រាជធានីភ្នំពេញ ៖ សេចក្តីរាយការណ៍បន្តឱ្យដឹងថា លោកផែង វណ្ណៈ ត្រូវសមត្ថកិច្ចកងរាជអាវុធហត្ថលើផ្ទៃប្រទេស នាំខ្លួនមកសាលាដំបូងនៅវេលាម៉ោង០៨ និង១៥នាទីព្រឹកថ្ងៃទី០៣ មេសា នេះ ដើម្បីបន្តការសាកសួរទៀត ។
គួររំលឹកថា ចៅក្រមសើុបសួរសាលាដំបូងរាជធានីភ្នំពេញ កាលពីល្ងាចថ្ងៃទី២ មេសា បានផ្ញើលោកផែង វណ្ណៈ អ្នកលេងហ្វេសប៊ុកល្បីឈ្មោះម្នាក់ដល់សមត្ថកិច្ចកងរាជអាវុធហត្ថ និងបន្តការសាកសួរនៅថ្ងៃនេះទៀត (៣ មេសា) ។
លោក ផែង វណ្ណៈ ត្រូវបានកម្លាំងសមត្ថកិច្ចកងរាជអាវុធហត្ថលើផ្ទៃប្រទេស ដឹកតាមរថយន្តទំនើប១គ្រឿង និងមានរថយន្តបំពាក់ដោយសារ៉ែន២គ្រឿង ម៉ូតូអម៣ទៅ៤គ្រឿង អមដំណើរ នាំទៅកាន់សាលាដំបូងរាជធានីដែលមានក្រុមអ្នកសារព័ត៌មានរាប់សិបនាក់ រង់ចាំមុនរួចទៅហើយនោះ ។
រថយន្តត្រូវបានចតនៅខាងក្រៅបរិវេណតុលាការ ពោលគឺឈប់មុខច្រកទ្វាររបងសាលាដំបូងបានដាក់លោក ផែង វណ្ណៈ ឲ្យចុះដើរចូលធម្មតា ។ ទោះបីរងបទចោទលើពាក្យបណ្តឹងព្រហ្មទណ្ឌយ៉ាងនេះក្តី កម្លាំងកងរាជអាវុធហត្ថ មិនបានដាក់ខ្នោះដៃដូចជនសង្ស័យផ្សេងទៀតនោះទេ ហើយលោកបានដើរញញឹម លើកដៃស្វាគមន៍ដល់អ្នកថតរូបគ្រប់គ្នា ហាក់ដូចគ្មានការព្រួយបារម្ភ នូវអ្វីដែលកើតឡើងចំពោះមុខឡើយ។
សំណុំរឿងលោក ផែង វណ្ណៈ បានស្ថិតនៅក្នុងដៃលោក ប៊ុន វង្សវិសុទ្ធ ព្រះរាជអាជ្ញារងធ្វើការសាកសួរ ។ តាមពិតសំណុំរឿងនេះត្រូវព្រះរាជអាជ្ញារងលោក អ៊ុំ សុភក្តី ជាអ្នកកាន់ទេ ប៉ុន្តែដោយលោកជាប់រវល់ ក៏បានផ្ទេរទៅលោក ប៊ុន វង្សវិសុទ្ធ សាកសួរជំនួសវិញ ។
ព័ត៌មានបន្ថែមនឹងមានផ្សាយជូនបន្តទៀត ។
ចែករំលែកព័តមាននេះ