ខេត្តសៀមរាប ៖ នាថ្ងៃទី០៤ ខែមេសា ឆ្នាំ២០១៩ នៅសាលាខេត្តសៀមរាបនេះមានធ្វើកិច្ចប្រជុំពិភាក្សាស្តីពីគម្រោងសាងសង់អាកាសយានដ្ឋានអន្តរជាតិសៀមរាបអង្គរដែលមានទីតាំងនៅជាប់ព្រំប្រទល់ស្រុកបី គឺស្រុកសូទ្រនិគម ស្រុកជីក្រែង និងស្រុកស្វាយលើ របស់ខេត្តសៀមរាបលើផ្ទៃដីទំហំ៧០០ហិកតា ក្នុងចំណោមផ្ទៃដីសរុប១៧០០ហិកតា និងដំណើរការដាក់ឱ្យប្រើប្រាស់ នៅដើមឆ្នាំ២០២៤នាពេលខាងមុខនេះ ។
ក្រោមកិច្ចដឹកនាំរបស់លោក ទៀ សីហា អភិបាលនៃគណៈអភិបាលខេត្តសៀមរាប និងវត្តមានចូលរួមរបស់លោកតឹករ៉េត សំរេច ប្រធានគណៈកម្មការតម្រង់ទិសការសាងសង់ និង ជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការទីស្តីការគណៈរដ្ឋមន្ត្រី និងភាគីក្រុម ហ៊ុនវិនិយោគគម្រោងសាងសង់ចិនដឹកនាំដោយលោក Lu Yanwen ប្រធានក្រុមហ៊ុនយូណាន គ្រុបខូអិលធីឌី និងលោក លោកជំទាវ អស់លោក លោកស្រីនៃបណ្តាក្រសួងមន្ទីរអង្គភាព ស្ថាប័នមានការពាក់ព័ន្ធចូលរួមផងដែរ ។
ក្នុងកិច្ចប្រជុំនោះដែរលោកទៀ សីហា ក្នុងនាមអាជ្ញាធរខេត្ត និងតំណាងប្រជាពលរដ្ឋខេត្តសៀមរាបក៏បានសម្តែងនូវសេចក្តីរំភើបចំពោះសមទ្ធិផលថ្មីដ៏ធំមួយដែលនឹងចាប់បដិសន្ធិកនៅលើទឹកដីប្រវត្តិសាស្ត្រខេត្តសៀមរាប គឺអាកាសយានដ្ឋានអន្តរជាតិសៀមរាបអង្គរដែលជាព្រលានយន្តហោះដ៏ធំមួយនៅក្នុងតំបន់អាស៊ីយើងនេះ ។ លោកបានបន្តទៀតថា នៅពេលដែលអាកាសយានដ្ឋានថ្មីបានសាងសង់រួចរាល់ និងបើកកិច្ចដំណើរការនោះ និងធ្វើឲ្យកំណើនភ្ញៀវទេសចរណ៍មានការកើនទើងទ្វេដង និងកាន់តែធ្វើឱ្យកំណើនសេដ្ឋកិច្ចរបស់បងប្អូនប្រជាពលរដ្ឋនៅខេត្តសៀមរាបសំខាន់នៅស្រុកទាំងបីដែលមានភូមិសាស្ត្រជាប់នឹងអាកាសយានដ្ឋាននេះផងដែរ គឺស្រុកស្វាយលើ ស្រុកសូទ្រនិគម និង ស្រុកជីក្រែង ។
ឆ្លងតាមការបង្ហាញនោះដែរលោក Lu Yanwen ប្រធានក្រុមហ៊ុនយូណាន គ្រុបខូអិលធីឌី បានគូសបញ្ជាក់ថា អាកាសយានដ្ឋានអន្តរជាតិសៀមរាបអង្គរថ្មីនេះ គឺជាគម្រោងដ៏សំខាន់ដែលបានគាំទ្រដោយរដ្ឋាភិបាលទាំងពីរកម្ពុជា ចិន ក្នុងគោលនយោបាយ (ខ្សែក្រវ៉ាត់មួយ និងផ្លូវមួយ) ហើយនៅថ្ងៃទី១៣ តុលា ឆ្នាំ២០១៦ Yuntou គ្រុប និងទីស្តីការគណៈរដ្ឋមន្ត្រីនៃព្រះរាជាណាចក្រកម្ពុជាបានធ្វើការចុះហត្ថលេខាព្រមព្រៀង BOT ស្តីពីគម្រោងអាកាសយានដ្ឋានអន្តរជាតិសៀមរាបអង្គរ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកប្រធានាធិបតី ស៊ីជីង ពីង នៃសាធារណរដ្ឋប្រជាមានិតចិន ។
