ប្រទេសចិន ៖ ប្រទេសចិនបានសម្រេចពន្យារពេលការផ្អាក យកពន្ធថ្មីលើរថយន្តអាមេរិកនិងគ្រឿងបន្លាស់ ដែលត្រូវផុតកំណត់ត្រឹមថ្ងៃទី១មេសា។ ការសម្រេចចិត្តនេះប្រកាសកាលពីថ្ងៃទី៣១មីនាដោយក្រុមប្រឹក្សារដ្ឋចិន ត្រូវបានចាត់ទុកថាជាកាយវិការសុឆន្ទៈ ឆ្លើយតបការសម្រេចរបស់អាមេរិក ផ្អាកយកពន្ធបន្ថែមលើការនាំចូលបណ្ដាផលិតផលចិន។ កាលពីខែធ្នូឆ្នាំ២០១៨ ក្រុងប៉េកាំងបានផ្អាកបណ្ដោះអាសន្ន រយៈពេល៣ខែការដំឡើងពន្ធគយ២៥%លើបណ្ដារថយន្តនិងគ្រឿងបន្លាស់រថយន្តអាមេរិក។
សហរដ្ឋអាមេរិកនិងចិនចាប់តាំងពីពេលនោះមក បានធ្វើការចរចាដើម្បីប៉ុនប៉ងបញ្ចប់សង្គ្រាមពាណិជ្ជកម្ម ដែលលោកដូណាល់ត្រាំប្រកាសកាលពីឆ្នាំទៅមិញ ដើម្បីជម្រុញចិនឲ្យកែប្រែការអនុវត្តខាងពាណិជ្ជកម្ម ហើយបើកចំហទីផ្សាររបស់ខ្លួន សម្រាប់បណ្ដាសហគ្រាសអាមេរិក។
ការចរចាគ្នាកម្រិតខ្ពស់កាលពីយប់ថ្ងៃទី២៩មីនានៅក្រុងប៉េកាំង បើតាមរដ្ឋមន្ត្រីរតនាគារអាមេរិក លោកSTEVEN MNUCHINថា ទទួលបានលទ្ធផលប្រកបដោយផ្លែផ្កា។ ចំណែកឧបនាយករដ្ឋមន្ត្រីចិន លោកLIU HE នាប៉ុន្មានថ្ងៃខាងមុខនេះ ត្រូវមកកាន់ក្រុងវ៉ាស៊ិនតោន ដើម្បីបន្តការចរចាគ្នាខាងពាណិជ្ជកម្ម៕
ចែករំលែកព័តមាននេះ