សហរដ្ឋអាមេរិក ៖ ក្នុងការតស៊ូប្រឆាំងអន្តោប្រវេសន៍ខុសច្បាប់ ប្រធានាធិបតីអាមេរិកលោកដូណាល់ត្រាំ លើកជាថ្មីកាលពីថ្ងៃទី២មេសា ការគំរាមរបស់លោកបិទព្រំដែនជាមួយម៉ិកស៊ិកមួយផ្នែកធំ នាប៉ុន្មានថ្ងៃខាងមុខនេះ ទោះមានផលប៉ះពាល់ខ្លាំងដល់សេដ្ឋកិច្ចអាមេរិកក្ដី។ លោកត្រាំបានអំពាវនាវដល់ម៉ិកស៊ិក ឲ្យឃាត់ខ្លួនពួកអន្តោប្រវេសន៍មានប្រភពមកពីអាមេរិកកណ្ដាល…
សហរដ្ឋអាមេរិក ៖ ក្នុងការតស៊ូប្រឆាំងអន្តោប្រវេសន៍ខុសច្បាប់ ប្រធានាធិបតីអាមេរិកលោកដូណាល់ត្រាំ លើកជាថ្មីកាលពីថ្ងៃទី២មេសា ការគំរាមរបស់លោកបិទព្រំដែនជាមួយម៉ិកស៊ិកមួយផ្នែកធំ នាប៉ុន្មានថ្ងៃខាងមុខនេះ ទោះមានផលប៉ះពាល់ខ្លាំងដល់សេដ្ឋកិច្ចអាមេរិកក្ដី។
លោកត្រាំបានអំពាវនាវដល់ម៉ិកស៊ិក ឲ្យឃាត់ខ្លួនពួកអន្តោប្រវេសន៍មានប្រភពមកពីអាមេរិកកណ្ដាល ដែលឆ្លងកាត់ដែនដីខ្លួន និងឲ្យសភាអាមេរិករឹតបន្តឹងច្បាប់អន្តោប្រវេសន៍ បើពុំដូច្នោះទេព្រំដែននឹងត្រូវបិទប្រាកដណាស់១០០%។
លោកបញ្ជាក់ថា ការបិទព្រំដែននឹងអាចផ្ដោតតែលើផ្នែកមួយធំនៃព្រំដែន ហើយពុំមែនបិទទាំងប្រវែង៣២០០គីឡូម៉ែត្រ ដែលបែងចែកសហរដ្ឋអាមេរិកនិងម៉ិកស៊ិកឡើយ។ លោកសន្យាធ្វើការប្រកាសពីការបិទនោះនាប៉ុន្មានថ្ងៃខាងមុខ។
នាថ្ងៃទី៥មេសាលោកត្រាំត្រូវទៅកាន់ព្រំដែននៅCALEXICOរដ្ឋកាលីហ្វ័រនីញ៉ា។ ប្រមុខក្រុមព្រឹទ្ធសមាជិកនៃគណបក្សសាធារណរដ្ឋ លោកMITCH MCCONNELL បានបញ្ចេញភ្លាមៗពីការមិនយល់ស្របរបស់លោក ជាមួយប្រធានាធិបតី។ លោកថាបិទព្រំដែនជាមួយម៉ិកស៊ិកអាចមានផលប៉ះពាល់ខាងសេដ្ឋកិច្ចប្រកបដោយគ្រោះមហន្តរាយ សម្រាប់ប្រទេសយើងហើយខ្ញុំសង្ឃឹមថា យើងនឹងពុំធ្វើបែបនោះឡើយ។
លោកត្រាំទទួលស្គាល់ថា ប្រាកដណាស់នឹងមានផលប៉ះពាល់ដល់សេដ្ឋកិច្ច។ ម៉ិកស៊ិកជាដៃគូពាណិជ្ជកម្មធំមួយ ដែលជាមួយប្រទេសនេះ យើងទើបតែចុះហត្ថលេខាលើកិច្ចព្រមព្រៀងដ៏សំខាន់បំផុតមួយនៃពិភពលោក។ លោកចង់និយាយយោងដល់កិច្ចព្រមព្រៀងថ្មីគឺកិច្ចព្រមព្រៀងអាមេរិក-ម៉ិកស៊ិក-កាណាដាAEUMC ដែលជំនួសកិច្ចព្រមព្រៀងALENA។
ក្នុងពេលជាមួយគ្នានេះដែរទីប្រឹក្សាសេដ្ឋកិច្ចរបស់លោកត្រាំ គឹលោកLARRY KUDLOW ពន្យល់ថា សេតវិមានគ្រោងការជ្រើសរើសជាច្រើន ដើម្បីសម្រាលផលប៉ះពាល់ព្រមការខូតខាតនៃសេដ្ឋកិច្ចអាមេរិក។ លោកថាគេអាចរក្សាទុកខ្សែរថយន្តកាំមីញ៉ុង ដើម្បីរារាំងការកាត់ផ្ដាច់ខ្សែផ្គត់ផ្គង់។ ការបិទព្រំដែនពិតណាស់ផ្ដល់ការលំបាកខ្លាំងសម្រាប់ពលករឆ្លងកាត់ព្រំដែនឬពួកអ្នកទេសចរ។
ម៉ិកស៊ិកជាដៃគូពាណិជ្ជកម្មធំទី២របស់អាមេរិក ដោយការផ្លាស់ប្ដូរគ្នារវាងប្រទេសទាំង២ មានទំហំដល់៦១២ពាន់លានដុល្លារក្នុងឆ្នាំ២០១៨៕
ចែករំលែកព័តមាននេះ