ត្រូវទប់ស្កាត់ទំនិញក្លែងក្លាយលក់ឱ្យភ្ញៀវទេសចរ…ព្រោះ
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានប្រកាសបញ្ជាផង និងជំរុញណែនាំផង ដល់មន្ទីរទេសចរណ៍គ្រប់រាជធានី-ខេត្ត អគ្គាធិការដ្ឋាននៃក្រសួងទេសចរណ៍ (ផ្នែក អធិការកិច្ច) ក្រសួង-ស្ថាប័ន វិស័យឯកជន និងផ្នែកពាក់ព័ន្ធទាំងអស់ ត្រូវចូលរួមទប់ស្កាត់ផលិតផលក្លែងក្លាយដែលលក់ជូនភ្ញៀវទេសចរ ពីព្រោះបញ្ហានេះធ្វើឱ្យខូចនូវភាពជឿជាក់ពីសំណាក់ភ្ញៀវទេសចរ ។
ការណែនាំយ៉ាងម៉ឺងម៉ាត់នេះ គឺក្នុងឱកាសបើកសន្និបាតបូកសរុបការងារឆ្នាំ២០១៨ និងលើកទិសដៅបន្តឆ្នាំ២០១៩ នៅទីស្ដីការក្រសួងទេសចរណ៍ កាលពីថ្ងៃទី២ ខែមេសា ។ លោករដ្ឋមន្ត្រីបានលើកឡើងថា «ធ្លាប់មានករណីភ្ញៀវទេសចរទិញទំនិញពីកម្ពុជាក្រោយមកក៏ដឹងថា ជាទំនិញក្លែងក្លាយ ហើយពួកគេបានប្ដឹងទៅអង្គភាពប្រឆាំងអំពើពុករលួយ(ACU) ហើយACUបានដាក់លិខិតមកក្រសួងទេសចរណ៍»។
នេះជាបញ្ហាសំខាន់មួយ ដែលលោករដ្ឋមន្ត្រី តែងតែដាស់តឿនជំរុញជារឿយៗដល់គ្រប់ភាគីពាក់ព័ន្ធ ហើយលោកបានដាក់បញ្ជាយ៉ាងម៉ឺង ម៉ាត់សាជាថ្មីឡើងវិញ ដល់អគ្គាធិការដ្ឋាននៃក្រសួងទេសចរណ៍ ដែលមានលោក ប្រាក់ ច័ន្ទ តារា ជាអគ្គាធិការ ត្រូវរួមគ្នាជាមួយមន្ទីរទេស ចរណ៍គ្រប់រាជធានី-ខេត្ត ចុះធ្វើអធិការកិច្ចលើមូលដ្ឋានអាជីវកម្មសេវាកម្មទេសចរណ៍នានា ដើម្បីទប់ស្កាត់ និងលុបបំបាត់បញ្ហាដ៏អាក្រក់នេះ ។
លោករដ្ឋមន្ត្រី ក៏បានទទូចដល់ភាគីពាក់ព័ន្ធផងដែរ សូមចូលរួមយកចិត្តទុកដាក់ចំពោះបញ្ហានេះ ពិសេសលោកបានស្នើដល់ក្រសួងពាណិជ្ជកម្ម បើរកឃើញមូលដ្ឋានអាជីវកម្មណាលក់របស់របរក្លែងក្លាយជូនភ្ញៀវទេសចរ សូមមេត្តាចាត់ការតាមនីតិវិធីច្បាប់ភ្លាមៗ ។
លោករដ្ឋមន្ត្រីបានបញ្ជាក់ទៀតថា គ្រប់ភាគីពាក់ព័ន្ធទាំងអស់ត្រូវចូលរួមធ្វើយ៉ាងណាធានាថា គ្រប់គោលដៅទេសចរណ៍របស់កម្ពុជា មានការទទួលបដិសណ្ឋារកិច្ចល្អប្រសើរជូនភ្ញៀវទេសចរ គ្មានការក្លែងបន្លំដូចករណីដែលបានកើតឡើងស្របតាមការកំណត់របស់រាជរដ្ឋាភិបាលថា «កម្ពុជា៖ ព្រះរាជាណាចក្រអច្ឆរិយ ផ្ដល់ភាពកក់ក្ដៅ»៕
ចែករំលែកព័តមាននេះ