ខេត្តស្ទឹងត្រែង ៖ កម្លាំងនគរបាលច្រកទ្វារព្រំដែនអន្តរជាតិត្រពាំងក្រៀល បានឃាត់ខ្លួនជនជាតិឥណ្ឌូណេស៊ីម្នាក់ ពាក់ព័ន្ធនឹងការដឹកជញ្ចូនសារធាតុញៀន៤៤កញ្ចប់ធំនិងតូច ដាក់ក្នុងវ៉ាលីសច្រកក្នុងកញ្ចប់នំកញ្ចប់ ស្ករគ្រាប់ និងកញ្ចប់កាហ្វេ វេចខ្ចប់យ៉ាងស្អាតដែលតាមបរិមាណប៉ាន់ស្មានអាចមានជាង២០គីឡូក្រាម ក្នុងចេតនាបំភាន់ភ្នែក…
ខេត្តស្ទឹងត្រែង ៖ កម្លាំងនគរបាលច្រកទ្វារព្រំដែនអន្តរជាតិត្រពាំងក្រៀល បានឃាត់ខ្លួនជនជាតិឥណ្ឌូណេស៊ីម្នាក់ ពាក់ព័ន្ធនឹងការដឹកជញ្ចូនសារធាតុញៀន៤៤កញ្ចប់ធំនិងតូច ដាក់ក្នុងវ៉ាលីសច្រកក្នុងកញ្ចប់នំកញ្ចប់ ស្ករគ្រាប់ និងកញ្ចប់កាហ្វេ វេចខ្ចប់យ៉ាងស្អាតដែលតាមបរិមាណប៉ាន់ស្មានអាចមានជាង២០គីឡូក្រាម ក្នុងចេតនាបំភាន់ភ្នែក ។ ក្រោយពេលគយប្រថាប់ត្រារួច ក៏ធ្វើការត្រួតពិនិត្យ និងឆែកឆេរ ក្នុងវ៉ាលីសជនសង្ស័យបានឃើញកញ្ចប់ថង់នំ និងស្ករគ្រាប់ច្រកថង់យ៉ាងស្អាតជាច្រើនក្នុងវាលីសនោះ ។
ពេលឆែកឃើញដូច្នេះ ក៏មានការសង្ស័យថា ជាសារធាតុញៀន ក៏រាយការទៅនគបាលជំនាញ (BLO) មកពិនិត្យភ្លាមៗបានបង្ហាញថាពិតជាថ្នាំញៀន ក៏ធ្វើការឃាត់ខ្លួនតែម្តង ។ ហេតុការណ៍នេះធ្វើឡើងនៅវេលាម៉ោង១២និង៣៥នាទីរសៀលថ្ងៃទី៣១ មីនា នៅចំណុចប្រថាប់ត្រា មុខប៉ុស្តិ៍ត្រួតពិនិត្យច្រកចេញចូលអន្តរជាតិកម្ពុជា-ឡាវ ស្ថិតក្នុងភូមិកំផាន់ សង្កាត់សាមគ្គី ក្រុងស្ទឹងត្រែង ។
សមត្ថកិច្ចបានឲ្យដឹងថា ជនជាតិឥណ្ឌូណេស៊ីនេះឈ្មោះ NURUL FADLI EKO PUTRO ភេទប្រុស អាយុ៤៣ឆ្នាំ សញ្ជាតិឥណ្ឌូនេស៊ី បានធ្វើដំណើរចេញពីប្រទេសឡាវចូលមកកម្ពុជា តាមច្រកទ្វារអន្តរជាតិត្រពាំងក្រៀល ។ កាលពីវេលារសៀលនោះសមត្ថកិច្ចមិនបានផ្តល់ព័ត៌មានជុំវិញការចាប់គ្រឿងញៀនជាច្រើននោះភ្លាមៗទេ ដោយសារតែសមត្ថកិច្ចកំពុងដុតដៃដុតជើង តាមប្រមាញ់មេខ្លោងដែលនឹងទទួលយកគ្រឿងញៀនទាំងនេះ ។ ទាក់ទិនករណីនេះដែរ នគរបាលជំនាញនិងកម្លាំងសហការមិនបានបញ្ចេញព័ត៌មានឱ្យអ្នកសារព័ត៌មានធ្វើការផ្សព្វផ្សាយភ្លាមៗបានឡើយដោយរង់ចាំបន្តនីតិវិធី និងឈានទៅវែកមុខក្រុមបក្សពួករបស់ជនសង្ស័យបន្ថែមទៀតដែលជាខ្សែបណ្តាញក្នុងប្រទេស ។
តាមប្រភពព័ត៌មានមួយឲ្យដឹងក្រៅផ្លូវការថា ការប្រទះឃើញគ្រឿងញៀនយ៉ាងសន្ធឹកសន្ធាប់នេះ ដោយ សារតែនគរបាលអន្តោប្រវេសន៍ប្រចាំច្រកទ្វារអន្តរជាតិត្រពាំងកៀល បន្ទាប់ពីឃើញកញ្ចប់នំជាច្រើននៅក្នុងវ៉ាលីសខ្មៅ ទំនងប្លែកនិងឆ្ងាញ់ក៏បានសុំនំរបស់ជនជាតិឥណ្ឌូណេស៊ីនោះញ៉ាំ ទើបបង្កឱ្យមានការភ្ញាក់ផ្អើល ព្រោះមិនមែនជានំបែរជាគ្រឿងញៀនទៅវិញ ។ សារធាតុញៀនដែលរកឃើញនិងដកហូតនេះជាប្រភេទម្សៅក្រាមពណ៌សថ្លា ដែលពាក្យបច្ចេកទេស ជាថ្នាំមេតំហ្វេតាមីនឬម៉ាទឹកកក ។
ក្រោយការឃាត់ខ្លួនជនសង្ស័យ កម្លាំងសមត្ថកិច្ចនគរបាលជំនាញនិងកម្លាំងសហការ បានបញ្ជូនមកកាន់ស្នងការដ្ឋាននគរបាលខេត្តស្ទឹងត្រែងនិងបញ្ជូនបន្តមកកាន់រាជធានីភ្នំពេញដើម្បីដំណើរការនីតិវិធីបន្ត ។ តាមប្រភពក្រៅផ្លូវការដដែលបានឱ្យដឹងថា ជនជាតិឥណ្ឌូណេស៊ីនេះមានការរត់ពន្ធឆ្លងដែន នាំថ្នាំញៀនមកកាន់ព្រលានយន្តហោះសៀមរាប ហើយនឹងបញ្ជូនបន្តទៅកាន់ប្រទេសហ្វ៊ីលីពីន ។ តាមការកត់សម្គាល់ថ្នាំញៀនបាននាំចូលមកកម្ពុជាតាមច្រកព្រំដែនជាមួយប្រទេសឡាវមានមិនតិចទេ ចាប់បានម្តងៗរាប់គីឡូក្រាមឡើងទៅ។ បើវាមិនឆ្លងកាត់ក៏វាចូលមកប្រើប្រាស់ជួញដូរក្នុងប្រទេសដែរ ។ ប៉ុន្តែឱ្យតែនាំចូលដឹងតែពីជាប់អន្ទាក់ កម្របានរួចខ្លួនណាស់ ៕
ចែករំលែកព័តមាននេះ