បញ្ចប់សិទ្ធិអាជីវកម្មបាន២ថ្ងៃ ក្រុមហ៊ុនអ្នកឧកញ៉ា គិត ម៉េង ត្រូវបានអនុញ្ញាតបន្តប្រតិបត្តិការតាមផ្លូវដែកភាគខាងត្បូងវិញ ខណៈវិស័យឯកជនចង់ធ្វើទំនើបកម្មផ្លូវដែក
- ភ្នំពេញ
រាជធានីភ្នំពេញ ៖ ត្រឹមរយៈពេល ២ ថ្ងៃក្រោយប្រមុខដឹកនាំរាជរដ្ឋាភិបាលកម្ពុជាប្រកាសបញ្ចប់សិទ្ធធ្វើអាជីវកម្មពីក្រុមហ៊ុនរ៉ូយ៉ាល់ រេវ៉េ (Royal Railway) របស់អ្នកឧកញ៉ា គិត ម៉េង ក្នុងប្រតិបត្តិការផ្លូវដែកនៅកម្ពុជា ដោយប្រគល់ឲ្យក្រសួងសាធារណការ និងដឹកជញ្ជួនគ្រប់គ្រងបណ្តោះអាសន្ន ស្រាប់តែនៅថ្ងៃទី ៣១ ខែមីនា ម្សិលមិញនេះ ថ្នាក់ដឹកនាំក្រសួងសាធារណការបានចេញសេចក្តីជូនដំណឹង អនុញ្ញាតឲ្យក្រុមហ៊ុនបន្តប្រតិបត្តិការតាមផ្លូវដែកភាគខាងត្បូងដដែល។
យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជួនចុះថ្ងៃទី ៣១ ខែមីនា បានបញ្ជាក់ថា យោងតាមលទ្ធផលនៃវេទិការាជរដ្ឋាភិបាលកម្ពុជា-ផ្នែកឯកជន កាលពីថ្ងៃទី ២៩ ខែមីនា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី នោះ ក្រសួងបានបញ្ជាក់ជូនសាធារណជនក៏ដូចជាខាងក្រុមហ៊ុនអ្នកឧកញ៉ា គិត ម៉េង ថា «ដោយក្រសួងត្រូវការពេលវេលាគ្រប់គ្រាន់ក្នុងការសិក្សាឲ្យបានគ្រប់ជ្រុងជ្រោយលើលក្ខខណ្ឌគតិយុត្តិ និងបច្ចេកទេសពាក់ព័ន្ធក្នុងការគ្រប់គ្រងដំណើការផ្លូវដែក ក្រសួងអនុញ្ញាតឲ្យក្រុមហ៊ុនរ៉ូយ៉ាល់រេវ៉េ បន្តប្រតិបត្តិការដឹកជញ្ជួនទំនិញ និងអ្នកដំណើរ តាមផ្លូវដែកភាគខាងត្បូងដដែល» ។
«ទន្ទឹមនឹងនេះ ក្រសួងសាធារណការនិងដឹកជញ្ជួននឹងរៀបចំនីតិវិធីជ្រើសរើសក្រុមហ៊ុនជំនាញដែលមានសមត្ថភាព គ្រប់គ្រាន់ ក្នុងនោះក៏អាចមានការចូលរួមពីក្រុមហ៊ុនរ៉ូយ៉ាល់រេវ៉េ ដើម្បីធ្វើទំនើបកម្មផ្លូវដែកភាគខាងជើង និងភាគខាងត្បូងឲ្យសមស្របទៅនឹងតំរូវការជាក់ស្តែងរបស់ក្រុមហ៊ុនដឹកជញ្ជួន ក្រុមហ៊ុននាំចេញនិងនាំចូល ពាណិជ្ជករ កសិករ និងអ្នកដំណើរឲ្យមានលក្ខណៈស្តង់ដារអន្តរជាតិ និងធ្វើឲ្យមានភាពជឿជាក់ មានសុវត្ថិភាព និងមានតម្លៃសមរម្យ ដែលជាកត្តាជំរុញឲ្យផ្លូវដែកកម្ពុជាក្លាយជាឆ្អឹងខ្នងសេដ្ឋកិច្ចដ៏សំខាន់ពិតប្រាកដ ក្នុងការបង្កើតជាកាលានុវត្តភាពថ្មីៗសម្រាប់ប្រជាជាតិខ្មែរ» ។ នេះបើយោងតាមសេចក្តីជូនដំណឹងរបស់ក្រសួងសាធារណការនិងដឹកជញ្ជួន ។
