ប្រទេសអាហ្វហ្គានីស្ថាន ៖ ពួកអ្នកភូមិនៅភាគខាងលិចអាហ្វហ្គានីស្ថាន កាលពីថ្ងៃទី៣១ មីនា ប៉ុនប៉ងកាយសម្អាតភក់ ដែលរាតត្បាតផ្ទះសម្បែងពួកគេ បន្ទាប់ពីទឹកជំនន់ដ៏អាក្រក់ ពុំធ្លាប់ជួបប្រទះចាប់តាំងពីមួយទសវត្សមកហើយ។ ដោយសារទឹកជំនន់ដ៏អាក្រក់នោះ អ្នកភូមិខ្លះទៀតហាក់ដូចជាបាត់បង់អ្វីៗស្ទើរទាំងស្រុង។
ភ្លៀងបានធ្លាក់យ៉ាងខ្លាំងចាប់តាំងពីថ្ងៃទី២៩ មីនាមក ហើយទឹកជំនន់បានរាតត្បាតខេត្ត៥នៅភាគខាងជើងនិងភាគខាងលិចប្រទេស បណ្ដាលឲ្យមនុស្សស្លាប់យ៉ាងតិច៣៥នាក់។ ក្រៅពីបំផ្លាញផ្ទះសម្បែងជាច្រើនពាន់ខ្នង ទឹកជំនន់ភ្លាមៗបានបំផ្លាញជំរំនានា របស់ពួកអ្នកភៀសខ្លួន មកពីគ្រោះរាំងស្ងួតដ៏អាក្រក់កាលពីឆ្នាំទៅមិញ។
គ្រួសារអ្នកភៀសខ្លួនទាំងនេះច្រើនពាន់នាក់បាននាំគ្នាទៅកាន់ខេត្តហេរ៉ាត។ ក្នុងខេត្តនោះនៅភាគខាងលិចអាហ្វហ្គានីស្ថាន ស្រុកយ៉ាងតិច១០និងទីប្រជុំជនខេត្តរងការប៉ះពាល់ខ្លាំងដោយភ្លៀង នាំឲ្យមានទឹកជំនន់ភ្លាមៗ។ បណ្ដារថយន្តជាប់ក្នុងភក់ បណ្ដាជញ្ជាំងត្រូវបាក់ ដើមឈើនានារលំបាក់រាយប៉ាយ ផ្ទះទាំងឡាយរងការបំផ្លាញ។
យោងតាមអ្នកនាំពាក្យអាជ្ញាធរជាតិគ្រប់គ្រងគ្រោះមហន្តរាយថា ផ្ទះជាង៣០០០ខ្នងរងការបំផ្លាញមួយផ្នែកឬទាំងស្រុង ក្នុងខេត្ត៥ដែលរងការប៉ះពាល់ដោយទឹកជំនន់ភ្លាមៗ៕
ចែករំលែកព័តមាននេះ