ខេត្តកំពង់ចាម ៖ ជនពុំស្គាល់មុខម្នាក់ជិះម៉ូតូម៉ាកហ្សូ៊ម័រអុិចមួយគ្រឿង ពណ៌ក្រហម ប្រដាប់ដោយកាំ ភ្លើងខ្លី១ដើម បានដេញបាញ់បុរស២នាក់ជិះម៉ូតូសេ១២៥ ពណ៌ខ្មៅ ស៊េរីឆ្នាំ២០១៨ ពាក់ផ្លាកលេខភ្នំពេញ ១GS-៧៦៤០ បណ្តាលឲ្យរងរបួសទាំង២នាក់ និងក្រោយមកស្លាប់ម្នាក់ ។ ហេតុការណ៍នេះ កើតឡើងកាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី៣១ ខែមីនាកន្លងទៅ នៅមុខហាងខារ៉ា
អូខេគ្រួសារ ក្នុងភូមិទី២ សង្កាត់វាលវង់ ក្រុងកំពង់ចាម ។ ក្រោយការបាញ់ប្រហារ ជនបង្កបានជិះម៉ូតូត្រឡប់ក្រោយគេចខ្លួនបាត់ ហើយរហូតមកដល់រសៀលថ្ងៃទី១ ខែមេសា នៅតែមិនទាន់តាមប្រមាញ់ចាប់ខ្លួនខ្មាន់កាំភ្លើងនោះបាននៅឡើយទេ ។
សាក្សីនៅកន្លែងកើតហេតុប្រាប់ឲ្យដឹងថា នាវេលារំលងអធ្រាត្រនោះ គេបានឮសំឡេងគ្រាប់កាំភ្លើង៣គ្រាប់ នៅចំណុចរង្វង់មូលនាងគង្ហីង បន្ទាប់មកឃើញម៉ូតូ២គ្រឿងបើកបរក្នុងទិសដៅពីខាងត្បូងទៅខាងជើង ដោយមានល្បឿនលឿនដេញគ្នា ។ លុះបានប្រហែលជាង២០០ម៉ែត្រ ក៏ឮសំឡេងផ្ទុះ២គ្រាប់ទៀត បណ្តាលឲ្យម៉ូតូជិះគ្នា២នាក់ដួល ហើយខ្មាន់កាំភ្លើងនោះក៏ត្រឡប់ក្រោយគេចខ្លួនបាត់ទៅ ។ តាមសាក្សីរៀបរាប់ទៀតថា ក្រោយមកស្រាប់តមានការភ្ញាក់ផ្អើលដល់អ្នកនៅក្បែរនោះនាំគ្នាបើកទ្វារផ្ទះ
ចេញមកមើល ហើយនគរបាលប៉ុស្តិ៍សង្កាត់វាលវង់ក៏មកដល់កន្លែងកើតហេតុនិងមានកម្លាំងសមត្ថកិច្ចកាន់តែច្រើនឡើង និងបាន់ដឹកបុរសទាំង២នាក់ដែលរងរបួសទៅមន្ទីរពេទ្យបង្អែកខេត្ត ។
រហូតមកដល់ព្រឹកថ្ងៃទី១ ខែមេសា នគរបាលក្រុងកំពង់ចាម បានបើកការស៊ើបអង្កេតបន្តទៀតដោយសួរនាំអ្នកនៅក្បែរកន្លែងកើតហេតុ ដើម្បីឈានទៅកំណត់មុខសញ្ញាជនដែលបាញ់ប្រហារនោះ ។ អ្នកស្រី ស៊ន់ ចាន់ណា អាយុ៣៩ឆ្នាំ នៅភូមិគគរទី១ ឃុំគគរ ស្រុកកំពង់សៀម និយាយថា ប្តីគាត់ឈ្មោះ ប៊ុន លាង បានចេញពីផ្ទះនៅវេលាម៉ោង៦ល្ងាចថ្ងៃទី៣០ ខែមីនា ទៅផឹកស៊ីនៅផ្ទះឈ្មោះ យ៉េ នៅក្នុងភូមិជាមួយគ្នា ។ បន្ទាប់មក បានបន្តទៅផឹកសុីនៅផ្ទះឈ្មោះ រីដា នៅជិតផ្ទះរបស់គាត់ រហូតដល់ជិតកណ្តាលអធ្រាត្រនិងមិនបានមកចូលផ្ទះដេកទេ និងបានជិះម៉ូតូ ជាមួយឈ្មោះ ចិន្តា ទៅក្រុងកំពង់ចាម ។
អ្នកស្រីបន្តថា ក្រោយមកស្រាប់តែមានគេទូរស័ព្ទប្រាប់ថា ប្តីគាត់ត្រូវគេបាញ់របួសនៅ់ម្តុំរង្វង់មូលនាងគង្គីង គាត់ក៏ទៅកាន់ទីនោះឃើញប្តីត្រូវរបួសមែន ។ បន្តិចក្រោយមក មានរថយន្តមកដឹកយកទៅមន្ទីរពេទ្យបង្អែកខេត្ត តែគ្រូពេទ្យមិនហ៊ានមើល ព្រោះរបួសប្តីគាត់ធ្ងន់ពេកក៏ដឹកតាមរថយន្តសាមុយបន្តទៅមន្ទីរ ពេទ្យកាល់ម៉ែតឯរាជធានីភ្នំពេញ ។ ទោះជាយ៉ាងណា នៅវេលាម៉ោងជាង៩ព្រឹកថ្ងៃទី៣១ ខែមីនា ប្តីគាត់បានស្លាប់ទៅដោយគ្រូពេទ្យមិនអាចសង្គ្រោះបាន ព្រោះគ្រាប់កាំភ្លើងបាញ់ត្រូវថ្លើម និងគ្រឿងក្នុងច្រើនកន្លែង ។ អ្នកស្រី ស៊ន់ ចាន់ណា និយាយទៀតថា ក្នុងពេលចេញទៅផឹកស៊ីនោះ ប្តីគាត់មិនបានឈ្លោះ ប្រកែកជាមួយនឹងអ្នកណាទេ បើផឹកស្រវឹងមានគេដឹកមកផ្ទះ ហើយក៏មិនដែលរករឿងប្រពន្ធកូនដែរ ។