សូមបញ្ជាក់ថាក្រសួងសាធារណការអនុញ្ញាតឲ្យក្រុមហ៊ុនអ្នកឧកញ៉ា គិត ម៉េង បន្តប្រតិបត្តិការតាមផ្លូវដែកភាគខាងត្បូង (ភ្នំពេញ-ព្រះសីហុន) ឡើងវិញ ដូច្នេះសម្រាប់ភាគខាងជើងពីភ្នំពេញទៅព្រំដែនថៃ គឺត្រូវបានបញ្ចប់អាជីវកម្មតែម្តង ។
សូមរម្លឹកថា កាលពីថ្ងៃទី ២៩មីនា ឆ្នាំ ២០១៩ កន្លងទៅថ្មីៗនេះ សម្តេចតេជោ ហ៊ុនសែន បានប្រគល់សិទ្ធគ្រប់គ្រងបណ្តោះអាសន្នទៅក្រសួងសាធារណការ ដើម្បីរៀបចំជំរុញការដឹកជញ្ជូនតាមផ្លូវដែកក្នុងល្បឿនលឿនមួយឡើងវិញ បើទោះរាជរដ្ឋាភិបាលត្រូវចំណាយថវិកាដល់១០០លានដុល្លារអាមេរិកក៏ដោយ។
ថ្លែងក្នុងវេទិការាជរដ្ឋាភិបាល ផ្នែកឯកជនលើកទី១៨ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា មានប្រសាសន៍ថា« ខ្ញុំស្នើរឱ្យក្រសួងសាធារណការនិងដឹកជញ្ជូនរៀបចំការដឹកជញ្ជូនតាមផ្លូវដែក តាំងពីប៉ោយប៉ែត រហូតដល់កំពង់ផែក្រុង ព្រះសីហនុឱ្យបានរលូន ដោយមិនតម្រូវឱ្យមានការផ្ទេរទុកទំនិញនៅភ្នំពេញនិងសូមសហការជាមួយក្រសួងស្ថាប័ននឹងដៃគូពាក់ព័ន្ធដើម្បីវិនិយោគបន្ថែមលើឃ្លាំងស្រូវ តាមចំណុចសំខាន់ៗមួយចំនួននៅខេត្តបន្ទាយមានជ័យ បាត់ដំបង ពោធិ៍សាត់ និងកំពង់ស្ពឺ ឱ្យទៅជាឃ្លាំងមានលក្ខណៈសម្បត្តិគ្រប់គ្រាន់ សម្រាប់ជំរុញការនាំចេញ អាចឱ្យរថភ្លើងចេញ-ចូលដល់ឃ្លាំង»។
សម្តេចក៏បានបញ្ជាក់នាពេលនោះថា «ស្ថិតក្នុងអន្តរកាលនេះ ត្រូវរៀបចំជាបន្ទាន់ នូវការដឹកជញ្ជូនផ្លូវដែកទាំងពីរទិស អីចឹងឯកឧត្តម អូន ពន្ធមុន្នរ័ត្នថវិកាបម្រុងរបស់រាជរដ្ឋាភិបាលត្រូវបញ្ជូនចេញភ្លាម បន្ថែមលើអ្វីដែលមានកុំឱ្យក្បាលរថភ្លើងរត់នូវទ្រុយៗបែបនេះទៀត។ បើទោះបីត្រូវចេញ១០០លានដុល្លារអាមេរិកក៏ដោយត្រូវតែចេញ ព្រោះថវិកាយើងមានមកដល់ម៉ោងនេះមានប្រមាណ៣.