រាជធានីភ្នំពេញ ៖ កម្ពុជាមានភាពប្រសើរនៃសមភាពយេនឌ័រដោយឆ្នាំ២០១៨ កន្លងទៅកម្ពុជាឈរនៅចំណាត់ថ្នាក់ទី៩៣ ក្នុងចំណោមប្រទេស១៤៩ បើប្រៀបធៀបកាលពីឆ្នាំ២០១៧ មានចំណាត់ថ្នាក់ទី៩៩ ។ នេះបើតាមលោក ស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីថ្លែងក្នុងពិធីបិទសន្និបាតបូកសរុបការងារឆ្នាំ២០១៨ និងលើកទិសដៅឆ្នាំ២០១៩ នាព្រឹកថ្ងៃទី០២ ខែមេសា ឆ្នាំ២០១៩នៅសណ្ឋាគារភ្នំពេញ ។
លោកស្រីរដ្ឋមន្ត្រីក្រសួងកិច្ចការនារីបានគូសបញ្ជាក់ថា កាលពីឆ្នាំ២០១៨ ក្រសួងធ្វើឱ្យសម្រេច បាននូវសមិទ្ធផលជាច្រើន ហើយរួមមានការអភិវឌ្ឍធនធានមនុស្សរបស់ស្ត្រី ការបង្កើនការចូលរួមរបស់ស្ត្រី និងក្មេងស្រីនៅក្នុងការអប់រំកម្រិតខ្ពស់ ការអភិវឌ្ឍជំនាញវិជ្ជាជីវៈដល់ស្ត្រីសហគ្រិនភាពការលើកកម្ពស់តំណាងរបស់ស្ត្រីក្នុងថ្នាក់ធ្វើសេចក្តីសម្រេច និងបរិយាប័ន្នការលើកកម្ពស់សីលធម៌សង្គម សុខុមាលភាព និងកិច្ចគាំពារសង្គម និងថា សម្រាប់ឆ្នាំ២០១៩នេះ ក្រសួងត្រូវផ្តោតលើការអនុវត្តការងារស្របតាមប្រធានបទដែលបានកំណត់ក្នុងទិវាអន្តរជាតិ នារី៨ មីនា ២០១៩ ក្នុងការលើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍ ធនធានមនុស្ស ។
ទាក់ទងទៅនឹងបញ្ហាស្ត្រីនេះលោកស្រីកិត្តិសង្គហបណ្ឌិត ម៉ែន សំអន ឧបនាយក រដ្ឋមន្ត្រីមានប្រសាសន៍ថា រាជរដ្ឋាភិបាលបង្កើតលិខិតបទដ្ឋានគោលនយោបាយ និងផែនការសកម្មភាពជាតិ ដើម្បីឆ្លើយតបនឹងអំពើហិង្សាគ្រប់រូបភាព លើស្ត្រី និងក្មេងស្រី និងការលើកកម្ពស់គុណភាពនៃការផ្តល់សេវាជាពហុវិស័យនៅតាមបណ្តាខេត្តនានា តាមរយៈក្រុមការងារ អន្តរស្ថាប័នដោយមានកិច្ចសហការជាមួយអង្គការមិនមែនរដ្ឋាភិបាល ដើម្បីជួយជនរងគ្រោះឱ្យបានទាន់ពេលវេលា និងមានប្រសិទ្ធភាព ហើយកន្លងមកថ្មីៗនេះក្នុងកិច្ចប្រជុំប្រចាំឆ្នាំរបស់ក្រុមប្រឹក្សាជាតិកម្ពុជា ដើម្បីស្ត្រីសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសម្រេចបង្កើតក្រុមមេធាវីសម្តេចតេជោ ដើម្បីបំពេញបន្ថែមការងារផ្លូវច្បាប់ក្នុងគោលបំណងជួយស្ត្រី និងក្មេងស្រីក្រីក្រដែលងាយរងគ្រោះដោយអំពើហិង្សា ទាក់ទងនឹងយេនឌ័រឱ្យទទួលបាននូវយុត្តិធម៌បានទាន់ពេលវេលា និងប្រកបដោយប្រសិទ្ធភាព ។
លោកស្រីឧបនាយករដ្ឋមន្ត្រីបានលើកឡើងផងដែរថា វាជារឿងដ៏គួរឱ្យខ្លោចផ្សាខ្លាំង ណាស់ ដែលក្មេងស្រីត្រូវបានចាប់រំលោភ ហើយខ្លះត្រូវបានសម្លាប់បំបិទមាត់ថែមទៀតផងពី សំណាក់ជីតា ឪពុកចុង ឪពុកបង្កើត ។ ដែលទង្វើដ៏អមនុស្សធម៌នេះវាបានកើតចេញពីការ ធ្លាក់ចុះនៃសីលធម៌របស់មនុស្ស ការសេពគ្រឿងញៀន និងអំពើហិង្សាដែលមិនអាចអត់ឱនឱ្យបានឡើយ បើមិនដូច្នោះទេ ស្ត្រី និងក្មេងស្រីនៅតែបន្តការរំលោភបំពានដោយឥតស្រាកស្រាន្ត ។
ក្នុងឱកាសនោះដែរលោកស្រី អ៊ឹង កន្ថាផាវី បញ្ជាក់ថា សម្រាប់ឆ្នាំនេះ និងឆ្នាំបន្ត គឺត្រូវតែផ្តោតការយកចិត្តទុកដាក់បន្ថែមទៀតក្នុងការពង្រីកមុខងារ និងតួនាទីរបស់ក្រសួង និងមន្ទីរចូលរួមអនុវត្តក្របខណ្ឌគោលនយោបាយជាតិ គាំពារសង្គមឆ្នាំ២០១៦-២០២៥ ជាពិសេសក្នុងការពង្រឹងសមភាពយេនឌ័រក្នុងក្របខណ្ឌ ដើម្បីឈានទៅអភិវឌ្ឍធនធានមនុស្ស ។ បន្តលើកកម្ពស់ការចូលរួមរបស់ស្ត្រី និងក្មេងស្រី ក្នុងវិស័យអប់រំ និងជំនាញពង្រឹងពង្រីកភាពជាដៃគូរ និងកិច្ចសហការជាមួយដៃគូរពាក់ព័ន្ធលើកកម្ពស់ការអភិវឌ្ឍន៍សេដ្ឋកិច្ចគ្រួសារស្ត្រី និងអភិវឌ្ឍសហគ្រិនភាពស្ត្រី ជាពិសេស បង្កើនការចូលរួមរបស់ស្ត្រីក្នុងភាពជាអ្នកដឹកនាំក៏ដូចជា បញ្ជ្រាបយេនឌ័រ ទៅក្នុងគោលនយោបាយផែនការគ្រប់វិស័យនៅគ្រប់កម្រិត ។
បង្កើនការយល់ដឹង និងបញ្ជ្រាបយេនឌ័រទៅក្នុងការប្រែងប្រួលអាកាសធាតុ និងពង្រឹងកិច្ចសហប្រតិបត្តិការក្នុងតំបន់សហគមន៍អាស៊ាន និងជាសាកលក្នុងការលើកកម្ពស់ និងកិច្ចការពារ ស្ត្រី និងកុ មារ ៕
ចែករំលែកព័តមាននេះ