ប្រទេសម៉ាឡេស៊ី ៖ អតីតនាយករដ្ឋមន្ត្រីម៉ាឡេស៊ីលោកណាជីបរ៉ាហ្សាក់ បានបដិសេធរាល់ការចោទប្រកាន់លើរូបលោក ពេលបើកសវនាការកាត់ទោសលោក កាលពីថ្ងៃទី៣មេសានៅទីក្រុងគូឡាឡាំពួរ ទាក់ទិននឹងមូលនិធិនៃគម្រោង1MDB ជារឿងអាស្រូវពង្វាងយកប្រាក់ជាច្រើនពាន់លានដុល្លារ។
សវនាការនោះដែលមិនត្រឹមតែទាក់ទិននឹងអតីតមេដឹកនាំអាយុ៦៥ឆ្នាំរូបនោះទេ តែតុលាការស៊ើបអង្កេតលើការលួចមូលនិធិនៃផែនការ1MDBនោះ ក្នុងប្រទេសជាច្រើនទៀតដូចជាសហរដ្ឋអាមេរិក ស្វ៊ីសឬបារាំងជាដើម។
លោករ៉ាហ្សាក់និងពួកអ្នកផ្សំគំនិត ទទួលការចោទប្រកាន់ថា ប្រើប្រាស់មូលនិធិទាំងនោះ សម្រាប់ទិញរបស់របរហ៊ឹកហ៊ាក់នានា ផ្ទះព្រមទាំងវត្ថុសិល្បៈទាំងឡាយ រហូតដល់នាវាកម្សាន្តទំនើប។ គេចោទប្រកាន់ពួកអ្នកទាំងនេះថា ពង្វាងយកមូលនិធិ1MDB ដែលបង្កើតឡើងក្នុងគោលដៅអភិវឌ្ឃន៍សេដ្ឋកិច្ចម៉ាឡេស៊ី។
រឿងអាស្រូវដ៏ធំនោះជាប់ទាក់ទិនរហូតដល់ ធនាគារអាមេរិកGOLDMAN SACHS ដែលសង្ស័យថា បានជួយពួកអ្នកទាំងនេះក្នុងការពង្វាងយកប្រាក់។ រឿងអាស្រូវបានរួមចំណែកយ៉ាងខ្លាំងធ្វើឲ្យក្រុមចម្រុះនយោបាយរបស់អតីតនាយករដ្ឋមន្ត្រីរូបនោះចាញ់ឆ្នោត កាលពីខែឧសភាឆ្នាំ២០១៨។ ក្រុមចម្រុះនេះដែលដឹកនាំម៉ាឡេសីុចាប់តាំងពី៦ទសវត្សមកហើយ ត្រូវចាញ់ឆ្នោតហើយនាំឲ្យលោកមហាធៀរម៉ូហាម៉ាដ អតីតអ្នកការពារលោកណាជីបរ៉ាហ្សាក់វិលមកកាន់អំណាចវិញ។
ពេលមកដល់តុលាការកាលពីថ្ងៃទី៣មេសា ដោយមានអ្នកគាំទ្រលោកមួយក្រុមតូចរង់ចាំទទួល លោកណាជីបរ៉ាហ្សាក់បានសូត្រធម៌ជាមួយពួកគេប៉ុន្មាននាទី បន្ទាប់មកដើរចូលក្នុងអគារតុលាការ។ លោកបានបដិសេធបទចោទប្រកាន់ទាំង៧ប្រឆាំងរូបលោក ទាក់ទិននឹងអំពើពុករលួយនិងលាងលុយកខ្វក់។
សវនាការលើកដំបូងនោះ ផ្ដោតលើការពង្វាងយកប្រាក់ចំនួន៤២លានរីញហ្គីត ប្រមាណជា១០,៣លានដុល្លារ ពីSRC INTERNATIONALជាស្ថាប័នមួយនៃមូលនិធិ1MDB។ តែនោះជាប្រាក់មួយចំណែកតូចប៉ុណ្ណោះ នៃទឹកប្រាក់់ក្នុងទំំហំដ៏ធំដែលបាត់។ យោងតាមលទ្ធផលមួយចំនួននៃការស៊ើបអង្កេតថា ទឹកប្រាក់ជាច្រើនរយលានដុល្លារបានធ្លាក់ចូល ក្នុងបណ្ដាគណនីរបស់លោកណាជីប។ ប៉ុន្តែលោកបានបដិសេធជាប់ចំពោះរាល់ការបកស្រាយ។
រដ្ឋអាជ្ញាលោកTOMMY THOMASលើកឡើងថា នេះជាលើកដំបូងដែលម៉ាឡេសីុធ្វើសវនាកាត់ទោស អតីតប្រមុខរដ្ឋាភិបាលមួយរូប។ រឿងក្ដីនោះអមដោយការទទួលខុសត្រូវដ៏ធំធេង ហើយបណ្ដាជនជាប់ចោទមិនអាចស្ថិតនៅពីលើច្បាប់ឡើយ។ សវនាការនោះត្រូវលើកពេលដល់ថ្ងៃទី១៥មេសាទៀត រួចបន្តរហូតដល់ថ្ងៃទី១០ឧសភា។
ខណៈដែលឥស្សរជនជាច្រើនដែលជាប់ទាក់ទិនក្នុងរឿងនោះត្រូវបានចាប់ខ្លួន ហើយត្រូវបានតុលាការធ្វើការចោទប្រកាន់ តែមេខ្លោងធំនៃការលួចមូលមូលនិធិិ1MDB លោកJHO LOW ហិរញ្ញញឹកមានចរឹតដូចប្លេប៊យបានរត់គេចខ្លួនបាត់៕
ចែករំលែកព័តមាននេះ