លោកបានបញ្ជាក់ថា គម្រោងសាងសង់ព្រលានយន្តហោះនេះមានចម្ងាយពីក្រុងសៀមរាប ៥១គីឡូម៉ែត្រ នៅលើផ្ទៃដីសរុប៧០០ហិកតា ហើយសាងសង់តាមស្តង់ដាររចនាបថអាកាសយានដ្ឋានលំដាប់ថ្នាក់ទី 4E ដែលអាចប្រតិបត្តិការយន្តហោះខ្នាតធំមានលេខកូដ E ។ ម្យ៉ាងទៀតតាមកំណើននៃចរាចរណ៍ផ្លូវអាកាសនាពេលអនាគត និងត្រូវធ្វើការពង្រីកទៅជា អាកាសយានដ្ឋានប្រភេទ 4F ហើយគម្រោងនេះប្រតិបត្តិការតាមកម្មវិធី BOT ដែលមានការវិនិយោគដោយ Yuntouគ្រុប យូណាន វិនិយោគបរទេស និងយូណានព្រលានយន្តហោះគ្រុប ដែលបានបណ្តាក់ទុនវិនិយោគ២២០លានដុល្លា ។
លោក Lu Yanwen បានបញ្ជាក់ទៀតថា រយៈពេលនៃការសាងសង់ និងប្រតិបត្តិការគម្រោង សរុប៥៥ឆ្នាំ ហើយរយៈពេលនៃការសាងសង់ដោយរំពឹងថា ប្រើរយៈពេលពី៣ឆ្នាំទៅ៥ឆ្នាំ។លោកបន្តទៀតថា ក្នុងដំណាក់កាលទី១នៃគម្រោងនេះ មានទុនវិនិយោគសរុបប្រមាណ៨៨០លានដុល្លារអាមេរិក និងមានសាងសង់ផ្លូវរត់ល្បឿនលឿនទំហំ៣ពាន់៦០០ម៉ែត្រ គុណ៤៥ម៉ែត្រមួយផ្លូវ និងប៉ារ៉ាឡែលសម្រាប់យន្តហោះធ្វើការហោះហើរ និងចុះចត និងចំណតយន្តហោះ ព្រមទាំងមានហេដ្ឋារចនាសម្ព័ន្ធដែលពាក់ព័ន្ធផ្សេងៗ និងបរិក្ខាជំនួយស្ថានីយអ្នកដំណើរដែលមានទំហំ៥០ពាន់ម៉ែត្រក្រឡា ហើយអាកាសយានដ្ឋាននេះក្នុងមួយឆ្នាំអាចបម្រើសេវាកម្មភ្ញៀវទេសចរណ៍ពី៧លានទៅ១០លាននាក់ផងដែរ ។
លោកបានបន្តទៀតថា នៅពេលបញ្ចប់គម្រោងនេះ និងបង្កើននូវសមត្ថភាពដឹកជញ្ជូននៅកម្ពុជា ឱ្យកាន់តែល្អប្រសើរជាងមុន និងជម្រុញសក្តានុពលនៃការអភិវឌ្ឍន៍សេដ្ឋកិច្ច និងសង្គមឱ្យកាន់តែមានភាពរីកចម្រើននៅក្នុងតំបន់ព្រមទាំងផ្តល់ផលប្រយោជនដល់ការការពារប្រវត្តិសាស្ត្រអង្គរ និងបានពង្រឹងកិច្ចសហប្រតិបត្តិការសេដ្ឋកិច្ច អនុតំបន់ទន្លេឡានឆាងមេគង្គ និងការអភិវឌ្ឍន៍បន្ថែមលើកិច្ចទំនាក់ទំនងជាមិត្តភាព និងធ្វើឱ្យចំណងមិត្តភាពកម្ពុជា ចិនកាន់តែមានភាពរឹងមាំ និងជាបងប្អូនតែមួយទៀតផង ។
លោកក៏បានលើកឡើងផងដែរថា នៅគម្រោងមួយនេះក្រោយពេលបញ្ចប់ និងបើកដំណើរការនោះ គឺជាបង្អួចមួយដែលបានបង្ហាញពីកម្ពុជាទៅលើពិភពលោក ហើយមានសង្ឃឹមជឿជាក់ថា គម្រោងនេះជាសារៈសំខាន់ក្នុងការលើកកម្ពស់នូវសេដ្ឋកិច្ចប្រជាពលរដ្ឋខេត្តសៀមរាប និង លើកកម្ពស់នៃទំនាក់ទំនងសេដ្ឋកិច្ចរវាងកម្ពុជា ចិន ឱ្យកាន់តែស៊ីជម្រៅឡើងថែមទៀតផង ៕
ចែករំលែកព័តមាននេះ