ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅភូមិដំបូកកកោះ ឃុំស្វាយជ្រំ ស្រុករលាប្អៀរ កាលពីព្រឹកថ្ងៃទី២៧ ខែមីនាកន្លងទៅ បានជួបជាមួយអ្នកសារព័ត៌មានជាថ្មីទៀត ដើម្បីឲ្យជួយផ្សព្វផ្សាយបានដឹងដល់អាជ្ញាធរខេត្ត និងក្រសួងពាក់ព័ន្ធ…
ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅភូមិដំបូកកកោះ ឃុំស្វាយជ្រំ ស្រុករលាប្អៀរ កាលពីព្រឹកថ្ងៃទី២៧ ខែមីនាកន្លងទៅ បានជួបជាមួយអ្នកសារព័ត៌មានជាថ្មីទៀត ដើម្បីឲ្យជួយផ្សព្វផ្សាយបានដឹងដល់អាជ្ញាធរខេត្ត និងក្រសួងពាក់ព័ន្ធ ជួយដោះស្រាយបញ្ហាដីធ្លីរបស់ពួកគាត់ផង គ្រាដែលពួកគាត់បានដាក់ពាក្យបណ្ដឹងជាច្រើនកន្លែងទៅហើយ នៅមិនទាន់ឃើញមានការដោះស្រាយនៅឡើយ ។
ស្ថិតនៅលើមាត់រណ្ដៅដីរបស់ពួកគាត់ ដែលអាជ្ញាធរភូមិចង់ដកហូតដាក់ជាសម្បត្តិរួមភូមិពួកគាត់បានរៀបរាប់ពីដំណើររឿងថា ដីរបស់ពួកគាត់មានបន្តិចបន្តួចៗម្នាក់ ដែលខ្លះមានកន្លះហិកតា ខ្លះ៣០អា ។ ពួកគាត់បានលក់អាចម៍ដីឬហៅថាលក់ក្រួសក្រហមទៅឱ្យឈ្មោះ មាស អ៊ុល អតីតប្រធានភូមិដំបូកកកោះ ហើយលោកមេភូមិបានលក់អាចម៍ដីនោះទៅឲ្យក្រុមហ៊ុនម៉ូហិបា ដើម្បីយកទៅកសាងផ្លូវជាតិលេខ៥ ។
ការលក់អាចម៍ដី ឬលក់ដីក្រួសក្រហមទៅឲ្យ អតីតមេភូមិ មានកិច្ចសន្យាត្រឹមត្រូវរវាងមេភូមិនិងពួកគាត់ដែរដោយសន្យាថា រយៈពេល៥ឆ្នាំក្រោយនៃការលក់អាចម៍ដី នឹងប្រគល់ដីនោះទៅឲ្យប្រជាពលរដ្ឋវិញ ។ ក្រោយមកលោកមេភូមិក៏បានស្លាប់ទៅ ហើយឯកសារលក់-ទិញទាំងនោះ ត្រូវបានលោក មាស អ៊ុល មុនពេលស្លាប់ប្រគល់ទៅឲ្យកូនគាត់ ហើយកូនគាត់ក៏បានប្រគល់ឲ្យពួកគាត់វិញអស់ហើយ។
ប្រជាពលរដ្ឋទាំងនោះបន្តថា នៅមុនពេលបោះឆ្នោតសភាកាលពីកន្លងទៅនេះ លោកមេភូមិថ្មីបានហៅប្រជាពលរដ្ឋទៅផ្ទះរបស់គាត់ ដោយប្រាប់ថា សូមបងប្អូនយកដីនោះរៀងៗខ្លួនវិញចុះហើយបោះបង្គោលព្រំឲ្យបានត្រឹមត្រូវ ចៀសវាងកុំឱ្យឈ្លោះគ្នារឿងព្រំដី ។ ពួកគាត់និយាយថា កាលណោះលោកមេភូមិប្រហែលចង់បានសន្លឹកឆ្នោតពីប្រជាពលរដ្ឋ ទើបនិយាយបែបនេះ ។
ផ្ទុយទៅវិញ ក្រោយពេលបោះឆ្នោតហើយមេភូមិបានប្រកាសតាមមេក្រូថា មិនប្រគល់ដីទាំងនោះឲ្យពួកគាត់វិញទេ ដោយប្រាប់ថាថ្នាក់លើជាអ្នកហាមឃាត់មិនឲ្យប្រគល់ ដោយសុំដកដីនោះជាសម្បត្តិរួមភូមិ ។ ហេតុនេះ ពួកគាត់មានតែសំណូមពរដល់សារព័ត៌មាន សូមមេត្តាជួយចុះផ្សាយពីទុក្ខលំបាករបស់ពួកគាត់ ឲ្យបានដឹងដល់ក្រសួងពាក់ព័ន្ធ អាជ្ញាធរខេត្ត ពិសេសសម្ដេចអគ្គមហាសេនាបតីតេជោ ហ៊ុន សែន សូមមេត្តាជួយពួកគាត់ផង ។
ជុំវិញបញ្ហានេះ លោក យី ភួន មេឃុំស្វាយជ្រំ កន្លងទៅធ្លាប់ប្រាប់ថា គាត់មិនទុកដីនោះធ្វើអីទេ បើថ្នាក់លើសម្រេចប្រគល់ឱ្យប្រជាពលរដ្ឋ លោកប្រគល់ភ្លាម តែបើថ្នាក់លើ ទុកដីនោះជាដីរួម លោកក៏មិនហ៊ានជំទាស់ដែរ ។ ទោះជាយ៉ាងនេះក្តី ដីនៅតំបន់ខាងលើត្រូវបានប្រជាពលរដ្ឋសង្ស័យថា ត្រូវអាជ្ញាធរភូមិឃុំលួចលក់អស់មួយចំនួនទៅឱ្យឈ្មួញទៅហើយ ព្រោះកន្លងទៅ មានដីប្រជាពលរដ្ឋដែលមិនបានលក់អាចម៍ដីទៅឲ្យក្រុមហ៊ុន ម៉ូហិបា ត្រូវបានឈ្មួញទៅដកបង្គោលរបស់គាត់ចេញ ។ លុះពេលពួកគាត់សួរនាំ ត្រូវបានឈ្មួញប្រាប់គ្នាគេថា កុំនិយាយជាមួយមនុស្សថោកទាប ហើយក៏បាននាំគ្នាឡើងឡានចេញទៅ ។
ជុំវិញបញ្ហានេះ មន្ទីរទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច ដែលបានទទួល បណ្តឹង
ពីប្រជាពលរដ្ឋ សូមមេត្តារួសរាន់ទៅជួយដោះស្រាយដីធ្លីជូនពួកគាត់ផង ។ ម្យ៉ាងវិញទៀត មន្ទីរនេះ
ក៏ទទួលបានលិខិតបង្គាប់ការមួយពីរដ្ឋបាលខេត្ត ដែលចុះហត្ថលេខាដោយលោក ឈួរ ច័ន្ទឌឿន
អភិបាលខេត្ត តាំងពីថ្ងៃទី១២ ខែកុម្ភៈ ឆ្នាំ២០១៩ឱ្យចុះទៅពិនិត្យ និងជួយដោះស្រាយជូនប្រជាពល
រដ្ឋ តែមកដល់ពេលនេះរយៈពេលជាង១ខែហើយមិនទាន់ឃើញអង្គភាពពាក់ព័ន្ធដែលមានឈ្មោះ
ក្នុងលិខិតបង្គាប់ការរបស់អភិបាលខេត្ត ចុះទៅជួយដោះស្រាយនៅឡើយ ៕
ចែករំលែកព័តមាននេះ