ប្រទេសជប៉ុន ៖ រដ្ឋាភិបាលជប៉ុនប្រកាសកាលពីថ្ងៃទី១មេសាថា សករាជអធិរាជជប៉ុនថ្មី ដែលនឹងចាប់ផ្ដើមពីថ្ងៃទី១ឧសភាទៅ ជាមួយការឡើងគ្រងរាជ្យ របស់ព្រះអង្គម្ចាស់រជ្ជទាយាទណារូហ៊ីតូ នឹងហៅឈ្មោះថាសករាជREIWA។ នាយករដ្ឋមន្ត្រីជប៉ុនលោកស៊ីនហ្សូអាបេនឹងពន្យល់ពីអត្ថន័យនៃឈ្មោះនេះ នាឱកាសនៃសុន្ទរកថាមួយរបស់លោកទៅកាន់ប្រជាជាតិ។
ឈ្មោះនៃសករាជឬហៅGENGO ត្រូវបានប្រើយ៉ាងទូលំទូលាយនៅជប៉ុន ដូចជានៅលើក្រដាសប្រាក់ ក្នុងប្រតិទិន កាសែតនិងឯកសារជាផ្លូវការនានា។ ការឡើងគ្រងរាជ្យរបស់ព្រះអង្គម្ចាស់ណារូហ៊ីតូ ព្រះជន្ម៥៨ព្រះវស្សា នឹងធ្វើក្រោយការដាក់រាជ្យ របស់ព្រះបិតាទ្រង់ ព្រះចៅអាគីហ៊ីតូ នាថ្ងៃទី៣០មេសាខាងមុខនេះ ដែលនឹងបញ្ចប់សករាជHEISEI ដែលចាប់ផ្ដើមតាំងពីឆ្នាំ១៩៨៩មក។ ការដាក់រាជ្យរបស់ព្រះចៅអធិរាជអាគីហ៊ីតូ នឹងជាលើកដំបូងសម្រាប់ព្រះចៅអធិរាជជប៉ុនមួយអង្គ ពុំធ្លាប់មានចាប់តាំងពីឆ្នាំ១៨១៧មក។
យោងតាមបែបបទ ឈ្មោះនៃសករាជត្រូវដាក់ ឲ្យស្របទៅតាមបណ្ដាឧត្ដមគតិរបស់ប្រជាជាតិ ហើយត្រូវមានភាពងាយស្រួលក្នុងការសរសេរនិងការអាន តែឈ្មោះនោះមិនមានគេប្រើ ឬគេធ្លាប់ប្រើរួចហើយកាលពីមុនមក។ សករាជREIWA អាចមានន័យថា ការបញ្ជាឬបទបញ្ជានិងសន្តិភាពឬភាពរុងរឿង។ ជាប្រពៃណីលក្ខណៈឈ្មោះ តែងមានប្រភពដកស្រង់ពីបណ្ដាអតីតអត្ថបទចិន ប៉ុន្តែលើកនេះដកស្រង់មកពីMANYOSHU ជាសៀវភៅកណាព្យជប៉ុនមួយ តាំងតែពីសម័យកាលសតវត្សទី៨មកម្ល៉េះ៕
ចែករំលែកព័តមាននេះ