ខេត្តសៀមរាប ៖ តាមប្រភពពីពលរដ្ឋម្នាក់សូមមិនបញ្ជេញឈ្មោះ ដែលជាអាជីវករលក់ដូរនៅក្នុងផ្សារពោធិ៍លង្កាក៏ដូចជា មន្ត្រីរាជការមួយចំនួនបានឱ្យដឹងថា ក្នុងរយៈពេលចុងក្រោយដែលខេត្តសៀមរាបមានអភិបាលខេត្តចំនួន៣រួចមកនេះ គ្មានឃើញការយកចិត្តទុកដាក់ពីអាជ្ញាធរក្រុងឬមន្ដ្រីពាក់ព័ន្ធ ជាពិសេសអាជ្ញាធរខេត្តដែលបណ្ដោយទុកឱ្យតាមបណ្ដាផ្សារ ផ្ទះសំណាក់ សណ្ឋាគារ និងភោជនីដ្ឋានមួយចំនួននៅតាមដងស្ទឹងសៀមរាបក្នុងក្រុងសៀមរាបដាក់លូរបង្ហូរទឹកស្អុយចូលមកក្នុងស្ទឹងទើបធ្វើឱ្យទឹកស្ទឹងនេះប្រែពណ៌ខៀវស្រងាត់ មកជាខ្មៅងងឹត ថែមទាំងមានក្លិនស្អុយ ជិះម៉ូតូ សឹងមិនចង់កើត បើយើងធ្វើដំណើរតាមដងស្ទឹងសៀមរាបនេះ ។
ជុំវិញករណីខាងលើនោះដែរលោកនួន ពុទ្ធារ៉ា អភិបាលក្រុងសៀមរាបបានប្រាប់នៅវេលាម៉ោង១១និង៤៥នាទីថ្ងៃត្រង់ ត្រូវនឹងថ្ងៃទី៣ ខែមេសា ឆ្នាំ២០១៩នេះថា លោកបានចាត់ឱ្យក្រុមការងារឱ្យចុះពិនិត្យតាមដងស្ទឹងសៀមរាបនោះ មិនមែនមានតែផ្សារមួយទេ គឺមានច្រើនទៀតដូចជា សណ្ឋាគារ ផ្ទះសំណាក់ ភោជនីយដ្ឋាន និងខ្នងផ្ទះជាច្រើនដែលរស់នៅជាប់មាត់ស្ទឹងសៀមរាប ឥឡូវយើងកំពុងសិក្សាចប់វគ្គក្រសួងសាធារណការ និងដឹកជញ្ជូនហើយ ដើម្បីឱ្យខាងក្រសួងជួយសិក្សាប្រព័ន្ធលូទឹកកខ្វក់នៅតាមដងស្ទឹងសៀមរាបនោះ ដូច្នេះយើងកំពុង សិក្សាការអភិវឌ្ឍន៍នេះដែរ ហើយយើងនិងមើលផ្លូវ ដើម្បីបិទបញ្ចៀសវាបណ្តោះអាសន្ន ដើម្បីឱ្យវារុញច្រានទៅប្រព័ន្ធលូរ ហូរទឹកកខ្វក់ផ្សេងទៀត តាមពិតគម្រោងនេះជាគម្រោងទ្រង់ទ្រាយធំទាំងអាជ្ញាធរក្រុង-ខេត្ត ហើយក្រុងខ្លួនឯងមិនអាចធ្វើតែមួយថ្ងៃអត់កើតទេ ។
លោកបានបន្តថា ទាំងអាជ្ញាធរខេត្ត ទាំងក្រសួង បានកំពុងធ្វើលើកិច្ចការងារនេះហើយ អត់មានរង់ចាំការអនុម័តចុងក្រោយ ដើម្បីចាប់ផ្តើម ព្រោះការបង្ហូរទឹកលូកខ្វក់នេះ យើងមិនអាចធ្វើក្នុង១ថ្ងៃហើយទេ ៕
ចែករំលែកព័តមាននេះ