ជាមួយនឹងបណ្តឹងពីមេធាវីសម្តេចតេជោ ប្រឆាំងនឹងលោកផែង វណ្ណៈ ក្រៅពីអង្គភាពព័ត៌មាន Fresh News ដែលប្តឹងពីបទបរិហារកេរ្តិ៍ជាសាធារណៈ ដោយទារសំណងជំងឺចិត្ត៥០មឺុនដុល្លារ លោក ខាន់ សុវណ្ណ ដែលគេស្គាល់ថា អ្នកប្រើប្រាស់បណ្ដាញសង្គមម្នាក់ ដែលមានជម្លោះជាមួយលោកផែង វណ្ណៈ យូរមកហើយនេះ នៅរសៀលថ្ងៃទី២ ខែមេសា ឆ្នាំ២០១៩នេះ បានដាក់ពាក្យបណ្ដឹងចូលសាលាដំបូងរាជធានីភ្នំពេញ ដើម្បីប្ដឹងលោក ផែង វណ្ណៈ និងបក្ខពួកចំនួន៥បទល្មើស ព្រមទាំងទាមទារសំណងនៃការខូចខាត និងជំងឺចិត្ត រហូតជាង១លានដុល្លារអាមេរិក ។
យោងតាមពាក្យបណ្ដឹងដែលអង្គភាព Fresh News បានផ្សាយនៅរសៀលថ្ងៃដដែលនេះ លោក ខាន់ សុវណ្ណៈ បានប្ដឹងលោក ផែង វណ្ណៈ និងបក្ខពួកចំនួន៥បទល្មើសរួមមាន៖
ទី១៖ហិង្សាដោយចេតនា ដោយមានស្ថានទម្ងន់ទោស,
ទី២៖ គំរាមកំហែងថានឹងសម្លាប់ ដោយមានស្ថានទម្ងន់ទោស,
ទី៣៖បរិហាកេរ្ដិ៍ជាសាធារណៈ,
ទី៤៖ ជេរប្រមាថជាសាធារណៈ
និងទី៥៖ ការគំរាមកំហែងកេរ្ដិ៍ ។
លោក ខាន់ សុវណ្ណ ក៏បានស្នើសុំឲ្យតុលាការផ្ដន្ទាទោសលោក ផែង វណ្ណៈ ទៅតាមផ្លូវច្បាប់ ហើយទាមទារសំណងការខូចខាតចំនួន១លានដុល្លារ និងសំណងជំងឺចិត្តចំនួន២០ម៉ឺនដុល្លារ និងការខាតបង់ពេលវេលា សេវាកម្មច្បាប់១ម៉ឺនដុល្លារ ។ ស្របពេលជាមួយគ្នានេះដែរ នៅអង្គភាពប្រឆាំងអំពើពុករលួយឯណោះវិញ បន្ទាប់ពីស្តាប់ការស្រាយបំភ្លឺរបស់លោក ពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្តល់យោបល់ និងជាប្រធានគណបក្សយុវជនកម្ពុជា នៅព្រឹកថ្ងៃទី២ មេសា លោកទេសរដ្ឋមន្ត្រី ឱម យុិនទៀងប្រធានអង្គភាពប្រឆាំងអំពើពុករលួយ (ACU) បានទទួលយកពាក្យបណ្តឹងរបស់ លោកពេជ្រ ស្រស់ ព្រមទាំងសន្យាបន្តស្រាវជ្រាវលើករណីប្តឹង លោក ផែង វណ្ណៈ។ នេះបើតាមលិខិតរបស់ លោកទេសរដ្ឋមន្ត្រី ឱម យ៉ិនទៀង ផ្ញើជូនលោកពេជ្រ ស្រស់ ។
លិខិតរបស់ លោកទេសរដ្ឋមន្ត្រី ឱម យ៉ិនទៀងផ្ញើទៅកាន់ លោក ពេជ្រ ស្រស់ បានបញ្ជាក់ថា «តាម
ស្មារតីអង្គប្រជុំវិភាគពាក្យប្តឹងពេលព្រឹក ថ្ងៃអង្គារ ទី២ ខែមេសា ឆ្នាំ២០១៩ ដែលឯកឧត្តម និងសហការី ឯកឧត្តម បានចូលរួមស្តាប់ និងការពារពាក្យប្តឹងរបស់ខ្លួនដែរនោះ អង្គភាពប្រឆាំងអំពើពុករលួយយល់ឃើញថា ឯកឧត្តម មានកង្វល់យ៉ាងខ្លាំង ពីភាពតំណាងរបស់លោក ផែង វណ្ណៈ ក្នុងករណីការស្លាប់បាត់បង់ជីវិតរបស់ កញ្ញានិស្សិត ឌុំ រីដា ហើយផលបច្ច័យនៃអំពើនោះអាចមានអ្វីកើតឡើង ដូចម្តេចខ្លះទៀត ដែលតាមឯកឧត្តមបានសង្ស័យលើចំណុចខ្លះៗដោយមានមូលដ្ឋានមួយចំនួន ។
លើមូលដ្ឋាននេះ ពិតមែនតែ អង្គភាពប្រឆាំងអំពើពុករលួយ មិនមានមូលដ្ឋានសមល្មម ឲ្យបើកការស៊ើបអង្កេតលើករណីនេះ ក៏អង្គភាពប្រឆាំងអំពើពុករលួយ សម្រេចបើកការស្រាវជ្រាវប្រមូលពត៌មានបន្ថែមទៀតសិន មុននឹងបន្តនីតិវិធីបើក ឬមិនបើកការស៊ើបអង្កេត» ៕
ចែករំលែកព័តមាននេះ