កម្ពុជាបើកសេរីក្នុងការប្រតិបត្តិសាសនាដោយគ្មានការរើសអើង ហើយគ្មានសង្គ្រាមសាសនា
- ភ្នំពេញ
រាជធានីភ្នំពេញ ៖ កម្ពុជាបានបើកសេរីភាពក្នុងការប្រតិបត្តិសាសនាដោយគ្មានការរើសអើងនោះទេ ។ នេះបើតាមលោកស្រីម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា និងព្រឹទ្ធសភា និងអធិការកិច្ច ។ ក្នុងជួបពិភាក្សាការងារជាមួយប្រតិភូគណៈកម្មាធិការសាសនានៃសាធារណរដ្ឋសង្គមនិយមវៀតណាម លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានប្រាប់ទៅប្រតិភូវៀតណាមថា នៅកម្ពុជា ព្រះពុទ្ធសាសនាជា សាសនារបស់រដ្ឋ តែប្រជាជនមានសិទ្ធ និងសេរីភាពប្រតិបត្តិសាសនាផ្សេងទៀត ដោយគ្មានរើសអើង ។ កម្ពុជាមិនដែលមានសង្គ្រាមសាសនាឡើយ។ សាសនានិកទាំងអស់អាចរស់នៅជាមួយគ្នាក្នុងសហគមន៍ និងសហការគ្នាប្រកបដោយសុខដុមរមនា ។
លោកណុប ចាន់ណារិន្ទ អ្នកនាំពាក្យក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចប្រាប់អ្នកយកព័ត៌មាននៅក្រោយជំនួបនេះនាព្រឹកថ្ងៃទី០២ ខែមេសា នៅទីស្តីការក្រសួងប្រតិភូនេះវៀតណាមដឹកនាំដោយលោក វុ ចៀនថាំង ប្រធានគណៈ កម្មាធិការសាសនា រដ្ឋាភិបាលនៃសាធារណរដ្ឋសង្គមនិយមវៀតណាម ។ គោលបំណងសំខាន់របស់គណៈប្រតិភូដែលមកកម្ពុជានាពេលនេះថា គឺដើម្បីសុំកិច្ចសហការពីរាជរដ្ឋាភិបាលកម្ពុជាលើវិស័យសាសនានៃប្រទេសទាំង២ ហើយម្យ៉ាងទៀតនៅពេលខាងមុខវៀតណាមនឹងមានរៀបចំពិធីបុណ្យវិសាខបូជាដ៏ធំមួយដោយមានសាសនិកជនមកពីជាង១០០ប្រទេស នៅលើពិភពលោកចូលរួមក្នុងនោះក៏សុំឲ្យមានការចូលរួមពីកម្ពុជាផងដែរ ។
លោក វុ ចៀនថាំង បន្តទៀតថា ក្នុងពេលស្នាក់នៅប្រទេសកម្ពុជាគណៈប្រតិភូបានចូលក្រាបបង្គុំថ្វាយសម្តេចសង្ឃរាជ ប៊ូ គ្រី និងលោកទេសរដ្ឋមន្ត្រី ហ៊ឹម ឆែម រដ្ឋមន្ត្រីក្រសួងធម្មការ និងកិច្ចការសាសនា ស្តីពីទំនាក់ទំនងលើវិស័យសាសនា ដើម្បីសហការអនុវត្តដែលមានលក្ខណៈជាពហុគំនិត ។ ជាមួយគ្នានេះលោក វុ ចៀនថាំង បានចាប់អារម្មណ៍ពីភាពរីកចំរើននៅកម្ពុជា ពិសេសនៅក្នុងរាជធានីភ្នំពេញដែលឃើញមានសំណង់អគារខ្ពស់ៗរួមនឹងសំណង់អគារចាស់ៗមួយចំនួនកំពុងមានការអភិរក្ស និងមានប្រព័ន្ធគមនាគមន៍ខ្វាត់ខ្វែងគួរឲ្យកត់សម្គាល់ ដែលកត្តាទាំងនេះបញ្ជាក់បានថា កម្ពុជាមានការអភិវឌ្ឍន៍ខ្លាំងបន្ទាប់ពីប្រទេសនេះទទួលបានសុខសន្តិភាពពេញលេញ ។
នៅក្នុងជំនួបនេះលោកស្រីឧបនាយករដ្ឋមន្ត្រីម៉ែន សំអន ក្នុងនាមតំណាងដ៏ខ្ពង់ខ្ពង់សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានពាំនាំនូវការផ្តាំផ្ញើសួរសុខទុក្ខរបស់សម្តេចផ្ញើជូនគណៈប្រតិភូប្រកបដោយក្តីនឹករលឹកក្នុងនោះលោកជំទាវកិត្តិព្រឹទ្ធបណ្ឌិតបានជំរាបជូនពីសកម្មភាពមមារញឹករបស់សម្តេចដែលកំពុងចុះជួបជាមួយប្រជាជនកម្មករមន្ត្រីរាជការកងកម្លាំងប្រដាប់អាវុធ និងការជួបជុំសាសនិកជនគ្រប់សាសនា នៅតាមកម្មវិធីចុះពិនិត្យវឌ្ឍនភាព និងសម្ភោធសមិទ្ធិផលថ្មីៗនៅទូទាំងប្រទេសស្របពេលដែលប្រជាជនកម្ពុជាកំពុងត្រៀមអំណរសាទរក្នុងឱកាសបុណ្យចូលឆ្នាំថ្មីដ៏ឆាប់ៗខាងមុខនេះ ។
លោកស្រីកិត្តិសង្គហបណ្ឌិតបានបន្តទៀតថា រាជរដ្ឋាភិបាលនីតិកាលទី៦ដែលមានសម្តេចតេជោ ហ៊ុន សែន ជានាយករដ្ឋមន្ត្រីបានបន្ដអនុវត្ដយុទ្ធសាស្ដ្រចតុកោណដំណាក់កាលទី៤ ដោយអាទិភាពទី១ គឺវិស័យធនធានមនុស្ស និងហេដ្ឋារចនាសម្ព័ន្ធមាន ផ្លូវ ទឹក និងភ្លើង ។ ក្នុងនោះដែរ ទំនាក់ទំនងរវាងកម្ពុជា-វៀតណាម ក៏ត្រូវបានបង្កើននូវកិច្ចសហប្រតិបត្តិការឲ្យកាន់តែរឹងមាំទ្វេឡើង ពិសេសការខិតខំរួមគ្នាក្នុងជំរុញកំណើននៃទំហំពាណិជ្ជកម្មនៃប្រទេសទាំងពីរឲ្យកាន់ខែខ្ពស់ថែមទៀត ។
ជាមួយគ្នានេះដែរមេដឹកនាំរដ្ឋាភិបាលនៃប្រទេសទាំងពីរបានសន្យារួមគ្នាថា នឹងខិតខំជំរុញធ្វើយ៉ាងណាប្រែក្លាយតំបន់ព្រំដែននៃប្រទេសទាំងពីរកម្ពុជា-វៀតណាមក្លាយជាតំបន់ព្រំដែន ប្រកបដោយសន្តិភាពស្ថេរភាព ការអភិវឌ្ឍ ការផ្លាស់ប្តូរទំនិញ ពាណិជ្ជកម្ម ទេសចរណ៍ និងការធ្វើដំណើរឆ្លងដែនទៅមករបស់ប្រជាជននៃប្រទេសទាំងពីរក៏ដូចជា ភ្ញៀវទេសចរណ៍ ដោយគ្មានការភ័យខ្លាច ៕
ចែករំលែកព័តមាននេះ