០០០លានដុល្លារអាមេរិក លុយបម្រុងអន្តរជាតិប្រមាណ១៣ពាន់លានដុល្លារអាមេរិក ដកយករៀចំឱ្យបានលឿន»។ សម្តេចក៏បានជំរុញឱ្យថ្នាក់ដឹកនាំក្រសួងសាធារណការនិងដឹកជញ្ជូននិងក្រសួងសេដ្ឋកិច្ចនិងហិរញ្ញវត្ថុរៀបចំការដឹកជញ្ជូនតាមផ្លូវដែក និងការរៀចំឃ្លាំងនៅតាមតំបន់នីមួយៗ សម្តេចតេជោហ៊ុនសែនបានស្នើសុំទូររថភ្លើងពីបណ្តាប្រទេសជិតខាងកម្ពុជាដើម្បីឱ្យការដឹកជញ្ជូនតាមផ្លូវដែកនេះចាប់ផ្តើមដំណើរការបានក្នុងល្បឿនមួយលឿន ។
បើតាម លោក កាន់ គន្ធី អគ្គនាយករង នៃក្រុមហ៊ុន អេមរុ រាយស៍លើកឡើងថា «យើងត្រូវការការវិនិយោគបន្ថែមលើក្បាលរថភ្លើងថ្មី ព្រោះក្បាលរថភ្លើងចាស់វាតែងតែខូចធ្វើឱ្យខកពេល ដោយសារមិនមានខ្សែរថភ្លើងគ្រប់គ្រាន់»។ លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា មានប្រសាសន៍ថា ការដឹកជញ្ជូនតាមផ្លូវដែក និងតាមផ្លូវនេះ វាធ្វើឱ្យប្រសើរដល់ថ្លៃដើមនៃការដឹកជញ្ជូន ។ ជាក់ស្តែងនៅតាមប្រទេសជឿនលឿន ការដឹកជញ្ជូនតាមផ្លូវដែកមានច្រើននិងមានសក្តានុពលក្នុងការបម្រើដល់វិស័យដឹកជញ្ជូនឱ្យបានច្រើននឹងមានតម្លៃធូរថ្លៃ។ លោកឧកញ៉ាបន្តថា « បើសិនយើងអាចប្រើប្រាស់សក្តានុពលផ្លូវដែកបានទាន់ពេលវេលាហើយអាចឆ្លើយតបទៅតាមតម្រូវការជាក់ស្តែងដែលយើងចង់បាន នោះវានឹងធ្វើតម្លៃខ្សែសង្វាក់ផលិតកម្មប្រកួតប្រជែងបានកាន់តែប្រសើរ។ជារួមបើមានការដឹកជញ្ជូនតាមផ្លូវដែកជារឿងល្អមែនទែន»។
បើតាមអនុប្រធានសហព័ន្ធ ការធ្វើទំនើបកម្មផ្លូវដែក ទាល់តែផ្លូវដែកដឹកបានទំនិញច្រើន ដឹកបានលឿន និងាមានស្ថានីយ៍លើកដាក់ទំនិញនៅក្បែផ្លូវដែក ទើបអាចទាក់ទាញក្រុមអ្នកផលិតនិងចង់ប្រើផ្លូវដែកងាកមកប្រើប្រាស់បាន។តែចំពោះមុខនេះផ្លូវដែកកម្ពុជាមិនទាន់បានធ្វើទំនើបកម្មនៅឡើយនោះទេ ផ្លូវដែកកម្ពុជាធ្វើការកែសម្រួលលក្ខណៈធម្មតា។មានន័យថាវានូវជាឧបស័គ្គ ព្រោះថ្លៃដឹកជញ្ជូនតាមផ្លូវដែកនៅតែមានតម្លៃខ្ពស់ ល្បឿននៅយឺតនៅឡើយ។ លោកឧកញ្ញ៉ា មានប្រសាសន៍ថា «ទាល់តែធ្វើទំនើបកម្ម កែសម្រួលឱ្យផ្លូវដែកប្រទេសគេ ទើបយើងអាចទាក់ទាញអ្នកដែលចង់ប្រើប្រាស់ផ្លូវដែកគេងាកមកប្រើផ្លូវដែកសម្រាប់ការដឹកជញ្ជូនវិញ។ដល់ពេលនោះថ្លៃដើមនៅក្នុងខ្សែសង្វាក់ផលិតកម្មធ្លាក់ទាប និងអាចប្រកួតប្រជែងបាន»។
