កោះតៃវ៉ាន់ ៖ កោះតៃវ៉ាន់កាលពីថ្ងៃទី៣១មីនា បានថ្កោលទោសចំពោះការបង្កហេតុរបស់ចិន បន្ទាប់ពីយន្តហោះប្រយុទ្ធចិន២គ្រឿងហោះកាត់ខ្សែបន្ទាត់សមុទ្រ ដែលបែងចែករវាងចិនដីគោកនិងកោះតៃវ៉ាន់ក្នុងច្រកសមុទ្រហ្វ័រម៉ូស។
ក្រសួងការពារតៃវ៉ាន់ថ្លែងថា បណ្ដាយន្តហោះចម្បាំងតៃវ៉ាន់ បានហោះចេញដើម្បីបណ្ដេញយន្តហោះចិនទាំង២គ្រឿងនោះ។ ក្រសួងនោះបន្តថា ការបង្កហេតុនេះរបស់ចិនបំផ្លាញធ្ងន់ធ្ងរ ដល់សន្តិសុខនិងស្ថេរភាពតំបន់។ ក្រុងប៉េកាំងពុំបានបញ្ចេញប្រតិកម្មតបក្នុងពេលភ្លាមៗនៅឡើយ។
អ្នកនាំពាក្យម្នាក់របស់វិមានប្រធានាធិបតីតៃវ៉ាន់ លោកHUANG CHUNG EN បានស្នើដល់ចិនដីគោកបញ្ឈប់ឥរិយាបថប្រភេទនេះ ដែលនាំឲ្យមានគ្រោះថ្នាក់ដល់សន្តិភាពក្នុងតំបន់។
ចិនដែលចាត់ទុកតៃវ៉ាន់ថាជាខេត្តបំបែកខ្លួនមួយពុំបដិសេធឡើយ ការប្រើកម្លាំងដើម្បីដណ្ដើមត្រួតត្រាកោះតៃវ៉ាន់ ជាកន្លែងដែលពួកអ្នកជាតិនិយមចិនរត់ភៀសខ្លួនទៅ បន្ទាប់ពីបរាជ័យរបស់ពួកគេក្នុងការច្បាំងជាមួយពួកកុំមុយនីស្តកាលពីឆ្នាំ១៩៤៩៕
ចែករំលែកព័តមាននេះ