រាជធានីភ្នំពេញ ៖ កន្លងមកមានពាក្យចចាមអារ៉ាមនិយាយតៗគ្នាថា ឆ្នាំនេះអ្នកលក់ជ្រូកខ្វៃអាចលក់មិនដាច់ទេ មូលហេតុជួបហានិភ័យឆុងឆ្នាំកុរ (ឆ្នាំនេះឆ្នាំជ្រូក) ។ ផ្ទុយទៅវិញលោក ហ៊ត វ៉ាន់ធី…
រាជធានីភ្នំពេញ ៖ កន្លងមកមានពាក្យចចាមអារ៉ាមនិយាយតៗគ្នាថា ឆ្នាំនេះអ្នកលក់ជ្រូកខ្វៃអាចលក់មិនដាច់ទេ មូលហេតុជួបហានិភ័យឆុងឆ្នាំកុរ (ឆ្នាំនេះឆ្នាំជ្រូក) ។ ផ្ទុយទៅវិញលោក ហ៊ត វ៉ាន់ធី ប្រធានគណកម្មការផ្សារអូឬស្សី រាជធានីភ្នំពេញបានថ្លែងឲ្យដឹងនៅថ្ងៃទី០៤ ខែមេសានេះថា ជ្រូកខ្វៃនៅតែជាវិធានបទសំខាន់សម្រាប់សែនចិន ទិញយកទៅសែនជីដូនជីតា កុងម៉ា ដែលបានចែកឋានទៅបរលោកខាងមុខនារដូវឆេងម៉េងរយៈពេលជិតកន្លះខែ ។
លោក ធី បន្តថា ប្រជាពលរដ្ឋដែលជាប់សែស្រឡាយចិនរស់នៅក្នុងរាជធានីភ្នំពេញនៅតែតម្រូវការសំខាន់សាច់ជ្រូកខ្វៃសម្រាប់ (ឆេងម៉េង) ខុសពីពាក្យចចាមអារ៉ាមនិយាយតៗគ្នានោះ ។ លោកហ៊ត វ៉ាន់ធី បន្តថា សែចិនត្រូវការទិញជ្រូកខ្វៃយកទៅឆេងម៉េង ចាប់ពីថ្ងៃទី២៨ ខែមីនា រហូតដល់ថ្ងៃទី០៦ ខែមេសា ជារៀងរាល់ឆ្នាំ ដូច្នេះសម្រាប់ផ្សារអូរឬស្សីតួលេខថ្ងៃដំបូងជ្រូកខ្វៃលក់ចេញអស់ប្រមាណជាង៥០០ក្បាល និងថ្ងៃបន្តបន្ទាប់លក់ដាច់ប្រហាក់ហែលគ្នា លើកលែងតែថ្ងៃទី៣១ មីនា ជាថ្ងៃអាទិត្យ ជ្រូកខ្វៃលក់ដាច់ដល់ទៅ១០០៨ក្បាលឯណោះ ។
សរុបមកវិញក្នុងរដូវចិនសែនឆេងម៉េងប៉ុន្មានថ្ងៃក្នុងឆ្នាំនេះ ជ្រូកខ្វៃលក់ដាច់ធម្មតា និងដាច់ដល់ទៅជាង៥០០០ក្បាល ប្រហាក់ប្រហែលឆ្នាំកន្លងទៅដែរ ។ នេះសបញ្ជាក់ឲ្យឃើញថា ជ្រូកខ្វៃមិនប៉ះពាល់ដល់អតិជនដែលទិញយកសែនឆេងម៉េងនោះទេ ប៉ុន្តែមានខ្លះរារែកមិនទិញយកទៅប្រើប្រាស់ដែរ ដោយគេយល់ថា (ឆុងឆ្នាំជ្រូក) ។
យ៉ាងណាក្តីមានអ្នកលេងសង្គមហ្វេសប៊ុកមួយទំនងជាម្ចាស់ឡត៌ខ្វៃជ្រូកលក់បានបង្ហោះសារជាសាធារណមានខ្លឹមសារថា ចាប់ទទួលកុម្ម៉ង់ខ្វៃជ្រូកសម្រាប់សែនឆេងម៉េង ពីថ្ងៃនេះតទៅដែលតម្លៃមានដូចខាងក្រោមនេះ ជ្រូកមូលទម្ងន់៦គីឡូក្រាមឡើងទៅតម្លៃ ៥០០ ០០០រៀល ទម្ងន់ពី៨គីឡូក្រាមឡើងទៅ តម្លៃ៥៥០ ០០០ រៀល ទម្ងន់ពី១០គីឡូក្រាមទៅតម្លៃ ៦០០ ០០០រៀល ទម្ងន់ពី១២គីឡូក្រាមទៅ ៦៥០ ០០០រៀល និងទម្ងន់ពី១៥គីឡូដល់១៧គីឡូក្រាម តម្លៃ៧៥០ ០០០រៀល ។ ហើយអតិថិជនណាបានកុម្ម៉ង់មុន ថ្ងៃទី២៥ ខែមីនា និងត្រូវចុះតម្លៃ៥ដុល្លារអាមេរិក សម្រាប់ជ្រូកខ្វៃ១ក្បាល និងគ្រប់គ្នាទាំងអស់ បើទៅយកដល់ឡត៌ខ្វៃជ្រូកតែម្តង និងចុះជូន៥ដុល្លារទៀត ៕
ចែករំលែកព័តមាននេះ