ខេត្តសៀមរាប ៖ ប្រជាពលរដ្ឋក៏ដូចជាភ្ញៀវបរទេសបានរិះគន់ថា បរិស្ថានទឹកស្ទឹងសៀមរាប តាំងពីអភិ បាលខេត្តចាស់ រហូតដល់ថ្មីនៅតែកខ្វក់ ។ ទឹកស្ទឹងសៀមរាបនេះ ដែលមានប្រភពហូរធ្លាក់មកពីភ្នំគូលែន ធ្លាប់តែមានទឹកថ្លាឆ្វង់ល្អ គួរឱ្យចង់បរិភោគតាំងតែពីសម័យមុន ហើយពលរដ្ឋប្រើប្រាស់មិនដែលមានបញ្ហាទេ ។ ប៉ុន្តែបច្ចុប្បន្ន ទឹកស្ទឹងនេះគួឱ្យឆ្អើម ព្រោះតែភាពកខ្វក់ទឹកឡើងពណ៌ខ្មៅ និងមានក្លិនស្អុយមិនអាចហ៊ានប្រើប្រាស់ទេ ។
ពលរដ្ឋម្នាក់សូមមិនបញ្ចេញឈ្មោះ ជាអាជីវករលក់ដូរនៅផ្សារពោធិ៍លង្កា ក៏ដូចជាមន្ត្រីរាជការមួយចំនួននិយាយថា នារយៈពេលចុងក្រោយដែលខេត្តសៀមរាបមានអភិបាលខេត្តចំនួន៣នាក់រួចមកហើយនេះ គ្មានឃើញការយកចិត្តទុកដាក់ពីអាជ្ញាធរក្រុង ឬមន្ដ្រីពាក់ព័ន្ធ ជាពិសេសអាជ្ញាធរខេត្តឡើយ ដោយបណ្ដោយទុកឱ្យបណ្ដាផ្សារ ផ្ទះសំណាក់ សណ្ឋាគារ និង ភោជនីយដ្ឋានមួយចំនួន នៅតាមដងស្ទឹងសៀម
រាប ក្នុងក្រុងសៀមរាប ដាក់លូបង្ហូរទឹកស្អុយចូលទៅក្នុងស្ទឹង ទើបធ្វើឱ្យទឹកស្ទឹងនេះប្រែពណ៌ ពីខៀវថ្លា
មកជាខ្មៅ ថែមទាំងមានក្លិនស្អុយថែមទៀត ។
ជុំវិញករណីនេះ លោក នួន ពុទ្ធារ៉ា អភិបាលក្រុងសៀមរាប ថ្លែងថា លោកបានចាត់ក្រុមការងារឱ្យទៅពិនិត្យតាមដងស្ទឹងសៀមរាបនោះហើយ មិនមែនតែផ្សារមួយទេគឺមានច្រើនទៀតដូចជា សណ្ឋាគារ ផ្ទះ សំណាក់ ភោជនីយដ្ឋាន និងផ្ទះជាច្រើន ដែលស្ថិតនៅជាប់មាត់ស្ទឹងសៀមរាប ។ ឥឡូវយើងកំពុងសិក្សា ហើយខាងក្រសួង សាធារណការនិងដឹកជញ្ជូនជួយសិក្សាប្រព័ន្ធលូ បង្ហូរទឹកកខ្វក់នៅតាមដងស្ទឹងសៀម
រាបនេះ ។យើងនឹងបិទបញ្ចៀសវាជាបណ្តោះអាសន្ន ដើម្បីឱ្យវារុញច្រានទៅប្រព័ន្ធលូបង្ហូរទឹកក្រខ្វក់ផ្សេងទៀត ។
តាមពិត នេះជាគម្រោងទ្រង់ទ្រាយធំ ហើយមិនអាចធ្វើតែមួយថ្ងៃកើតទេ ទាំងអាជ្ញាធរខេត្ត ទាំងក្រសួង បាននិងកំពុងធ្វើកិច្ចការនេះ ។ បច្ចុប្បន្ន លូចម្រោះមាន២ទីតាំងគឺ ទី១-នៅជិតសណ្ឋាគារសុខាចាស់ និងទី២-រោងចក្រចម្រោះធំ នៅក្នុង សង្កាត់សំបួរ ក្រុងសៀមរាប ។លោកអភិបាលក្រុងបញ្ជាក់ថា បច្ចុប្បន្ននេះ
យើងចម្រោះទឹកកខ្វក់ក្នុង១ថ្ងៃបាន១៥.០០០ ម៉ែត្រគូប ។ យើងកំពុងសិក្សាបន្ថែម ដើម្បីឲ្យបានដល់២៥.០០០ម៉ែត្រគូប ហើយនិងសិក្សាលទ្ធភាពបន្ថែមទៀតឈានទៅពង្រីកលទ្ធភាពនៃប្រព័ន្ធបញ្ចេញចោល ។ អុីចឹងយើងនឹងព្យាយាមគិតពីអាទិភាព ហើយរឿងប្រព័ន្ធលូបង្ហូរចូលស្ទឹង គឺនៅថ្ងៃខាងមុខមិនឱ្យមានទៀតទេ ។
កាលពីថ្ងៃទី៣១ ខែមីនាកន្លងទៅ យើងមានប្រជុំពិនិត្យផែនការនោះជាលើកចុងក្រោយ ដើម្បីឈានទៅដល់សុំការសម្រេចពីថ្នាក់ដឹកនាំ ។យើងមានផែនការពង្រីកជាបន្តបន្ទាប់ទៀត ក្នុងឆ្នាំ២០១៩ និងដើមឆ្នាំ២០២០ ហើយគម្រោងនេះមានការជួយគាំទ្រថវិកាពី ADB , AFD ,EDCF និងដៃគូមួយចំនួនទៀត ក៏ប៉ុន្តែវានៅមិនគ្រប់គ្រាន់ទេ ។មជ្ឈដ្ឋានានាក្នុងក្រុងសៀមរាប សំណូមពរដល់អាជ្ញាធរខេត្ត ជួយដោះស្រាយប្រព័ន្ធលូបង្ហូរទឹកកខ្វក់ចូលក្នុងទឹកស្ទឹងសៀមរាបនេះ ព្រោះបន្តិចម្តងៗបានក្លាយជាស្ទឹងទឹកស្អុយទៅ
ហើយ ៕
ចែករំលែកព័តមាននេះ