រាជធានីភ្នំពេញ ៖ ខណៈពេលដែលប្រព័ន្ធអនុគ្រោះពន្ធទៅលើទំនិញគ្រប់មុខដែលនាំចូលទៅទីផ្សារអឺរ៉ុបលើកលែងសព្វាវុធ (EBA) ហាក់កំពុងស្ថិតនៅមាត់ជ្រោះ ប្រមុខដឹកនាំរាជរដ្ឋាភិបាលក៏ខ្នះខ្នែងមួយជំហានទៀត ក្នុងការចូលរួមក្នុងកិច្ចព្រមព្រៀងដៃគូពាណិជ្ជ កម្មអន្តរទ្វីប (Trans-Pacific Partnership-TPP) ដែលបច្ចុប្បន្ននេះ TPP មានសមាជិកចំនួន១២ប្រទេស ក្នុងនោះមានវៀតណាមផងដែរ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅក្នុងវេទិការវាងរដ្ឋាភិបាលនិងវិស័យឯកជន រៀបចំឡើងកាលពីថ្ងៃទី ២៩ ខែមីនា កន្លងទៅ បានជំរុញអោយមន្ត្រីពាក់ព័ន្ធបង្កើនការចចារកិច្ចព្រមព្រៀង TPP អោយបានលឿន ដើម្បីរក្សាបាននូវស្ថេរភាពពាណិជ្ជកម្មរវាងកម្ពុជា និងទីផ្សារសាកល រាជរដ្ឋាភិបាលកម្ពុជា ។
លោក ស៊ាង ថៃ អ្នកនាំពាក្យក្រសួង ពាណិជ្ជកម្ម បានប្រាប់កោះសន្តិភាពនាថ្ងៃទី ៣១ ខែមីនា ឆ្នាំ២០១៩ ដោយបកស្រាយបញ្ជាក់ថាកម្ពុជាកំពុងជម្រុញយ៉ាងខ្លាំងក្លា ដើម្បីសម្រេចឲ្យបាននូវកិច្ចព្រមព្រៀងពាណិជ្ជកម្មអន្តរជាតិថ្មីៗចំនួន ២ នោះគឺ (១)- កិច្ចព្រមព្រៀងដៃគូពាណិជ្ជកម្មអន្តរទ្វីប (TPP) និង (២) -កិច្ចព្រមព្រៀងពាណិជ្ជកម្មពិភពលោកធំមួយ ក្នុងចំណោមប្រទេសសមាជិកទាំង១៦ នោះគឺកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (Regional Comprehensive Economic Partnership) ហៅកាត់ RCEP នេះថា វាមានប្រយោជន៍ខ្លាំងណាស់សម្រាប់កម្ពុជា ដែលត្រូវជំរុញការចរចារអោយបានលឿនបំផុត ពីព្រោះវាជាស្ថេរភាពសេដ្ឋកិច្ចនិងពាណិជ្ជកម្មដែលមិនភ័យព្រួយពីការបាត់បង់នូវអ្វីដែលសហគមន៍អឺរ៉ុបផ្ដល់ជូនមកកម្ពុជានោះទេ ។
អ្នកនាំពាក្យក្រសួងពាណិជ្ជកម្ម ពន្យល់បញ្ជាក់ថា « TPP វាខុសពី EBA ។ EBA គឺជាអ្វីដែលសហគមន៍អឺរ៉ុបផ្ដល់ជូនយើង។ TPP គឺជាកិច្ចចចារទ្វេរភាគីរវាងកម្ពុជា និង TPP ដោយឡែក EBA វាគ្រាន់តែជាឯកតោភាគី ដែលអឺរ៉ុបផ្ដល់ជូននិងចង់ដកពេលណាក៏បាន »។ លោកបន្តថា «កិច្ចព្រមព្រៀង TPPត្រូវ ការចរចារជាច្រើនដំណាក់កាលណាស់ ទំរាំ ទទួលបានជោគជ័យ ហើយបើសិនជាយើងទទួលបានជោគជ័យ គឺកម្ពុជាអាចនាំទំនិញទៅកាន់ប្រទេសជាសមាជិក TPP ដោយមិនភ័យព្រួយពីការបាត់បង់ឡើយ ដូច្នេះវាជាប្រយោជន៍ដ៏ធំសម្រាប់កម្ពុជា ដើម្បីចាប់ផ្ដើមនិងជំរុញអោយមានការចរចារកាន់តែឆាប់បំផុត សម្រាប់ RCEP វិញក៏ដូចគ្នានេះដែរ» ។
