រោងចក្រផលិតទឹកស្អាតតម្លៃប្រមាណ៣០លានដុល្លារ ដាក់សម្ពោធហើយ ខណៈការសិក្សាផែនការអភិវឌ្ឍន៍បណ្តាញលូប្រមូលទឹកកខ្វក់ក្រុងសៀមរាបត្រូវបានបញ្ចប់
- ភ្នំពេញ
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន នាយករដ្ឋមន្ដ្រី កម្ពុជាបានប្រកាសឲ្យដឹងថា រូបសម្តេច នឹងសម្ពោធដាក់ឱ្យដំណើរការជាផ្លូវការនូវរោងចក្រផលិតទឹកស្អាតនៅខេត្តកំពត ដែលមានតម្លៃប្រមាណ៣០លានដុល្លារក៏នៅថ្ងៃទី២ ខែមេសា នេះ ក្នុងនោះក៏នឹងមានវត្តមានឯកអគ្គរាជទូតជប៉ុនប្រចាំនៅកម្ពុជា ។
រោងចក្រផលិតទឹកស្អាតនៅខេត្តកំពត ត្រូវបានសាងសង់កាលពីអំឡុង ឆ្នាំ ២០១៨កន្លងមកនេះ ជាជំនួយឥតសំណងទំហំ ៣២៨៤លានយ៉េនរបស់រាជរដ្ឋាភិបាលជប៉ុន ដែលមានតម្លៃជិត ២៧លានដុល្លារ ដើម្បីផលិតទឹកស្អាតនៅក្នុងខេត្តកំពត និងការបណ្តុះបណ្តាលធនធានមនុស្ស ជាពិសេសដើម្បីកាត់បន្ថយបញ្ហានៃកង្វះទឹកស្អាតប្រើប្រាស់នៅក្នុងខេត្តមាត់សមុទ្រមួយនេះ ។ សូមបញ្ជាក់ថា ប្រទេសជប៉ុនបាននាំមុខគេក្នុងចំណោមដៃគូអភិវឌ្ឍន៍ ដែលជួយកម្ពុជាក្នុងវិស័យទឹកស្អាតតាំងដើមទស្សវត្ស១៩៩០ ។ ការរៀបចំប្រព័ន្ធផ្គត់ផ្គង់ទឹកស្អាតនៅក្នុងរាជធានីភ្នំពេញ នៅខេត្តសៀមរាប នៅកំពង់ចាម និងបច្ចុប្បន្នក្នុងខេត្តកំពត សុទ្ធតែបានប្រើប្រាស់ជំនួយរបស់ជប៉ុន។ រាជរដ្ឋាភិបាលកម្ពុជាបាននឹងកំពុងយកចិត្តទុកដាក់ក្នុងការអភិវឌ្ឍវិស័យផ្គត់ផ្គង់ទឹកស្អាត ហើយជាផែនការយុទ្ធសាស្ត្រជាតិបានកំណត់យកឆ្នាំ២០២៥ ប្រជាជនកម្ពុជានឹងទទួលបានទឹកស្អាតប្រើប្រាស់១០០%។
ថ្មីៗនេះផងដែរ ពិធីចុះហត្ថលេខាលើកិច្ច ព្រមព្រៀងក្របខ័ណ្ឌស្ដីពីការចាប់ផ្តើមគម្រោងពង្រីកការផ្គត់ផ្គង់ទឹកស្អាតនៅខេត្តកំពង់ធំក្រោមជំនួយឥតសំណងរបស់ប្រទេសជប៉ុនត្រូវបានរៀបចំធ្វើឡើងនៅថ្ងៃទី 26 ខែមីនា។ កិច្ចព្រមព្រៀងនេះត្រូវបានចុះហត្ថលេខាដោយឯកឧត្តម ចមប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងឧស្សាហកម្មនិងសិប្បកម្ម និងលោកអារ៉ាកាវ៉ា ណូរីយូគី ប្រធាននិងជាអ្នកតំណាងក្រុមហ៊ុន Kubota Construction Co., Ltd.។ យើងជឿជាក់ថាគម្រោងនេះនឹងរួមចំណែកធ្វើឱ្យប្រសើរឡើងនូវគុណភាពជីវិតរស់នៅរបស់ប្រជាជននៅក្រុងកំពង់ធំ។
យ៉ាងណាមិញនៅសាលាខេត្តសៀមរាប មានការរៀបចំកិច្ចប្រជុំពិភាក្សានិងពិគ្រោះ យោបល់លើកចុងក្រោយលើ “ផែនការ អភិវឌ្ឍន៍ បណ្តាញលូប្រមូលទឹកកខ្វក់ក្រុងសៀមរាប ខេត្តសៀមរាប” ដឹកនាំកិច្ចប្រជុំដោយ ហេង រត្នពិសិដ្ឋ អគ្គនាយកសាធារណការ ជាមួយ មន្ទីរ-អង្គភាពពាក់ព័ន្ធ រដ្ឋាបាលក្រុង/សង្កាត់ ធនាគារពិភពលោក អង្គការកិច្ចផ្តួចផ្តើមអភិវឌ្ឍន៍ទីក្រុងសម្រាប់ ទ្វីបអាស៊ី (CIDA) ក្រុមហ៊ុនទីប្រឹក្សា បច្ចេកទេស Suez កាលពីថ្ងៃ ទី២៩ ខែមីនា ឆ្នាំ២០១៩ កិច្ចប្រជុំនេះជាកិច្ចប្រជុំលើកទី៣ ហើយក៏ជាកិច្ចប្រជុំចុងក្រោយនៃការសិក្សាផែនការអភិវឌ្ឍន៍បណ្តាញលូប្រមូលទឹកកខ្វក់ក្រុងសៀមរាប ខេត្តសៀមរាប ដែលបានសិក្សាដោយក្រុមហ៊ុនទីប្រឹក្សាបច្ចេកទេស Suez ក្រោមការផ្តល់ហិរញ្ញប្បទានពីអង្គការកិច្ចផ្តួចផ្តើមអភិវឌ្ឍន៍ទីក្រុងសម្រាប់ទ្វីបអាស៊ី (CIDA) ដោយទទួលបានការសហការយ៉ាងជិតស្និតពីនាយកដ្ឋានសំណង់ប្រព័ន្ធចម្រោះទឹកកខ្វក់ និងមន្ទីរសាធារណការ និងដឹកជញ្ជូនខេត្តសៀមរាប ប្រើរយៈសិក្សា និងរៀបចំឯកសារដេញថ្លៃ និងសិក្សាប្លង់លម្អិតប្រមាណ ៩ខែ។
សូមបញ្ជាក់ជូនផងដែរថា គម្រោងនេះ បានទទួលនូវការឯកភាពផ្តល់ជាកម្ចីពីក្រុម ប្រឹក្សាភិបាលធនាគារពិភពលោក ក្រោមគម្រោងការលើកកម្ពស់ការផ្គត់ផ្គង់ទឹកស្អាត និងអនាម័យ សរុបចំនួន ៥៧,៥ លានដុល្លាអាមេរិច កាលពីថ្ងៃទី២៨ ខែមីនា ឆ្នាំ២១០៩ បន្ទាប់ពីចរចារដោយជោគជ័យកាលពីថ្ងៃទី២០ ខែកុម្ភៈ ឆ្នាំ២០១៩ ដោយក្នុងនោះថវិកាចំនួន ២,៥ លានដុល្លាអាមេរិក ជាថវិកាបដិភាគរបស់រាជរដ្ឋាភិបាលកម្ពុជា។
គម្រោងនោះចែកចេញជាពីរសមាសភាគ ដោយសមាសភាគទី១ ពាក់ព័ន្ធនឹងវិស័យទឹកស្អាត អនុវត្តន៍ដោយ ក្រសួងឧស្សាហកម្ម និងសិប្បកម្ម និងសមាសភាគទី២ ពាក់ព័ន្ធនឹងវិស័យអនាម័យ អនុវត្តន៍ដោយក្រសួងសាធារណការ និងដឹកជញ្ជូន ក្នុងទំហំទឹកប្រាក់ប្រមាណ ២៥,៥ លានដុល្លាអាមេរិច ក្នុងរយៈពេល ៥ឆ្នាំ គិតចាប់ពីឆ្នាំ២០១៩ ដល់ឆ្នាំ២០២៤ សម្រាប់ការចំណាយលើការសាងសង់បណ្តាញលូខ្នែង និងខ្នែងរងក្នុងតំបន់ខាងលិច និងខាងកើតក្រុងសៀមរាប ការកែលម្អស្ថានីយបូមដែលមានស្រាប់ទាំងបីទីតាំង ការកែលម្អស្ថានីយប្រព្រឹត្តកម្មទឹកកខ្វក់ ការកសាងសមត្ថភាពមន្ត្រី ការរៀបចំផែនការតភ្ជាប់បណ្តាញលូ និងការងារពាក់ព័ន្ធមួយចំនួន។
ក្រសួងសាធារណការ និងដឹកជញ្ជូន នឹងខិតខំធ្វើយ៉ាងណាពង្រីកសមត្ថភាពស្ថានីយប្រព្រឹត្តកម្មទឹកកខ្វក់ ដើម្បីពង្រីកតំបន់សេវាឱ្យបានកាន់តែធំ ជាពិសេសពង្រីកបណ្តាញលូទឹកកខ្វក់ ចំនួននៃការតភ្ជាប់ ការផ្តល់សេវាប្រកបដោយទំនួលខុសត្រូវ ការគ្រប់គ្រងប្រកបដោយប្រសិទ្ធភាពខ្ពស់ឱ្យបានទូទាំងក្រុងសៀមរាប ដើម្បីធានាឱ្យបាននូវបរិស្ថានស្អាត សុខភាពអនាម័យសាធារណៈល្អប្រសើរ លើកកម្ពស់ជីវភាពរស់នៅ ក៏ដូចជាឆ្លើយតបទៅនឹងគោលដៅអភិវឌ្ឍប្រកបដោយចីរភាពឆ្នាំ២០៣០ របស់អង្គការសហប្រជាជាតិ ចំណុចទី ៦ (Sustainable Development Goal 6) ធានានូវការទទួលបាន និងការគ្រប់គ្រងទឹក និងអនាម័យប្រកបដោយចីរភាពសម្រាប់ទាំងអស់គ្នា ៕
ចែករំលែកព័តមាននេះ