បើជំងឺប៉េស្តជ្រូកអាហ្វ្រិចកើតនៅតំបន់ណាហើយ មេរោគនោះនឹងសំងំយ៉ាងតិច៥០ឆ្នាំ បច្ចុប្បន្នគ្មានថ្នាំព្យាបាលឡើយ (មានវីដេអូ)
- ព្រៃវែង
ខេត្តព្រៃវែង ៖ ថ្លែងនៅក្នុងពិធីជួបសំណេះសំណាលជាមួយអតីតមន្ត្រីពេទ្យសត្វដែលចូលនិវត្តន៍ដែលធ្វើឡើងកាលពីព្រឹកថ្ងៃទី៥មេសា នៅក្នុងមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង លោក ចិន វិសាល ប្រធានការិយាល័យផលិតកម្ម និងបសុព្យាបាលខេត្ត បានអះអាងថារហូតមកដល់ពេលនេះ នៅទូទាំងខេត្តព្រៃវែង នៅមិនទាន់មានវត្តមានជំងឺប៉េស្តជ្រូកអាហ្វ្រិចកើតឡើងនៅលើសត្វជ្រូករបស់បងប្អូនប្រជាកសិករនៅឡើយទេ។
លោក ចិន វិសាល បានអោយដឹងទៀតថា បច្ចុប្បន្ននេះនៅខេត្តរតនគីរីរកឃើញជំងឺប៉េស្តជ្រូកអាហ្វ្រិច បានកើតមាននៅក្នុងភូមិចំនួន៣ និងបានបណ្តាលអោយជ្រូករបស់បងប្អូនប្រជាកសិករងាប់អស់ជាង៤០០ក្បាល។ ដោយឡែកខេត្តព្រៃវែង ដោយរូបលោកបានចាត់វិធានការយ៉ាងម៉ត់ចត់ និងមានការទប់ស្កាត់យ៉ាងតឹងរឹងនៅតាមបន្ទាត់ព្រំដែន ដោយមិនអនុញ្ញាតឲ្យមានការនាំចូលសត្វជ្រូកពីវៀតណាម ព្រមទាំងធ្វើការត្រួតពិនិត្យយ៉ាងម៉ត់ចត់ ចំពោះការធ្វើចរាចរណ៍សត្វជ្រូកនៅក្នុងស្រុក ក៏ដូចជាសាច់ជ្រូកដែលដាក់លក់នៅលើទីផ្សារផងនោះ ទើបធ្វើអោយជំងឺនេះមិនអាចផ្ទុះកើតនៅក្នុងទឹកដីនៃខេត្តព្រៃវែងបាន។
លោក ចិន វិសាល បានបញ្ជាក់ថា បច្ចុប្បន្ននេះឈ្មួញបានប្តូររូបភាព ពីការដឹកសត្វជ្រូករស់ មកជាការដឹកសាច់ជ្រូកវិញ ប៉ុន្តែក៏នៅតែមិនអាចគេចផុតពីការត្រួតពិនិត្យរបស់មន្ត្រីជំនាញពេទ្យសត្វឡើយ ព្រោះបើសិនសត្វជ្រូក ឬសាច់ជ្រូកណាមួយមានកើតជំងឺប៉េស្តជ្រូកអាហ្វ្រិចនេះ វានឹងបង្ហាញអោយឃើញនូវរោគសញ្ញាយ៉ាងច្បាស់ដូចជា ចេញអុតៗពេញខ្លួនជ្រូក, ហូរសំបោរតាមច្រមុះ ឈាមតាមច្រមុះ ស្បែកក្តាំង គ្រឿងក្នុងលំពែងវាលូតហើម និងថ្លើមហើម។
មន្ត្រីជំនាញពេទ្យសត្វខេត្តព្រៃវែងបានអោយដឹងថា ជំងឺប៉េស្តជ្រូកអាហ្វ្រិចនេះ វាកើតតែលើសត្វជ្រូកប៉ុណ្ណោះ វាមិនរីករាលដាល ឬឆ្លងពីសត្វទៅសត្វ ឬពីសត្វមកមនុស្សនោះទេ ក៍ប៉ុន្តែបើសត្វជ្រូកកើតជំងឺនេះហើយ គឺ៩៩%សត្វជ្រូកនោះនឹងងាប់តែម្តង។ បើជំងឺប៉េស្តជ្រូកនេះកើតក្នុងតំបន់ណាហើយ គឺមេរោគជំងឺនេះ វានិងសំងំនៅក្នុងតំបន់នោះយ៉ាងតិច៥០ឆ្នាំ ហើយមកដល់ពេលនេះយើងមិនទាន់មានថ្នាំព្យាបាលនៅឡើយទេ។
ដូច្នេះ បើសិនបងប្អូនប្រជាពលរដ្ឋប្រទះឃើញសត្វជ្រូក ឬសាច់ជ្រូកដែលមានរោគសញ្ញាគួរអោយសង្ស័យ សូមរាយការណ៍ប្រាប់ទៅមន្ត្រីជំនាញពេទ្យសត្វភូមិអោយបានលឿន ដើម្បីអោយមន្ត្រីជំនាញចាត់វិធានការបានទាន់ពេលវេលា៕
ចែករំលែកព័តមាននេះ