប្រទេសប៊ែលហ្សិក តែចុងក្រោយ «ស្ករត្នោតកំពង់ស្ពឺ» ត្រូវបានសហភាពអឺរ៉ុបចុះបញ្ជីការពារនិងទទួលស្គាល់ជាផ្លូវការ ៕
ចែករំលែកព័តមាននេះ