ប្រទេសវេណេស៊ុយអេឡា ៖ តុលាការកំពូលវេណេស៊ុយអេឡា ត្រួតត្រាដោយរបបលោកប្រធានាធិបតីនីកូឡាស់ម៉ាឌូរ៉ូ បានស្នើកាលពីថ្ងៃទី១មេសា ឲ្យដកអភ័យឯកសិទ្ធិសភា ពីមេដឹកនាំប្រឆាំងលោកJUAN GUAIDO ដែលបែបនេះនឹងនាំឲ្យមានផលវិបាកកាន់តែខ្លាំងឡើង ក្នុងប្រទេសដែលកំពុងធ្លាក់ក្នុងភាពច្របូកច្របល់ស្រាប់។
ក្នុងសេចក្ដីសម្រេចមួយចេញផ្សាយកាលពីថ្ងៃទី១មេសា តុលាការកំពូលវេណេស៊ុយអេឡា បានស្នើដល់ប្រធានសភាធម្មនុញ្ញ ដកអភ័យឯកសិទ្ធិសភាពីលោកJUAN GUAIDOដែលប្រទេសប្រមាណជា៥០ទទួលស្គាល់ជាប្រធានាធិបតីស្ដីទីរបស់ប្រទេស។
តុលាការកំពូលបានចោទប្រកាន់លោកJUAN GUAIDOដែលជាប្រធានសភាត្រួតត្រាដោយពួកប្រឆាំងថា មិនគោរពការហាមឃាត់មិនឲ្យលោកចាកចេញពីប្រទេស។ មេដឹកនាំប្រឆាំងរូបនោះ បានផ្គើនការសម្រេចហាមឃាត់នេះដែលចេញកាលពីថ្ងៃទី២៩មករា របស់តុលាការកំពូល ដោយលោកចាកចេញស្ងាត់ៗ ពីប្រទេស ទៅបំពេញទស្សនកិច្ចក្នុងប្រទេសកូឡុំប៊ីជិតខាង ប្រទេសប្រេសីុល បា៉រ៉ាហ្គាយ អាហ្សង់ទីននិងអេក្វាទ័រ កាលពីដំណាច់ខែកុម្ភៈមកដើមខែមីនា។
ការប្រកាសដកអភ័យឯកសិទ្ធិនេះកើតមានខណៈលោកJUAN GUAIDO កំពុងមានជម្លោះកាន់តែខ្លាំងជាមួយលោកម៉ាឌូរ៉ូ ចាប់តាំងពីដើមឆ្នាំមក ហើយប្រទេសកំពុងប្រឈមមុខនឹងការលំបាកកាន់តែខ្លាំង បន្ទាប់ពីខ្វះស្បៀងនិងថ្នាំពេទ្យធ្ងន់ធ្ងរ មកជួបប្រទះនឹងការដាច់ភ្លើងដាច់ទឹកយ៉ាងអាក្រក់បំផុតក្នុងប្រទេសទៀត៕
ចែករំលែកព័តមាននេះ