ខេត្តបន្ទាយមានជ័យ ៖ មនុស្សចាស់ម្នាក់ ក្មេងម្នាក់ បានលង់ទឹកស្រះស្លាប់ ដោយឡែកពីគ្នាម្នាក់នៅក្រុងប៉ោយប៉ែត និងម្នាក់ទៀតនៅស្រុកភ្នំស្រុក ខេត្តបន្ទាយមានជ័យ ។
តាមប្រភពព័ត៌មានពីនគរបាលក្រុងប៉ោយប៉ែតបានឲ្យដឹងថា នៅថ្ងៃទី០៣ ខែមេសា ឆ្នាំ២០១៩ វេលាម៉ោង២រសៀលស្ត្រីវ័យចំណាស់ម្នាក់ត្រូវបានគេប្រទះឃើញសពស្លាប់ នៅចំណុចស្រះខាងជើងក្រោយផ្ទះរបស់ជនរងគ្រោះ ស្ថិតនៅភូមិនិមិត្ត២ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។ ជនរងគ្រោះត្រូវបានគេស្គាល់ឈ្មោះសឹម សាយ (ហៅយាយម៉ៅ) ភេទស្រី អាយុ៦៥ឆ្នាំ រស់នៅភូមិនិមិត្ត២ សង្កាត់និមិត្ត ។
ប្រភពដដែលបានបញ្ជាក់ថា យោងតាមសំដីអ្នកជិតខាងក៏ដូចជាឈ្មោះសុខ សាវុធ ភេទប្រុស អាយុ៦០ឆ្នាំ ត្រូវជាប្ដីបានអោយដឹងថា ប្រពន្ធរបស់គាត់រាល់ថ្ងៃតែងតែផឹកស្រាថ្នាំជាប្រចាំ ហើយពេលផឹកស្រាស្រវឹងដើរមិនត្រង់ផ្លូវ ហើយពេលថ្ងៃប្រពន្ធរបស់គាត់ធ្វើជាចុងភៅធ្វើម្ហូបនៅភោជនីយដ្ឋានផ្កាយព្រឹក ។ ហើយមុនពេលកើតហេតុប្រពន្ធគាត់បានផឹកស្រាស្រវឹងដើរទៅស្រះមើលម៉ោង ដោយបាត់គាត់យូរពេកដើរទៅមើលក៏ឃើញសពអណ្តែតទឹកស្រះសង្ស័យស្រវឹងខ្លាំងរអិលជើងធ្លាក់ក្នុងទឹកស្រះលង់ស្លាប់តែម្តង ។
មួយករណីទៀតនៅស្រុកភ្នំស្រុក មានប្រុសម្នាក់អាយុ៤ឆ្នាំ បានលង់ទឹកស្រះខាងលិចផ្ទះចម្ងាយ១៥០ម៉ែត្រ បណ្តាលឲ្យស្លាប់ ។ សពក្មេងប្រុសត្រូវបានគេប្រទះឃើញស្លាប់ក្នុងទឹកស្រះនៅម៉ោង៥ល្ងាច ថ្ងៃទី០៣ ខែមេសា ឆ្នាំ២០១៩ នៅភូមិពន្លៃ ឃុំភ្នំដី ស្រុកភ្នំស្រុក ខេត្តបន្ទាយមានជ័យ ។
តាមប្រភពព័ត៌មានពីនគរបាលស្រុកភ្នំស្រុកបានឲ្យដឹងថា កុមារារងគ្រោះឈ្មោះ លៀប សៀង អាយុ៤ឆ្នាំ រស់នៅភូមិពន្លៃ ឃុំភ្នំដី ស្រុកភ្នំស្រុក ខេត្តបន្ទាយមានជ័យ ។ ឪពុកម្តាយកុមារារងគ្រោះមិនបាននៅផ្ទះ ដោយទៅរកស៊ីធ្វើកម្មករនៅប្រទេសថៃ ហើយទុកកូនអោយយាយតាជាអ្នកថែរក្សា ជួនពេលនោះ យាយតារវល់ដាំបាយធ្វើម្ហូបមិនបានប្រុងប្រយ័ត្នមើលចៅ ទើបចៅដើរទៅលេងទឹកស្រះខាងលិចផ្ទះបណ្តាលឲ្យស្លាប់ ។ ចំណែកសពជនរងគ្រោះទាំង២នាក់ត្រូវបានក្រុមគ្រួសារចាត់ចែងធ្វើបុណ្យតាមប្រពៃណី បន្ទាប់ពីសមត្ថកិច្ចធ្វើការត្រួតពិនិត្យរួច ៕
ចែករំលែកព័តមាននេះ