លោក ស៊ាង ថៃ បញ្ជាក់ថាពាក់ព័ន្ធនឹង RCEP កម្ពុជាក៏បានធ្វើច្រើនមកហើយ ពាក់ព័ន្ធនឹងកិច្ចការនេះ ក្នុងនោះ កាលពីពេលថ្មីៗនេះដែរ កម្ពុជាក៏បានរៀបចំកិច្ចប្រជុំ RCEP នៅសៀមរាប ដើម្បីពន្លឿនការងារនេះ អោយសម្រេចបានឆាប់បំផុតផងដែរ ។ លោកបន្ថែមថា តាមពិត សម្ដេចតេជោ នាយករដ្ឋមន្ត្រី បានជំរុញអោយកិច្ចចរចារ RCEPនេះ បញ្ចប់នៅឆ្នាំ ២០១៨ ក៏ប៉ុន្តែមិនទាន់សម្រេច ដូច្នេះហើយរដ្ឋាភិបាលក៏បានសម្រេចជាថ្មីថា អោយកិច្ចចរចារនេះ សម្រេចក្នុងឆ្នាំ ២០១៩ អោយបាន ដោយរដ្ឋាភិបាលបានចាត់មន្ត្រីសម្រាប់ធ្វើកិច្ចការនេះផងដែរ ។ លោកថា៖«យើងនៅមានប្រទេសមួយចំនួនដែលមិនទាន់ទទួលយកនូវសំណើររបស់យើង តែយើងនឹងព្យាយាមពន្យល់គេអោយបានក្បោះក្បាយ ដើម្បីអោយយើងក្លាយជាសមាជិករបស់ RCEP » ។
លោកបញ្ជាក់ថា «បើសិនជាយើងបានទាំង TPP និង RCEP យើងនឹងលែងបារម្ភពី EBA តែមិនមែនយើងបោះបង់វាចោលទេ យើងនឹងនៅតែទទួលដោយក្តីរីករាយ ដើម្បីបង្កើនទំហំពាណិជកម្មនិងទីផ្សាររបស់យើងទៅកាន់ពិភពលោកកាន់តែទូលំទូលាយ» ។
បើតាម លោក តាន់ មុន្នីវណ្ណ អនុប្រធានសភាពាណិជ្ជកម្មកម្ពុជា បានមានប្រសាសន៍ផងដែរថា ក្នុងនាមជាវិស័យឯកជន លោកស្វាគមន៍ជានិច្ចនូវកំណែទម្រង់របស់រដ្ឋាភិបាលកម្ពុជា ព្រោះកន្លងមក រដ្ឋាភិបាលបានជួយយើងច្រើនណាស់ដើម្បីបង្កើនទីផ្សារនៅសាកលលោក ។ លោកបន្តថា «វាដល់ពេលដែលកម្ពុជាត្រូវឈរដោយខ្លួនឯង និងលែងពឹងលើគេទៀតហើយ ។ បើសិនជាយើងនៅតែពឹងលើគេ ហើយគេចង់ជួយក៏ជួយ មិនជួយក៏តាមគេនោះ ប្រហែលជាសេដ្ឋកិច្ចកម្ពុជា មិនអាចលូតលាស់មានលំនឹងបាននោះទេ» ។ លោកថា «ពេលដំបូងវាលំបាកបន្តិចហើយ តែនៅពេលបន្ទាប់យើងនឹងអាចឈរដោយខ្លួនឯងបាន និងលែងត្រូវការគេអោយជួយទៀតហើយ » ។
សូមរម្លឹកថា សម្តេចតេជោ ហ៊ុន សែន បានថ្លែងឲ្យដឹងថាកិច្ចព្រមព្រៀង TPP នេះ ត្រូវបានជាប់គាំដោយសហរដ្ឋអាមេរិកដកខ្លួនចេញ បន្ទាប់ពីដូណាល់ត្រាំ ចាកចេញ ក៏ប៉ុន្តែវាបានបន្តក្នុងដំណើរមួយ។ កម្ពុជា កាលមុននេះមានការថ្នាំងថ្នាក់ ដោយគេទាញតែអាស៊ានប៉ុន្មានប្រទេសចូលរួម ប៉ុន្តែឥឡូវនេះកម្ពុជា និងដៃគូដទៃទៀត ក៏ហាក់ដូចជាមានគោលជំហររួមគ្នាមួយថាយើងនឹងចូលរួម នៅពេលអាស៊ានចូលរួមទាំងអស់តែម្តង ដើម្បីកុំឲ្យមានការបែងចែក។ សម្តេចតេជោបានថ្លែងបញ្ជាក់ថាកម្ពុជាមិនត្រូវរស់ដោយពឹងតែលើទីផ្សារធំៗពីរ ឬបី នោះទេ ដូច្នេះការពង្រីកទីផ្សារអន្តរជាតិ តាមរយៈការចូលរូមជាមួយ TPP គឺជាចាំបាច់មួយ ។ ទោះបីនាពេលកន្លងមក ការធ្វើពិពិធកម្មទីផ្សារលក់ទំនិញមានវឌ្ឍនភាពល្អ ដោយកម្ពុជាចាប់ផ្តើមនាំចេញទៅទីផ្សាថ្មីៗ ក្រៅពីសហរដ្ឋអាមេរិក និង អឺរ៉ុប កិច្ចការធ្វើពិពិធកម្មទីផ្សារ នៅមានលទ្ធភាពជំរុញច្រើនទៀត។
