ភាគច្រើននៃពួកយើងប្រហែលជាមិនធ្លាប់ដឹងទេថា ការទទួលទានអាហារអាចជះឥទ្ធិពលដល់សុខភាពធ្មេញ ។ ដូច្នេះហើយទើបអ្នកអាចរក្សាសុខភាពធ្មេញល្អរឹងមាំបានតាមរយៈការជ្រើសរើសអាហារត្រឹមត្រូវដើម្បីទទួលទាន ។ ប៉ុន្តែថាតើអាហារអ្វីខ្លះទៅដែលល្អសម្រាប់ធ្មេញ ? អាហារដែលជួយរក្សាសុខភាពអញ្ចាញ និងធ្មេញ ក៏ដូចជាទប់ស្កាត់ជំងឺអញ្ចាញ រួមទាំងជំងឺពុកធ្មេញផងដែរ ៖
១. ទឹក ៖ ទឹកមាត់ត្រូវបានបង្កើតឡើងពីទឹកប្រមាណជា៩៩,៥ភាគរយឯណោះ ។ កង្វះជាតិទឹកក្នុងរាងកាយអាចបណ្ដាលឲ្យទឹកមាត់ខាប់ ជាលទ្ធផលនៃបញ្ហា ផ្សេងៗក្នុងមាត់ ។ ទឹកមាត់មានតួនាទីយ៉ាងសំខាន់ជួយក្នុងការបំបែកអាហារ ទប់ស្កាត់ជំងឺពុកធ្មេញ បន្សាបជាតិអាស៊ីត បាក់តេរីដែលបង្កើតបញ្ហាក្លិនខ្យល់ដង្ហើមមិនល្អ ។ បើទោះជាការទទួលទានទឹកមិនល្អខ្លាំងដូចការដុសធ្មេញ ប៉ុន្តែវានៅតែជួយកាត់បន្ថយកំណកកំបោរ រួមទាំងកម្ទេចកំទីអាហារជាប់ធ្មេញបានយ៉ាងប្រសើរផងដែរ។ ការខ្ពុរមាត់ជាមួយទឹកធម្មតា ក្រោយទទួលទានអាហារពណ៌ ឬកាហ្វេអាចជួយកាត់បន្ថយស្នាមប្រឡាក់ជាប់ធ្មេញ។
២. យ៉ាអួរ ៖ ជាប្រភពដ៏ប្រសើរនៃជាតិប្រូតេអ៊ីន និងកាល់ស្យូមដែលល្អសម្រាប់រក្សាសុខភាពធ្មេញរឹងមាំ ។ បាក់តេរី ល្អៗ ឬប្រូបាយអូទិកដែលមាននៅក្នុងយ៉ាអួរក៏ល្អចំពោះសុខភាពអញ្ចាញគួរឲ្យកត់សម្គាល់ផងដែរ ។ ទោះជាយ៉ាងណា ត្រូវជ្រើសរើសទទួលទានយ៉ាអួរសុទ្ធមិនបន្ថែមស្ករទើបប្រសើរ ។
៣.បន្លែបៃតង ៖ មានផ្ទុកសម្បូរទៅដោយជាតិរ៉ែ និងវីតាមីនដែលមិនត្រឹមតែល្អសម្រាប់ធ្មេញ និងអញ្ចាញប៉ុណ្ណោះទេ ប៉ុន្តែគឺចំពោះសុខភាពរាងកាយទាំងមូល ។ ក្រៅពីកាល់ស្យូម បន្លែបៃតងក៏ជាប្រភពវីតាមីន B ដែលមានប្រសិទ្ធភាពព្យាបាលជំងឺអញ្ចាញធ្មេញនៃស្ត្រីមានផ្ទៃពោះបានយ៉ាងប្រសើរផងដែរ។
៤. ផ្លែក្រូច ៖ វីតាមីន C នៃផ្លែក្រូចជួយពង្រឹងជាលិកាភ្ជាប់ និងសរសៃឈាម ព្រមទាំងពន្យឺតការរីករាលដាលនៃជំងឺអញ្ចាញធ្មេញដោយការបន្ថយការរលាក ។ បន្ថែមផ្លែក្រូចក្នុងរបបអាហារប្រចាំថ្ងៃរបស់អ្នក ដើម្បីទទួលបានធ្មេញ និងអញ្ចាញដែលមានសុខភាពល ្អ។ ទោះជាយ៉ាងណា ក្រោយទទួលទានផ្លែឈើនេះរួច ត្រូវរង់ចាំយ៉ាងហោចណាស់៣០នាទីសិន សឹមដុសសម្អាតធ្មេញ ។
៥. តែបៃតង និងតែខ្មៅ ៖ មានផ្ទុកសម្បូរទៅដោយសមាសធាតុ polyphenols ជួយកម្ចាត់ និងពន្យឺតការរីកលូតលាស់នៃបាក់តេរីដែលបង្កបញ្ហាជំងឺអញ្ចាញធ្មេញ និងជំងឺពុកធ្មេញ ។
៦. ការ៉ុត ៖ ការ៉ុតឆៅហាក់ដូចជាថ្នាំដុសធ្មេញធម្មជាតិមួយ ។ ចលនានៃការទំពាការ៉ុតជួយម៉ាស្សាអញ្ចាញ កម្ចាត់កំណកកំបោរ និងស្នាមប្រឡាក់ ផ្សេងៗដែលជាប់ធ្មេញបានយ៉ាងប្រសើរ។ វីតាមីន A នៃការ៉ុតក៏មានប្រសិទ្ធភាពខ្ពស់ជួយក្នុងការពង្រឹងកាចាធ្មេញផងដែរ(ប្រភពពី៖ Health.com.kh) ៕
ចែករំលែកព័តមាននេះ