សម្តេចតេជោ ៖ យុទ្ធសាស្ត្រចម្បងពីរដែលសម្រេចជោគជ័យស្ទើរទាំងស្រុង
- កំពត
ខេត្តកំពត ៖ សម្តេចតេជោ ហ៊ុន សែន បានបញ្ជាក់ជាថ្មីថា យុទ្ធសាស្ត្រចំនួនពីរចម្បងដែលសម្រេចបានដាក់ចេញនោះទទួលបានជោគជ័យស្ទើរទាំងស្រុង ។ ថ្លែងក្នុងពិធីសម្ពោធដាក់ឲ្យដំណើរការជាផ្លូវការនូវប្រព័ន្ធទឹកស្អាតខេត្តកំពត នាព្រឹកថ្ងៃទី០២ ខែមេសា ឆ្នាំ២០១៩ សម្តេចតេជោ ហ៊ុន សែន បានបញ្ជាក់ថា បន្ទាប់ពីទទួលជោគជ័យនូវនយោបាយឈ្នះឈ្នះ ឆ្នាំ១៩៩៦ ហើយបានបញ្ចប់នៅចុងឆ្នាំ១៩៩៨ ដែលមកដល់ពេលនេះមានរយៈពេលជាង២០ឆ្នាំហើយ។
សម្តេចបន្ថែមថា ពេលនោះខ្ញុំបានដាក់យុទ្ធសាស្ត្រពីរយ៉ាងគឺទី១-ការប្រែក្លាយតំបន់អតីតតំបន់សមរភូមិទាំងអស់ឲ្យក្លាយជាតំបន់អភិវឌ្ឍន៍ និងជាទីផ្សារ ។ ទី២-ការប្រែក្លាយតំបន់ព្រំដែនជាមួយប្រទេសជិតខាងទាំងអស់ឲ្យក្លាយជាព្រំដែនសន្តិភាព មិត្តភាព កិច្ចសហប្រតិបត្តិការនិងការអភិវឌ្ឍ ។ សម្តេចបញ្ជាក់ថា«ឥឡូវនេះ បើពិនិត្យយុទ្ធសាស្ត្រនេះ គឺទទួលបានជោគជ័យដែលអាចនិយាយថា មិនតិចជាង៩០%នោះទេ ដែលយើងប្រែក្លាយតំបន់អតីតសមភូមិជាតំបន់អភិវឌ្ឍ ប៉ុន្តែ១០%ទៀត ដែលនៅសល់នោះ គឺជាតំបន់ដែលយើងត្រូវដោះស្រាយបញ្ហាដូចជា គ្រាប់មីន គ្រាប់មិនទាន់ផ្ទុះ នៅមិនទាន់ដោះស្រាយហើយ ដូច្នេះតំបន់ទាំងនោះមិនទាន់អនុញ្ញាតឲ្យប្រជាពលរដ្ឋទៅផ្សងព្រេងជាមួយគ្រោះថ្នាក់នោះទេ» ។
ជាមួយគ្នានោះដែរសម្តេចក៏បានលើកឡើងថា ប្រជាពលរដ្ឋមួយចំនួនបានប្រែក្លាយតំបន់សមរភូមិកៅ្តឲ្យក្លាយជាទីផ្សារតំបន់ប្រជុំជន ផ្ទះសំណាក់ សណ្ឋាគារមួយចំនួន និងកន្លែងកំម្សាន្តជាដើម ។ ចំណែកតំបន់តាមព្រំដែនជាប់ជាមួយប្រទេសជិតខាងវិញ សម្តេចតេជោក៏បានលើកឡើងថា រាជរដ្ឋាភិបាលកំពុងតែខិតខំបន្តធ្វើកិច្ចសហប្រតិបត្តិការលើកផ្នែកពាណិជ្ជកម្មព្រោះ ថានៅតាមតំបន់ព្រំដែនបានក្លាយជាព្រំដែនសន្តិភាព មិត្តិភាព សហប្រតិបត្តិការ អភិវឌ្ឍន៍រួចហើយ ។
ចំពោះទំហំពាណិជ្ជកម្មកម្ពុជា-វៀតណាមមានចំនួនប្រហាក់ប្រហែល៥ពាន់លានដុល្លារ ទំហំពាណិជ្ជកម្ម កម្ពុជា-ថៃ ប្រហែលជាជិត៧ពាន់លានដុល្លារ និងទំហំពាណិជ្ជកម្មកម្ពុជា-ឡាវ មួយចំនួនផងដែរ ។ សម្តេចបញ្ជាក់ថា«យើងកំពុងចចារជាមួយវៀតណាម ឡាវ និងថៃ ដើម្បីឲ្យបើកច្រកថ្មីៗបន្ថែមទៀត ដើម្បីជំរុញឲ្យមានទំនាក់ទំនងពាណិជ្ជកម្មទ្វេភាគីរវាងប្រទេសជាប់ព្រំដែនផងដែរ» ៕
ចែករំលែកព័តមាននេះ