ខេត្តព្រៃវែង ៖ ផ្ទះឈើមួយខ្នងទំហំ៦ម៉ែត្រគុណនឹង១៤ម៉ែត្រប្រក់ក្បឿង បានត្រូវអគ្គិភ័យលេបត្របាក់អស់ទាំងស្រុងក្នុងរយៈពេលតែ២០នាទីប៉ុណ្ណោះ និងធ្វើឲ្យមានការភ្ញាក់ផ្អើលដល់អ្នកស្រុករត់ចែកជើងគ្នារកទឹកមកពន្លត់ ព្រោះខ្លាចរាលឆ្លងដល់ផ្ទះរបស់ខ្លួន ។ ហេតុការណ៍គ្រោះអគ្គិភ័យនេះ កើតឡើងកាលពីវេលាម៉ោង១និង៣០នាទីរសៀលថ្ងៃទី២ខែមេសា នៅភូមិព្រែកធំ ឃុំអ្នកលឿង ស្រុកពាមរក៍ ដែលម្ចាស់ផ្ទះត្រូវបានគេស្គាល់ថាឈ្មោះ តឹក ចាន់ ភេទស្រី អាយុ៧២ឆ្នាំ ជាគ្រូចូលរូប ។
បើតាមស្ត្រីឈ្មោះ អុី សុធី អាយុ៤៩ឆ្នាំ ដែលត្រូវជាកូនស្រីម្ចាស់ផ្ទះបានឲ្យដឹងថា ម្តាយរបស់គាត់គឺជាគ្រូចូលរូប ហើយមានរៀបអាសនៈធំមួយនៅលើផ្ទះ ។ ដោយសារវ័យចាស់ណាស់ទៅហើយ ថ្មីៗនេះគាត់តែងតែឈឺច្រើន រហូតរូបគាត់ជាកូនបានយកម្តាយទៅនៅជាមួយ នៅផ្ទះទល់មុខគ្នាដើម្បីងាយស្រួលមើលថែ ហើយទុកផ្ទះលោកយាយជាម្តាយចោល ។ កូនស្រីរូបនេះនិយាយទៀតថា នៅថ្ងៃកើតហេតុនេះ កូនៗនៅភ្នំពេញបាននាំគ្នាមកស្រុកជួបជុំបងប្អូន និងសែនឆេងម៉េង ហើយនៅវេលាម៉ោង១០ព្រឹក ក្រោយពីសែនផ្នូរដូនតាហើយ កូនៗក៏នាំគ្នាឡើងទៅអុជធូបបន់ស្រន់នៅអាសនៈគ្រូរបស់ម្តាយ ដោយសុំឲ្យគ្រូជួយម្តាយឲ្យជាពីជំងឺ ។
លុះពេលបន់ស្រន់រួច ក៏នាំគ្នាចុះមកផឹកស៊ីជុំបងប្អូននៅក្រោមដើមស្វាយខាងមុខផ្ទះ ដោយភ្លេចមិនបានពន្លត់ទៀននៅមុខអាសនៈគ្រូទេ ។ រហូតដល់ម៉ោងជាង១រសៀល ស្រាប់តែឃើញភ្លើងឆេះចេញពីខាងក្នុងផ្ទះ ធ្វើឲ្យមានការផ្អើលឆោឡោ ខ្លះរត់រកទឹក ខ្លះទូរស័ព្ទទៅនគរបាល ។ ប្រមាណជា១៥នាទីក្រោយមក រថយន្តពន្លត់អគ្គិភ័យក៏មកដល់ប៉ុន្តែយឺតពេលទៅហើយ គឺអណ្តាតភ្លើងបានឆេះផ្ទះអស់ទាំងស្រុង ឯរថ
យន្តពន្លត់អគ្គិភ័យបានត្រឹមបាញ់ទឹកពន្លត់ទប់ស្កាត់មិនឲ្យភ្លើងឆេះរាលដាលដល់ផ្ទះអ្នកជិតខាងប៉ុណ្ណោះ៕
ចែករំលែកព័តមាននេះ