រាជធានីភ្នំពេញ ៖ អ្នកនាំពាក្យក្រសួងយុត្តិធម៌លោកគឹម សន្តិភាព បានឲ្យដឹងថា ទណ្ឌិតចំនួន៤៦០នាក់ មកពីមណ្ឌលអប់រំកែប្រែចំនួន៤បានស្នើសុំបន្ធូរបន្ថយ និងលើកលែងទោស សម្រាប់ថ្ងៃបុណ្យចូលឆ្នាំខ្មែរខាងមុខនេះ ។…
រាជធានីភ្នំពេញ ៖ អ្នកនាំពាក្យក្រសួងយុត្តិធម៌លោកគឹម សន្តិភាព បានឲ្យដឹងថា ទណ្ឌិតចំនួន៤៦០នាក់ មកពីមណ្ឌលអប់រំកែប្រែចំនួន៤បានស្នើសុំបន្ធូរបន្ថយ និងលើកលែងទោស សម្រាប់ថ្ងៃបុណ្យចូលឆ្នាំខ្មែរខាងមុខនេះ ។ លោកគឹម សន្តិភាព បានឲ្យដឹងនៅថ្ងៃទី០៣ មេសា ឆ្នាំ២០១៩ថា នៅរសៀលម៉ោង២និង០០ថ្ងៃទី០៤ ខែមេសា ក្រសួងយុត្តិធម៌លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិត្រួតពិនិត្យ និងវាយតម្លៃសម្រាប់ការលើកលែង និងបន្ធូរបន្ថយទោសនឹងដឹកនាំកិច្ចប្រជុំ ដើម្បីពិនិត្យលើសំណើសុំអនុគ្រោះទោសរបស់គណៈកម្មការរាជធានីខេត្ត (ពន្ធនាគាររាជធានី-ខេត្តចំនួន១៨ និងមណ្ឌលអប់រំកែប្រែចំនួន០៤) ដែលបានស្នើក្នុងឱកាសបុណ្យចូលឆ្នាំថ្មីប្រពៃណីជាតិ២០១៩នេះលើបញ្ជីទណ្ឌិតដែលស្នើអនុគ្រោះទោសសរុប៤៦០រូប (ស្រី៤៩រូប) ។
អ្នកនាំពាក្យក្រសួងយុត្តិធម៌ក៏បានឲ្យដឹងថា ក្នុងក្រឹត្យច្បាប់បានកំណត់ចំពោះទណ្ឌិតដែលអាចបន្ធូរបន្ថយទោស គឺត្រូវអនុវត្តទោសនៅក្នុងពន្ធធនាគារបាន១ភាគ៣នៃទោសសរុបទាំងមូល និងទណ្ឌិតដែលអនុវត្តទោសបាន២ភាគ៣នៃទោសទាំងមូលនឹងត្រូវបានទទួលការ លើកលែងទោស ។ លោកក៏បានឲ្យដឹងថា អ្នកទោសទាំងនោះដែលនឹងត្រូវលើកលែង និងបន្ធូរបន្ថយទោសក៏ត្រូវគោរពតាមលក្ខខណ្ឌ និងអប់រំនៅក្នុងពន្ធនាគារបន្ថែមទៀត ។
ជាងនេះមានការវាយតម្លៃពីប្រធានពន្ធនាគារពីការអប់រំបន្ថែម ដើម្បីបញ្ជូនមកគណៈកម្មការថ្នាក់ជាតិត្រួតពិនិត្យនៃសំណុំរឿងនីមួយៗថា តើមានភាពព្រៃផ្សៃទេ ហើយជនរងគ្រោះអនីតិជន ឬជាស្ត្រី ឬជាស្ត្រីមានផ្ទៃពោះ ឬជាមនុស្សមានបញ្ហាស្មារតី…។ ឧទាហរណ៍ ករណីរំលោភ ឪពុករំលោភកូន ឬការរំលោភអនីតិជនឬរំលោភជាលក្ខខណ្ឌសាច់ឈាមគ្នាជាដើម ។ ជាមួយគ្នានោះដែរ លោកក៏បានបញ្ជាក់ទៀតថា «ខ្ញុំសូមបញ្ជាក់ថា ការលើកលែង និងបន្ធូរបន្ថយទោសនេះក៏មានការផ្តល់អាទិភាពចំពោះស្ត្រីផងដែរ» ។
លោកគឹម សន្តិភាព ក៏បានឲ្យដឹងថា សម្រាប់ឆ្នាំនេះក៏មានការអនុគ្រោះទោសម្តងទៀត ចំពោះស្ត្រីដែលត្រូវបានមេធាវីសម្តេចតេជោ ហ៊ុនសែន ការពារ ប៉ុន្តែបច្ចុប្បន្ននេះមេធាវីរបស់ សម្តេចតេជោ ហ៊ុន សែន ដែលការពារស្ត្រីក្រីក្របានកំពុងតែធ្វើការងារជាមួយក្រសួងយុត្តិធម៌ ។ លោកគូសបញ្ជាក់ថា«នៅពេលដែលយើងធ្វើការដល់កម្រិតគ្រប់គ្រាន់ហើយ យើងក៏មានការសណ្តោសប្រណីដល់ស្ត្រីនោះផងដែរ» ។ លោកក៏បានឲ្យដឹងថា សម្រាប់ការលើកលែងទោសចំពោះស្ត្រីនេះ គឺនឹងមានការលើកលែងផ្សេងពីការលើកលែងចំពោះស្ត្រីនឹងធ្វើផ្សេងពីការលើកលែង និងបន្ធូរបន្ថយនៅថ្ងៃចូលឆ្នាំខ្មែរនេះ ។
សូមជម្រាបថា គណៈកម្មការថ្នាក់ជាតិត្រួតពិនិត្យ និងវាយតម្លៃលើកលែង និងបន្ធូរបន្ថយទោសនឹងបើកកិច្ចប្រជុំនៅទីស្តីការក្រសួងវេលាម៉ោង២រសៀលថ្ងៃទី០៤ ខែមេសានេះ ៕
ចែករំលែកព័តមាននេះ