លោកគង់ គាំ ចំអកទៅកាន់លោកសម រង្ស៊ី ថា មេដឹកនាំមិនដែលឈ្នះតែតាំងខ្លួនជាប្រជាធិបតេយ្យ
- ភ្នំពេញ
រាជធានីភ្នំពេញ ៖ អតីតឧត្តមទីប្រឹក្សាគណបក្សសង្គ្រោះជាតិលោក គង់ គាំ បានបន្តចំអកទៅកាន់លោកសម រង្ស៊ី ជាថ្មីថា ជាមេដឹកនាំមិនដែលឈ្នះលើកសង្វៀនប្រកួតប្រជែងការបោះឆ្នោត តែបែរមកតាំងខ្លួនជាអ្នកប្រជាធិបតេយ្យ និងជាកម្លាំងមិនខ្វះបានទៅវិញ ។ ការលើកឡើងរបស់អតីតមន្ត្រីជាន់ខ្ពស់គណបក្សប្រឆាំងនេះ បន្ទាប់ពីលោកសម រង្ស៊ី បានប្រកាសថាខ្លួនជាអ្នកប្រជាធិបតេយ្យពីក្រៅប្រទេសមិនដាច់ពីមាត់ ពិសេសនោះអតីតមេបក្សប្រឆាំងនេះក៏បានអះអាងថា រូបលោក និងលោក កឹម សុខា ជាមនុស្សតែមួយ ហើយជាប្រជាធិបតេយ្យ។
លោកគង់ គាំ បច្ចុប្បន្នជាប្រធានកិត្តសយគណបក្សឆន្ទះខ្មែរបានលើកឡើងលើបណ្តាញសង្គមផ្ទាល់ខ្លួនដោយប្រៀបធៀបការបោះឆ្នោតនៅក្នុងប្រទេសថៃជាមួយការបោះឆ្នោតនៅកម្ពុជា យ៉ាងដូច្នេះថា ការបោះឆ្នោតដំបូងក្រោយរដ្ឋប្រហារយោធានៅថៃ ថាក់ស៊ីន ដែលធ្លាប់ឈ្នះឆ្នោតកាន់តំណែង និងជានាយករដ្ឋមន្ត្រីបន្តបន្ទាប់មិនហៅគណបក្សនយោបាយចូលរួមការបោះឆ្នោតទាំងឡាយថា លំអរអំណាចយោធា និងមិនអំពាវនាវឲ្យប្រជាពលរដ្ឋថៃដេកផ្ទះដើម្បីទុកឲ្យអំណាចផ្តាច់ការយោធានិយមថៃឈ្នះស្អាតដូចមេដឹកនាំនយោបាយខ្មែរដែលមិនទាន់ឈ្នះកាន់អំណាចសោះ (សម រង្ស៊ី) តែតាំងខ្លួនជាកម្លាំងប្រជាធិបតេយ្យមិនអាចខ្វះបាន ហើយទុកអ្នកដ៏ទៃ និងម្ចាស់ឆ្នោតថា ក្បត់ខ្លួន បើមិនរត់ចោលស្រុករត់ចោលផ្ទះ និងងើបយក អំណាចពីអ្នក (ឈ្នះឆ្នោត) សម្រាប់ខ្លួន និងក្រុមខ្លួន ។
ជាមួយគ្នានោះដែរលោក គង់ គាំ ក៏បានលើកឡើងថា គណបក្សឆន្ទៈខ្មែរដែលមានមេដឹកនាំ និងក្រុមអ្នកនយោបាយវ័យក្មេង ហើយជាប៉ូលថ្មីមួយ និងមានរូបសញ្ញាព្រះអាទិត្យថ្មី និងជាឱកាសថ្មីសម្រាប់អតីតសមាជិកគណបក្សប្រឆាំងរបស់មេដឹកនាំដ៏មហន្តរាយជាជម្រើសថ្មី ។ លោកបន្ថែមថា សម្រាប់ប្រជាពលរដ្ឋដែលប្រាថ្នាឲ្យមានការផ្លាស់ប្តូរថ្មីជាវិជ្ជមាននៅកម្ពុជា ពិតជាមិនបោះបង់ឱកាសបន្តជីវិត និងជម្រុញចរន្តប្រជាធិបតេយ្យតាមមធ្យោបាយស្របច្បាប់ តាមរយៈការចូលរួមការបោះឆ្នោតដោយគោរពស្មារតីកិច្ចព្រមព្រៀងទីក្រុងប៉ារីសឆ្នាំ១៩៩១ និងស្មារតីរដ្ឋធម្មនុញ្ញព្រះរាជាណាចក្រកម្ពុជា ឆ្នាំ១៩៩៣ ឲ្យមាននិរន្តរភាពក្នុងបរិយាកាសសន្តិភាព ស្ថេរភាព អភិវឌ្ឃ ចេរភាព យ៉ាងខ្ជាប់ខ្ជួនជាចាំបាច់នោះឡើយ ។
អតីតមន្ត្រីជាន់ខ្ពស់បក្សប្រឆាំងរូបនេះក៏បានលើកឡើងទៀតថា គណបក្សឆន្ទៈខ្មែរសង្ឃឹមថាសមាជិកក្រុមប្រឹក្សាពីគណបក្សនយោបាយផ្សេងៗជាអង្គបោះឆ្នោតនឹងប្រើប្រាស់សេរីភាពរបស់ខ្លួនជួយបោះឆ្នោតគាំទ្របេក្ខជនគណបក្សឆន្ទៈខ្មែរដែលឈរឈ្មោះក្នុងការបោះឆ្នោតក្រុមប្រឹក្សារាជធានីខេត្តក្រុងស្រុក ខណ្ឌនៅឆ្នាំ២០១៩នេះ ដើម្បីបញ្ជាក់ពីលំហរប្រជាធិបតេយ្យសេរីពហុបក្សនៅថ្នាក់ក្រោមជាតិ និងនៅថ្នាក់ជាតិមិនអាចសាបសូន្យពីកម្ពុជាឡើយ ៕
ចែករំលែកព័តមាននេះ