កម្ពុជា-ថៃ គឺជាប្រទេសជិតខាងដែលមានទំនាក់ទំនង និងកិច្ចសហប្រតិបត្តិការល្អ
- ភ្នំពេញ
រាជធានីភ្នំពេញ ៖ មេបញ្ជាការកងទ័ពជើងគោកនៃព្រះរាជាណាចក្រកម្ពុជាជួបសំដែងការគួរសម និងពិភាក្សាការងារជាមួយឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃឡង់ នាព្រឹកថ្ងៃទី០១ ខែមេសា ឆ្នាំ២០១៩ នៅក្រសួងការពារជាតិព្រះរាជាណាចក្រថៃឡង់ ឧត្តមសេនីយ៍ឯក ហ៊ុន ម៉ាណែត បានជួបសំដែងការគួរសមជាមួយឯកឧត្តម នាយឧត្តមសេនីយ៍ ប្រាវីត វង្សសុវ៉ាន់( Prawit Wongsuwan) ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃឡង់ ។
រដ្ឋមន្ត្រីក្រសួងការពារជាតិនៃព្រះរាជាណាចក្រថៃឡង់បានស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូកងទ័ពជើងគោកកម្ពុជា ។ ឆ្លៀតក្នុងឱកាសនោះឯកឧត្តមបានសម្តែងការអបអរសាទរចំពោះ ឯកឧត្តម ហ៊ុន ម៉ាណែត ដែលបានទទួលតំណែងជាអគ្គមេបញ្ជាការរង និងជាមេបញ្ជាការកងទ័ពជើងគោក ។ ឯកឧត្តមរដ្ឋមន្ត្រីបានលើកឡើងថា ប្រទេសយើងទាំងពីរកម្ពុជា-ថៃ គឺជាប្រទេសជិតខាងដែលមានទំនាក់ទំនង និងកិច្ចសហប្រតិបត្តិការល្អ ហើយឯកឧត្តមបានចាត់ទុកជំនួប និងដំណើរទស្សនកិច្ចនេះនឹងរួមចំណែកយ៉ាងសំខាន់ក្នុងការពង្រឹង និងពង្រីកទំនាក់ទំនង និងបង្កើនកិច្ចសហប្រតិបត្តិការល្អនៃប្រទេសទាំងពីរកម្ពុជា-ថៃ និងធ្វើយ៉ាងណារក្សាឲ្យបានព្រំដែនសន្តិភាព មិត្តភាពសហប្រតិបត្តិការ និងអភិវឌ្ឍតាមតំបន់ព្រំដែនឱ្យកាន់តែមានការរីកចម្រើនថែមទៀត ។
ឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម ប្រាវីត វង្សសុវ៉ាន់ ( Prawit Wongsuwan) ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃឡង់ ដែលបានអនុញ្ញាតគណៈប្រតិភូកម្ពុជា ជួបសំដែងការគួរសម និងពិភាក្សាការងារ ។ មេបញ្ជាការកងទ័ពជើងគោកកម្ពុជាបានបញ្ជាក់ថា ការជួបសំដែងការគួរសម និងពិភាក្សាការងារនៅពេលនេះ គឺបានបង្ហាញពីការពង្រឹងពង្រីកការរឹតចំណងសាមគ្គីភាព និងមិត្តភាពជាប្រពៃណីរវាងរាជរដ្ឋាភិបាលកងទ័ព និងប្រជាជនប្រទេសទាំងពីរ កម្ពុជា-ថៃ និងដើម្បីរួមគ្នាក្នុងថែរក្សាបានព្រំដែនសន្តិភាពមិត្តភាព កិច្ចសហប្រតិបត្តិការ និងការអភិវឌ្ឍ ៕
ចែករំលែកព័តមាននេះ