ខេត្តកំពង់ស្ពឺ ៖ កម្មការិនីម្នាក់បានរងរបួសធ្ងន់ដាច់ដៃម្ខាង ចំណែកកម្មការិនីចំនួន១១នាក់ផ្សេងទៀតបានរងរបួសធ្ងន់ និងស្រាល ត្រូវបានរថយន្តសាមុយមកដឹកយកទៅសង្គ្រោះនៅតាមគ្លីនិកឯកជន និងមណ្ឌលសុខភាពក្បែរកន្លែងកើតហេតុ បន្ទាប់ពីជនរងគ្រោះទាំង១២នាក់នោះជួបគ្រោះថ្នាក់ចរាចរណ៍រវាងរថយន្តដឹកកម្មករបានប៉ះ និងកៀរគ្នាជាមួយរថយន្តមួយគ្រឿងទៀតកាលពីវេលាម៉ោង៦និង៣០នាទីព្រឹកថ្ងៃទី៤ ខែមេសា ឆ្នាំ២០១៩ នៅលើកំណាត់ផ្លូវជាតិលេខ៤៤ ត្រង់ចន្លោះបង្គោលគីឡូម៉ែត្រលេខ១៣១ទៅលេខ១៣២ ស្ថិតក្នុង ភូមិខ្នុរអំពិល ឃុំវាលពង់ ស្រុកឧដុង្គខេត្តកំពង់ស្ពឺ។
កម្មការិនីដែលរងគ្រោះទាំង១២នាក់ខាងលើនេះ រួមមាន១-ឈ្មោះ រឿង គន្ធា អាយុ២៩ឆ្នាំ ២-ឈ្មោះ ភី ខេម អាយុ១៨ឆ្នាំ ៣-ឈ្មោះ ឃុំ ស្រីពេញ អាយុ២៦ឆ្នាំ ៤-ឈ្មោះ ឡង់ ស្រីសរ អាយុ១៩ឆ្នាំ ៥-ឈ្មោះ វេន សុខា អាយុ៣៥ឆ្នាំ ៦-ឈ្មោះ ចែល ណា អាយុ១៩ឆ្នាំ ៧-ឈ្មោះ រ៉ាន់ រ៉េន អាយុ៣២ឆ្នាំ ៨-ឈ្មោះ ផេន សុទុំ អាយុ២៥ឆ្នាំ ៩-ឈ្មោះ មាស ផល្លី អាយុ៣៧ ឆ្នាំ ១០-ឈ្មោះ រ៉េម សុខរ៉ា អាយុ២១ឆ្នាំ ១១-ឈ្មោះ រី ថងក្វាវ អាយុ២២ឆ្នាំ និង១២-ឈ្មោះ រី រឿន អាយុ២០ឆ្នាំ ។ កម្មការិនីទាំង១២នាក់នេះរស់នៅភូមិច្រកខ្លុង ឃុំមនោរម្យ ស្រុកថ្ពង។
រថយន្តមួយគ្រឿងដែលដឹកកម្មការិនីខាងលើម៉ាក Hyundai Mighty ពណ៌ ខៀវ ពាក់ស្លាកលេខ កំពង់ស្ពឺ ៣A-១៤១១ បើកបរដោយឈ្មោះសាម ចន្ធី ភេទប្រុស អាយុ២៥ឆ្នាំ មុខរបរបើកបររថយន្តដឹកកម្មករ រស់នៅភូមិច្រកខ្លុង ឃុំមនោរម្យ ស្រុកថ្ពង ខេត្តកំពង់ស្ពឺ បានរត់គេចខ្លួនបាត់។
ចំណែកភាគីខាងរថយន្តមួយគ្រឿងទៀតម៉ាកហ៊ីណូ ពណ៌សំបកឪឡឹក ពាក់ស្លាកលេខ ស្វាយរៀង ៣A-០៥៣០ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់។
តាមប្រភពពីប្រជាពលរដ្ឋដែលឃើញហេតុការណ៍បានឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងដឹកកម្មកររោងចក្រទៅធ្វើការនៅខេត្តកំពង់ឆ្នាំង ធ្វើដំណើរតាមបណ្តោយផ្លូវជាតិលេខ៤៤ ក្នុងទិសដៅពីលិចទៅកើតក្នុងល្បឿនយ៉ាងលឿន លុះមកដល់ចំណុចកើតហេតុខាងលើ ក៏ជ្រុលទៅប៉ះ និងកៀរជាមួយរថយន្តមួយគ្រឿងទៀតម៉ាក ហ៊ីណូ ដែលកំពុងធ្វើដំណើរក្នុងទិសដៅបញ្ច្រាសគ្នា បណ្តាលឲ្យកម្មការិនីចំនួន ១២នាក់រងរបួសធ្ងន់និងស្រាល ក្នុងនោះមានកម្មការិនីម្នាក់រងរបួសធ្ងន់ដាច់ដៃម្ខាងគួរឱ្យស្រៀវ។
តាមប្រភពដដែលបានបន្តថា ក្រោយពីកើតហេតុ អ្នកបើកបររថយន្តទាំងពីរគ្រឿងបានរត់គេចខ្លួនបាត់ស្រមោល។
តាមប្រភពពីសមត្ថកិច្ចនគរបាលស្រុកឧដុង្គបានអោយដឹងថា ចំពោះកម្មការិនីដែលរងរបួសធ្ងន់និងស្រាលទាំង១២នាក់ខាងលើ ត្រូវបានសមត្ថកិច្ចទាក់ទងហៅរថយន្តសាមុយមកដឹកយកទៅសង្គ្រោះនៅមន្ទីរពេទ្យបង្អែកឧដុង្គ និងគ្លីនិកឯកជន។
បន្ទាប់ពីបញ្ជូនជនរងគ្រោះទៅសង្គ្រោះរួចមក សមត្ថកិច្ចនគរបាលស្រុកឧដុង្គបានធ្វើការវាស់វែងនិងអូសយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុកឧដុង្គរង់ចាំស្រាវជ្រាវរកអ្នកបើកបររថយន្តទាំង២គ្រឿងឱ្យចូលខ្លួនមកដោះស្រាយតាមច្បាប់៕
ចែករំលែកព័តមាននេះ