ខេត្តសៀមរាប ៖ កម្លាំងអធិការនគរបាលស្រុកស្វាយលើបានចុះឃាត់ខ្លួនជនសង្ស័យប្រុសស្រីចំនួន៣នាក់ បន្ទាប់ពីសមត្ថកិច្ចបានទទួលពាក្យបណ្តឹងពីជនរងគ្រោះថា ជនសង្ស័យទាំង៣នាក់នេះបានចូលបន្លំលួចលុយក្នុងតូបលក់អីវ៉ាន់ចាប់ហួយនៅមុខផ្ទះអស់ចំនួន១លាន៩០ម៉ឺនរៀល កាលពីវេលាម៉ោង១៣ និង១០នាទីរសៀលថ្ងៃទី៣ ខែមេសា ឆ្នាំ២០១៩ ស្ថិតនៅក្នុងភូមិត្រពាំងស្វាយ(រលំទូក)…
ខេត្តសៀមរាប ៖ កម្លាំងអធិការនគរបាលស្រុកស្វាយលើបានចុះឃាត់ខ្លួនជនសង្ស័យប្រុសស្រីចំនួន៣នាក់ បន្ទាប់ពីសមត្ថកិច្ចបានទទួលពាក្យបណ្តឹងពីជនរងគ្រោះថា ជនសង្ស័យទាំង៣នាក់នេះបានចូលបន្លំលួចលុយក្នុងតូបលក់អីវ៉ាន់ចាប់ហួយនៅមុខផ្ទះអស់ចំនួន១លាន៩០ម៉ឺនរៀល កាលពីវេលាម៉ោង១៣ និង១០នាទីរសៀលថ្ងៃទី៣ ខែមេសា ឆ្នាំ២០១៩ ស្ថិតនៅក្នុងភូមិត្រពាំងស្វាយ(រលំទូក) ឃុំស្វាយលើ ស្រុកស្វាយលើ ខេត្តសៀមរាប។
លោកឧត្តមសេនីយ៍ត្រី ភឹង ចិន្តារ៉េត ស្នងការរង ទទួលផែនកណ្តាលព្រហ្មទណ្ឌ នៃស្នងការនគរបាលខេត្ត បានប្រាប់ឱ្យដឹងថា ជនរងគ្រោះឈ្មោះ រុន វាសនា ភេទស្រី អាយុ៣៤ឆ្នាំ មុខរបរលក់ដូរ ស្ថិតនៅភូមិត្រពាំងស្វាយ(រលំទូក) ឃុំស្វាយលើ ស្រុកស្វាយលើ ខេត្តសៀមរាប ។
ចំណែកជនសង្ស័យប្រុសស្រីទាំង៣នាក់ខាងលើរួមមាន ១-ឈ្មោះ ឈិន វ៉ាន់ដេត ភេទប្រុស អាយុ៣២ឆ្នាំ រស់នៅភូមិវត្តតំ ឃុំរកាក្រៅ ស្រុកដូនកែវ ខេត្តតាកែវ ២-ឈ្មោះ នុប អូន ភេទស្រី អាយុ៤៨ឆ្នាំ រស់នៅភូមិវត្តតំ ឃុំរកាក្រៅ ស្រុកដូនកែវ ខេត្តតាកែវ និង៣-ឈ្មោះ ង៉ែត ណែត ភេទស្រី អាយុ៣៦ឆ្នាំ រស់នៅភូមិវត្តតំ ឃុំរកាក្រៅ ស្រុកដូនកែវ ខេត្តតាកែវ ។
លោកស្នងការរងទទួលផែនកណ្តាលព្រហ្មទណ្ឌនៃស្នងការនគរបាលខេត្តបានប្រាប់ឱ្យដឹងថា កាលពីវេលាម៉ោង១២និង១០នាទីថ្ងៃត្រង់ថ្ងៃទី៣ ខែមេសា ឆ្នាំ២០១៩ ជនរងគ្រោះបានត្រឡប់មកពីលក់សាច់ជ្រូកនៅផ្សារស្វាយលើចាស់ ស្ថិតក្នុងភូមិជប់លើ ឃុំស្វាយលើ ស្រុកស្វាយលើ ខេត្តសៀមរាប លុះមកដល់តូបលក់ដូរអីវ៉ាន់ចាប់ហួយនៅខាងមុខផ្ទះរបស់គាត់ស្ថិតនៅភូមិឃុំកើតហេតុខាងលើវិញ គាត់បានយកប្រាក់ដែលលក់បានចំនួន១លាន៩០ម៉ឺនរៀល ទុកនៅក្នុងកាបូបយួរដាក់នៅក្បាលគ្រែលើពូក ដោយដាក់កន្ទេលពីលើ និងមានភួយខ្នើយគ្របពីលើផងដែរ។