នាឱកាសនោះ សម្តេចតេជោ បានស្នើឱ្យក្រសួងពាណិជ្ជកម្ម ខិតខំជំរុញនូវការងារចរចាកិច្ចព្រមព្រៀង សេរីពាណិជ្ជកម្មទ្វេភាគី ជាមួយប្រទសកាណាដា, អង់គ្លេស, ចិន, ជប៉ុន, កូរ៉េ និងបញ្ហាប្រទេសមួយចំនួននៅទ្វីបអាហ្វ្រិក។ សម្រាប់កិច្ចព្រមព្រៀងពហុភាគី កម្ពុជាត្រូវតែបន្តជំរុញការចរចា RCEP និងសហភាពអឺរ៉ាស៊ី ឱ្យបានលឿន។ បន្ថែមពីលើនេះ សម្តេចតេជោ បានស្នើឱ្យក្រុមប្រឹក្សាអភិវឌ្ឍកម្ពុជា ដឹកនាំសិក្សារៀបចំដាក់ចេញនូវយន្តការពិសេស ដើម្បីទាក់ទាញការវិនិយោគ តាមរយៈជាអាទិ៍៖ (១)៖ ការរៀបចំតំបន់សេដ្ឋកិច្ចពិសេសនៅតាមជាយដែន, (២)៖ ការតភ្ជាប់បណ្តាញអគ្គិសនី និង ការរៀបចំលក់អគ្គិសនី តាមថៃ្លទាបជាងធម្មតា នៅក្នុងតំបន់សេដ្ឋកិច្ចពិសេសទាំងនោះ, (៣)៖ ការកំណត់ នូវវិស័យឧស្សាហកម្មដែលត្រូវទាក់ទាញ និងការរៀបចំឡើងវិញ នូវការលើកទឹកចិត្តដល់ការវិនិយោគទាំងនោះ, (៤)៖ ការរៀបចំបង្កើនការសម្រួលពាណិជ្ជកម្ម និង សម្រួលផ្នែកឡូជីស្ទីកនៅតាមជាយដែន ឬ តំបន់សេដ្ឋកិច្ចពិសេស។
]
គួរបញ្ជាក់ថា កិច្ចព្រមព្រៀង TPP ជាកិច្ចព្រមព្រៀងមួយបង្កើតឡើងដើម្បីគាំពារផ្នែកពាណិជ្ជកម្ម លើប្រទេសជាសមាជិក ដោយផ្ដល់ការអនុគ្រោះពន្ធនាំចូល។ កិច្ចព្រមព្រៀង TPP មានសមាជិកចំនួន១២ប្រទេស រួមមាន អូស្ដ្រាលី ព្រុយណេ កាណាដា ឈីលី អាមេរិក ជប៉ុន ម៉ាឡេស៊ី ម៉ិចស៊ីកូ ណូវែលសេឡង់ ប៉េរ៉ូ សិង្ហបុរី និងវៀតណាម ។ តែបច្ចុប្បន្ននេះ គឺសល់តែ ១១ ប្រទេស បន្ទាប់ពីអាមេរិកសម្រេចចាកចេញពី TPP នេះ កាលពីខែ មករា ឆ្នាំ ២០១៧ ។
យ៉ាងណាមិញ ភាពមិនច្បាស់លាស់ពាក់ព័ន្ធនឹងរឿង EBA នោះ សម្តេចតេជោ ធ្លាប់បញ្ជាក់ប្រាប់សាធារណៈជន ក៏ដូចជាពិភពលោក ជាច្រើនដងថា វាជារឿងល្អសម្រាប់ប្រទេសកម្ពុជាបើនៅតែទទួលបាន EBA សម្រាប់ទីផ្សារអឺរ៉ុប ក៏ប៉ុន្តែប្រមុខដឹកនាំប្រទេសបានបញ្ជាក់ថា ប្រព័ន្ធអនុគ្រោះពន្ធ គឺគង់តែនឹងដល់ទីបញ្ចប់សម្រាប់កម្ពុជានាថ្ងៃណាមួយ ដូចបណ្តាប្រទេសផ្សេងៗទៀត ក៏ប៉ុន្តែកម្ពុជា មិនអាចដោះដូរអធិបតេយ្យភាពរបស់ខ្លួន ដើម្បីទទួលបាន EBA នោះទេ ៕
ចែករំលែកព័តមាននេះ