គណៈកម្មការមូលបត្រកម្ពុជា៖ វិស័យធនាគារមិនមែនជា ដៃគូប្រកួតប្រជែងរបស់ផ្សារមូលធន មូលបត្រឡើយ
- ភ្នំពេញ
រាជធានីភ្នំពេញ ៖ នៅពេលមុន គេតែងតែនាំគ្នាគិតថាទីផ្សារមូលធន ឬទីផ្សារមូលបត្រជាដៃគូប្រកួតប្រជែងជាមួយទីផ្សារធនាគារ ប៉ុន្តែផ្ទុយមកវិញគឺជាទីផ្សារពីរនេះ គឺជួយគាំំទ្រគ្នាទៅវិញទៅមក។ ទីផ្សារមូលបត្របង្កើននូវទំនុកចិត្ត អនុញ្ញាតឱ្យទីផ្សារធនគារកាន់តែមានភាពរឹងមាំ។ នេះបើយោងតាមអគ្គនាយកគណកម្មការមូលបត្រកម្ពុជា។
ថ្លែងក្នុងពិធីប្រកាសសេចក្តីថ្លែងការណ៍រួម ស្តីពីការលើកទឹកចិត្តដល់ក្រុមហ៊ុនចុះបញ្ជីនៅផ្សារមូលបត្រកម្ពុជា ពីភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ កាលពីថ្ងៃទី២៩មីនា លោក ស៊ូ សុជាតិ អគ្គនាយកគណកម្មការមូលបត្រកម្ពុជា បញ្ជាក់ថា «ទីផ្សារមូលបត្របង្កើននូវទំនុកចិត្តអនុញ្ញាតឱ្យទីផ្សារធនគារកាន់តែមានភាពរឹងមាំ។ ទីផ្សារធនាគារវិញ ប្រសិនកម្ចីថយ ការដាក់ប្រាក់បញ្ញើថយវានឹងដោយខ្លួនឯង ដូច្នេះការបង្កើននូវកម្ចីនិងការដាក់ប្រាក់បញ្ញើគឺជាចំណុចធ្វើធនាគារកាន់តែរឹងមាំ។ដូចនេះវាចំណុចមួយវាមានទំនាក់ទំនងរវាងគ្នាទៅវិញទៅមកជាមួយវិស័យមូលបត្រ»។
អគ្គនាយកគណកម្មការមូលបត្រកម្ពុជា លើកឡើងថា « អ្វីដែលជាគោលបំណងរបស់រាជរដ្ឋាភិបាលបង្កើតឡើងទីផ្សារមូលធន ដើម្បីផ្តល់ជម្រើសបន្ថែម យើងមិនមែនបង្កើតឱ្យមានការប្រកួតប្រជែងគ្នានោះទេ។ យើងបង្កើតនូវជម្រើសបន្ថែមដើម្បីឱ្យក្រុមហ៊ុននានាអាចរកហិរញ្ញប្បទានពីទីផ្សារមូលបត្រនិងពីយន្តការដែលមានស្រាប់»។ លោកបញ្ជាក់ថា «នៅលើសកលលោកនេះ មិនដែលមានទីផ្សារតែម្ខាងនោះទេ គឺមានទីផ្សារពីរ ហើយខ្ញុំក៏មិនទាន់ឃើញទីផ្សារមូលបត្ររីកចម្រើន ទីផ្សារធនាគារដួលរលំដែរ។ខ្ញុំធ្លាប់ឃើញតែទីផ្សារមូលបត្រកាន់តែរឹងមាំ ធនាគារគឺកាន់តែខ្លាំង»។ បើតាមលោកអគ្គនាយក ទីផ្សារទាំងពីរវិស័យនេះ ជួយពង្រឹងឱ្យគ្នាទៅវិញទៅមក បង្កើនទំនុកចិត្តឱ្យគ្នា ហើយក្រុមហ៊ុនដែលអាចបោះផ្សាយភាគហ៊ុនបានគឺជាក្រុមហ៊ុនដែលធនាគារទុកចិត្ត។ ដូចនេះហិរញ្ញប្បទានបានទៅទីផ្សារបានទៅធនាគារតាមតម្រូវការជាក់ស្តែងក្នុងរយៈពេលវែងនិងខ្លី។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាមានប្រសាសន៍ថា នៅពេលខាងមុខនេះយើងនឹងមានធនាគារច្រើនទៀតដែលខ្លះជាភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រនិងខ្លះទៀតមិនពាក់ព័ន្ធដែលនិងឯកភាពផ្តល់ជាការលើកទឹកចិត្ត។ដូចនេះក្រុមហ៊ុនចុះបញ្ជីមានជម្រើសកាន់តែច្រើនក្នុងការសម្រេចចិត្តទទួលសេវាកម្មរបស់ធនាគារ។
បើតាមលោកអគ្គនាយក សេចក្តីថ្លែងការណ៍រួម ស្តីពីការលើកទឹកចិត្តដល់ក្រុមហ៊ុនចុះបញ្ជីនៅផ្សារមូលបត្រកម្ពុជា ពីភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ បានបញ្ជាក់ឱ្យឃើញកាន់តែច្បាស់ពីភាពបំពេញឱ្យគ្នាទៅវិញទៅមកនៃវិស័យធនាគារនិងវិស័យមូលបត្រ ដែលកន្លងមកតែងតែមានការយល់ច្រលំថា វិស័យទាំងពីរនេះមានការប្រកួតប្រជែងគ្នា ។ លោកបញ្ជាក់ថា «វិស័យធនាគារដែលរីកចម្រើននឹងនាំឱ្យវិស័យមូលបត្រអាចរីកចម្រើនពីព្រោះគ្រឹះស្ថានធនាគារ មានប្រាក់ចំណេញច្រើន នឹងទទួលការចាប់អារម្មណ៍ពីអ្នកវិនិយោគភាគហ៊ុន ។ បញ្ច្រាសមកវិញពេលដែលវិស័យមូលបត្ររីកចម្រើននោះធនាគារអាចផ្តល់កម្ចីកាន់តែច្រើនជាងមុន គុណភាពកម្ចីកាន់តែល្អជាងមុន ហើយធនាគារកាន់តែមានជម្រើសបង្កើតចំណូលបានច្រើនជាងមុន»។
លោកបន្តថា ការផ្តល់ជូននូវអត្រាការប្រាក់ពិសេសនេះគឺជាអត្ថប្រយោជន៍មួយ ក្នុងអត្ថប្រយោជន៍ជាច្រើនផ្សេងទៀតដែលមានដូចជាការអនុគ្រោះបំណុលពន្ធ ការកាត់បន្ថយពន្ធលើប្រាក់ចំណេញ ៥០% រយៈពេល៣ឆ្នាំ ការទទួលបានហិរញ្ញប្បទានរយៈពេលវែងមិនមែនជាបំណុល ការទទួលបានការទទួលស្គាល់កាន់តែច្រើនឡើង សមត្ថភាពប្រកួតប្រជែងល្អជាងមុន។ យោងតាមសេចក្តីប្រកាសព័ត៌មានក្រុមហ៊ុនផ្សារមូលបត្របង្ហាញថា មកដល់បច្ចុប្បន្ននេះ ក្រុមហ៊ុនផ្សារមូលបត្រកម្ពុជាមានក្រុមហ៊ុនចុះបញ្ជីមូលបត្រកម្មសិទ្ធិចំនួន៥ ដែលមានមូលបត្រទីផ្សារប្រមាណជាង២,១៣ទ្រីលានរៀល ឬស្មើប្រមាណ៥៣៤,៣៤លានដុល្លារអាមេរិក ប្រៀបធៀបនិងចុងឆ្នាំ២០១មូលធនទីផ្សារមានប្រមាណ១,២១ទ្រីលានរៀល ស្មើប្រមាណ៣០៤,៧៦លានដុល្លារ ៕
ចែករំលែកព័តមាននេះ