ពាក់ព័ន្ធនឹងការអភិវឌ្ឍន៍ផ្លូវដែកនៅកម្ពុជា លោក ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូន កាលពីថ្ងៃទី ២៧ ខែមីនា កន្លងទៅក៏បានជំនួបពិភាក្សាស្តីពីកិច្ចសហប្រតិបត្តិការ លើការអភិវឌ្ឍវិស័យផ្លូវដែកនៅកម្ពុជា ជាមួយលោក Wang Wenzhong អនុប្រធានក្រុមហ៊ុនសាជីវកម្មសំណង់ផ្លូវដែកចិន China Railway Construction Corporation – CRCC) នៅទីក្រុងប៉េកាំង ប្រទេសចិន ដែលក្រុមហ៊ុននេះជាសហគ្រាសសាធារណៈដ៏ធំមួយក្នុងចំណោមសហគ្រាសសាធារណៈជាង១០ធំៗ របស់សាធារណៈរដ្ឋប្រជាមានិតចិន។
កិច្ចប្រជុំនាពេលនោះ បានផ្តោតជាសំខាន់លើការសិក្សាដកស្រង់បទពិសោធន៍ និងការពង្រឹងកិច្ចសហប្រតិបត្តិការ រវាងក្រសួងសាធារណការ និងដឹកជញ្ជូន និងក្រុមហ៊ុន CRCC លើគម្រោងពាក់ព័ន្ធនឹងការអភិវឌ្ឍ វិស័យ ហេដ្ឋារចនាសម្ព័ន្ធផ្លូវដែក នៅកម្ពុជា។
លោក ស៊ុន ចាន់ថុល នាកិច្ចប្រជុំនោះបានស្នើឲ្យក្រុមហ៊ុន CRCC ចូលរួមជាមួយរាជរដ្ឋាភិបាលកម្ពុជា រៀបចំគម្រោងអភិវឌ្ឍ និងធ្វើឲ្យប្រសើរឡើងលើវិស័យដឹកជញ្ជូនតាមផ្លូវដែក នៅកម្ពុជា ដើម្បីជំរុញកំណើនសេដ្ឋកិច្ចកម្ពុជា ជាពិសេសការសម្រួលដល់ការដឹកជញ្ជូនអ្នកដំណើរ និងការដឹកជញ្ជូនទំនិញសំខាន់ៗដូចជា៖ ស្រូវអង្ករ ប្រេងឥន្ធនៈ សម្ភារៈបរិក្ខារផ្សេងៗ សំដៅកាត់បន្ថយចំណាយឡូជីស្ទីក កាត់បន្ថយពេលវេលាដឹកជញ្ជូន គ្រោះថ្នាក់ចរាចរណ៍ និងការកកស្ទះចរាចរណ៍ នៅតាមដងផ្លូវ ជាដើម។
ជាការឆ្លើយតប លោក Wang Vengzhong បានប្តេជ្ញាយ៉ាងមុតមាំថានឹងចូលរួមសហការជាមួយ រាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន ក្នុងការអភិវឌ្ឍវិស័យដឹកជញ្ជូនតាមផ្លូវដែកកម្ពុជាឱ្យមានការរីកចម្រើន ដូចប្រទេសមួយចំនួនក្នុងតំបន់ ដោយស្មារតី យកចិត្តទុកដាក់ខ្ពស់ជាអាទិភាព ៕
ចែករំលែកព័តមាននេះ