រូបគាត់និងប្តីមិនដែលមានទំនាស់នឹងគ្នាម្តងណាឡើយ ចាប់តាំងពីពេលចាប់ដៃគ្នាជាប្តីប្រពន្ធមកបានកូនស្រី២នាក់ ម្យ៉ាងទៀតប្តីស្រួលត្រង់ថា បើផឹកស្រវឹងនៅពេលយប់មកដល់ផ្ទះគឺសម្ងំដេកហើយ ។ ប្តីត្រូវបានគេបាញ់ប្រហារត្រូវក្រោមក្លៀកខាងស្តាំ ប៉ុន្តែពេទ្យវះកាត់រកក្បាលគ្រាប់មិនឃើញទេ ហើយករណីនេះសូមសមត្ថកិច្ចគ្រប់លំដាប់ថ្នាក់មេតា្តស្រាវជ្រាវតាមវែកមុខឃាតករ ដើម្បីនាំខ្លួនមកផ្តន្ទាទោសតាមច្បាប់ផង ។
ចំណែកអ្នកដែលរងរបួសដោយការបាញ់ប្រហារដែរ ឈ្មោះ ឆុន ចិន្តា អាយុ២៥ឆ្នាំ នៅភូមិគគរទី១ និយាយថា ក្រោយពីបានផឹកស៊ីនៅក្នុងភូមិហើយ រូបគេបានឌុបឈ្មោះ ប៊ុន លាង បំណងទៅហូបបបរសនៅក្បាលស្ពានគីហ្សុ៊ណា ក្រុងកំពង់ចាម ។ ប៉ុន្តែនៅពេលជិះម៉ូតូទៅដល់ត្រង់រង្វង់មូលនាងគង្ហីង ឃើញម៉ូតូម៉ាកហ្សូ៊ម័រអុិចមួយគ្រឿង ពណ៌ក្រហម ធ្វើដំណើរស្របទិសគ្នា ។ ពេលនោះ រូបគេបានបន្ថែមល្បឿនជែងទៅមុខបានប្រហែល១០ម៉ែត្រ ស្រាប់តែបុរសដែលបើកម៉ូតូហ្សូ៊ម័រអុិចនោះបានបាញ់ប្រហារមកលើពួកគេចំនួន៣គ្រាប់ ដោយមិនដឹងថាត្រូវនោះទេ ក៏ប្រឹងជិះមកមុខទៀតហើយជនមិនស្គាល់អត្តសញ្ញាណនោះតាមបាញ់២គ្រាប់ទៀតសរុបបាញ់៥គ្រាប់ ។
ការបាញ់ប្រហារនេះ បណ្តាលឲ្យត្រូវអ្នកជិះខាងក្រោយធ្ងន់ ចំណែករូបគេត្រូវរបួស១គ្រាប់ចំកញ្ចូញគូទខាងស្តាំបៀមក្បាលគ្រាប់ ហើយមកដល់ព្រឹកថ្ងៃទី១ ខែមេសា ត្រូវបានគ្រូពេទ្យនៅមន្ទីរពេទ្យបង្អែកខេត្តវះកាត់យកចេញហើយ ។ ពេលផឹកស៊ីនៅក្នុងភូមិមិនមាន ទំនាស់ជាមួយនឹងអ្នកណាម្នាក់ទេ ហើយកាល
ពីមុនក៏គ្មានទៀត រូបគេមានចម្ងល់ថា ការបាញ់ ប្រហារខាងលើ សង្ស័យតែឃាតករខឹងជិះម៉ូតូជែងទេ
ដឹង ? រីឯមន្ត្រីសមត្ថកិច្ចបានឲ្យដឹងថា ដោយមានបញ្ជាពីលោកស្នងការនគរបាលខេត្តនោះ សមត្ថកិច្ចគ្រប់លំដាប់ថ្នាក់បាននិងកំពុងដុតដៃដុតជើង ចុះស្រាវជ្រាវគ្រប់ជំនាញ តាំងពីថ្នាក់ខេត្តរហូតដល់មូលដ្ឋាន ។
ក្នុងជំហានដំបូងបានលើកហេតុផលថា ការបាញ់ប្រហារនេះ ដោយសារតែខឹងជិះម៉ូតូជែងគ្នា បើយោងតាមការបំភ្លឺរបស់អ្នករងគ្រោះខាងលើ ។ ឃាតករប្រើប្រាស់កាំភ្លើងខ្លីមិនស្គាល់ម៉ាក បាញ់ត្រូវអ្នករងគ្រោះម្នាក់ស្លាប់ ដោយត្រូវ១គ្រាប់ត្រង់ឆ្អឹងជំនីរស្តាំ ហើយតាមរយៈការឆែកកាមេរ៉ាសុវត្ថិភាពឃើញម៉ូតូហ្សូ៊ម័រ
អុិចរបស់ជនដៃដល់ជិះតាមបាញ់ប្រហារ ជនរងគ្រោះមានគ្នា២នាក់ រួចជិះគេចខ្លួនមកក្រោយវិញ ៕
ចែករំលែកព័តមាននេះ