ប្រទេសនេប៉ាល់ ៖ អាជ្ញាធរគូសបញ្ជាក់កាលពីថ្ងៃទី១ មេសាថា មនុស្សយ៉ាងតិច២៧នាក់បានត្រូវស្លាប់ហើយជាង៦០០នាក់រងរបួស ដោយសារព្យុះភ្លាមៗមួយ ដែលវាយប្រហារកាលពីថ្ងៃទី៣១មីនា នៅភាគខាងត្បូងនេប៉ាល់។ ព្យុះនោះពិតជាខ្លាំងដោយខ្យល់រហូតដល់អាចធ្វើឲ្យរថយន្តទាំងឡាយប៉ើងក្រឡាប់។ ព្យុះដ៏ខ្លាំងនេះកាលពីយប់ថ្ងៃទី៣១…
ប្រទេសនេប៉ាល់ ៖ អាជ្ញាធរគូសបញ្ជាក់កាលពីថ្ងៃទី១ មេសាថា មនុស្សយ៉ាងតិច២៧នាក់បានត្រូវស្លាប់ហើយជាង៦០០នាក់រងរបួស ដោយសារព្យុះភ្លាមៗមួយ ដែលវាយប្រហារកាលពីថ្ងៃទី៣១មីនា នៅភាគខាងត្បូងនេប៉ាល់។ ព្យុះនោះពិតជាខ្លាំងដោយខ្យល់រហូតដល់អាចធ្វើឲ្យរថយន្តទាំងឡាយប៉ើងក្រឡាប់។
ព្យុះដ៏ខ្លាំងនេះកាលពីយប់ថ្ងៃទី៣១ មីនា បានវាយប្រហារលើស្រុកជនបទបារ៉ា ភាគខាងត្បូងរដ្ឋធានីកដ្ឋមណ្ឌូ និងតំបន់ជុំវិញនោះដោយបំផ្លាញផ្ទះសម្បែងអស់ជាច្រើនខ្នង ដើមឈើទាំងឡាយរលំបាក់ ក៏ដូចជាបង្គោលភ្លើង។ ភូមិទាំងមូលត្រូវខ្យល់បំផ្លាញស្ទើរទាំងស្រុង។ ចំណែកគ្រួសារនានាបានយំសោក ដោយសាច់ញាតិត្រូវបាត់បង់ជីវិត។ ផ្លូវថ្នល់នានារាយប៉ាយដោយដើមឈើដែលដូលរលំនិងបាក់មែក ព្រមទាំងកម្ទេចកម្ទីដំបូលផ្ទះដែលប៉ើងធ្លាក់។
យោងតាមសាក្សីទាំងឡាយថា ខ្យល់ពិតជាបោកបក់ខ្លាំងបំផុត រហូតដល់ធ្វើឲ្យរថយន្តបឺសមួយដែលដឹកអ្នកដំណើរច្រើននាក់ ប៉ើងក្រឡាប់ ក៏ដូចជាបណ្ដារថយន្តដែលចតនៅខាងក្រៅដែរ។
យោងតាមអ្នកទទួលខុសត្រូវម្នាក់របស់ផ្នែកឧតុនិយម លោកMIN KUMAR ARYALថា ព្យុះសាហាវនោះបណ្ដាលមកពីបាតុភូតមួយដែលនេប៉ាល់ពុំអាចព្យាករណ៍ទុកមុនបាន ព្រោះពុំមានឧបករណ៍ពិសេសសម្រាប់ផ្ដល់សញ្ញា។ ការប្រសប់គ្នារវាងរលកខ្យល់ក្ដៅនិងរលកខ្យល់ត្រជាក់ បានបង្កើតជាព្យុះកួចដ៏សាហាវនោះ ដែលបោកបង់ក្នុងល្បឿនពី២០ទៅ២៥ម៉ែត្រក្នុងមួយវិនាទី។ មនុស្សច្រើននាក់ស្លាប់ឬរបួសដោយសារការរលំផ្ទះឬអគារសង្កត់។ ហើយមនុស្សច្រើននាក់ទៀតរងគ្រោះព្រោះដើមឈើឬបង្គោលភ្លើងបាក់សង្កត់។
ពួកអ្នកជួយសង្គ្រោះបានលើកទៅដល់តំបន់នានារងការប៉ះពាល់ ទោះជាជួបការរាំងផ្លូវដោយសារបំណែក ឬដើមឈើបាក់រាត់រាយក្ដី។ កងកម្លាំងសន្តិសុខដែលមានកងយោធា បានលើកមកចូលរួមក្នុងប្រតិបត្តិការជួយសង្គ្រោះ ចាប់តាំងពីយប់ថ្ងៃទី៣១មីនាមក។
នាយករដ្ឋមន្ត្រីនេបា៉ល់លោកSHARMA OLI តាមTWITTER បានសម្ដែងការចូលរួមរំលែកទុក្ខជាមួយគ្រួសារជនរងគ្រោះ និងអះអាងថា រដ្ឋាភិបាលរបស់លោកនឹងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីជួយព្យាបាលបណ្ដាអ្នករងរបួស។ ចំណែកអាជ្ញាធរខេត្តបានប្រកាសពីការជួយព្យាបាលមិនគិតប្រាក់ បណ្ដាអ្នករបួស ព្រមទាំងជួយឧបត្ថម្ភប្រាក់ ដល់គ្រួសារអ្នកស្លាប់ម្នាក់ៗចំនួន៣០០.០០០រូពី ប្រមាណជា២៤០០អឺរ៉ូ។
មនុស្សច្រើនរយនាក់ ត្រូវស្លាប់ក្នុងមួយឆ្នាំៗដោយសារការបាក់ដីនិងទឹកជំនន់ នារដូវភ្លៀងនៅនេប៉ាល់។ ប៉ុន្តែវាកម្រមានណាស់ព្យុះមួយក្នុងនិទាឃរដូវ ជារដូវក្ដៅហែងនិងស្ងួតវាយប្រហារ បណ្ដាលឲ្យមានការខូចខាតធ្ងន់ធ្ងរនិងមនុស្សស្លាប់ច្រើនបែបនេះ។ កាលពីឆ្នាំទៅមិញ ព្យុះខ្សាច់មួយចំនួនព្រមទាំងព្យុះឯទៀតៗ បណ្ដាលឲ្យមនុស្សស្លាប់ជាង២២០នាក់នៅប្រទេសឥណ្ឌាជិតខាង កាលពីខែឧសភា៕
ចែករំលែកព័តមាននេះ