តាមប្រភពដដែលបានបន្តថា បន្ទាប់មកជនរងគ្រោះចេញទៅហូបការបាត់ ដោយឪពុកម្ដាយរបស់គាត់នៅតូបលក់អីវ៉ាន់ជំនួស លុះដល់ម៉ោងកើតហេតុខាងលើ ស្រាប់តែជនសង្ស័យប្រុសស្រីទាំង៣នាក់ខាងលើ បានជិះម៉ូតូ១គ្រឿងម៉ាកហុងដាឌ្រីម ស៊េរីឆ្នាំ២០១៥ បិទស្គុតពណ៌ខ្មៅ ពាក់ស្លាកលេខ ភ្នំពេញ១FR-៣២៣០ ដោយមានបុរសជាជនសង្ស័យម្នាក់ជាអ្នកបើកម៉ូតូទៅមុខតូបលក់អីវ៉ាន់បានបន្តិច ក៏ឈប់ម៉ូតូអែបកៀន ហើយអង្គុយលើម៉ូតូចាំមើលផ្លូវ រីឯស្ត្រីជាជនសង្ស័យទាំង២នាក់ខាងលើជាអ្នកបន្លំចូលមកទិញអីវ៉ាន់ ។
ប្រភពដដែលបានបន្តទៀតថា ពេលស្ត្រីជាជនសង្ស័យទាំង២នាក់បានចូលក្នុងតូបលក់ដូរអីវ៉ាន់ ដោយស្ត្រីជាជនសង្ស័យម្នាក់ធ្វើជាទិញខ្ទឹម ឯស្ត្រីជាជនសង្ស័យម្នាក់ទៀតបានដើរចូលមកមើលទូរសំអាងរបស់ជនរងគ្រោះ ដោយម្ដាយជនរងគ្រោះខ្លាចបាត់លុយ ក៏បានដេញចេញឱ្យលឿន ហើយម្ដាយជនរងគ្រោះរវល់តែថ្លឹងខ្ទឹមឱ្យស្ត្រីជាជនសង្ស័យទី២ មិនបានមើលលុយឡើយ ។ មួយសន្ទុះស្រាប់តែជនសង្ស័យប្រុសស្រីទាំង៣នាក់នោះរត់ចេញទៅទាំងភ័យស្លន់ស្លោរ ទើបម្ដាយជនរងគ្រោះមើលទៅលើក្បាលគ្រែឃើញចំហ ក៏បានស្រែកហៅឱ្យជនសង្ស័យទាំង៣នាក់នោះឈប់ដែរ ប៉ុន្តែពួកគេមិនឈប់ឡើយ គិតតែនាំគ្នារត់ឡើងជិះម៉ូតូបើកចេញទៅបាត់ ។
តាមប្រភពដដែលបានបន្តទៀតថា ឃើញហេតុការណ៍មិនស្រួលបែបនេះ ម្ដាយរបស់ជនរងគ្រោះក៏បានរាយការណ៍ប្រាប់សមត្ថកិច្ចឱ្យជួយអន្តរាគមន៍ ទើបកម្លាំងសមត្ថកិច្ច និងកម្លាំងប្រជាការពារភូមិធ្វើការពួនស្ទាក់រហូតឈានដល់ការចាប់ឃាត់ខ្លួនបានជនសង្ស័យប្រុសស្រីទាំង៣នាក់ភ្លាមៗ រួចនាំយកមកធ្វើការសាកសួរនៅអធិការដ្ឋាននគរបាលស្រុកស្វាយលើតែម្ដង ទើបជនសង្ស័យប្រុសស្រីទាំងបីនាក់ខាងលើបានឆ្លើយសារភាពថា ពួកខ្លួនពិតជាបានប្រព្រឹត្តដូចការចោទប្រកាន់របស់ជនរងគ្រោះប្រាកដមែន។
ក្រោយការចាប់ឃាត់ជនសង្ស័យប្រុសស្រីទាំង៣នាក់ខាងលើ កម្លាំងជំនាញបានធ្វើការឆែកឆេរ រកឃើញវត្ថុតាងនៅជាប់ខ្លួនជនសង្ស័យរួមមាន ទូរស័ព្ទចំនួន៤គ្រឿង, កាបូបដាក់លុយតូចចំនួន២, កាបូបដាក់លុយធំ២, ក្រដាសទិញ-លក់មាស១ថង់ត្រូវបានហែក, ប្រាក់ចំនួន៣លាន៩០ម៉ឺនរៀល, ប្រាក់ឡាវចំនួន៨០០០, ក្រវិលកំប៉ុងសាបៀរចំនួន២០ថង់, គំរបដបចំរុះចំនួន៤ថង់, កាតទូរស័ព្ទ១ដុល្លារចំនួន១៦០សន្លឹក, មួកសុវត្ថិភាព១ និងម៉ូតូ១គ្រឿងជារបស់ជនសង្ស័យដែលជិះធ្វើសកម្មភាពលួចលុយគេ។
បច្ចុប្បន្ន ជនសង្ស័យប្រុសស្រីទាំង៣នាក់ ត្រូវបានកម្លាំងជំនាញកំពុងរៀបចំសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តទៅតាមនិតិវិធីច្បាប់៕
ចែករំលែកព័តមាននេះ