ប្រទេសថៃ ៖ យោងតាមភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃសៅរ៍ កន្លងមកថា ការនាំចេញអង្កររបស់ប្រទេសថៃបានធ្លាក់ចុះទាំងចំនួន និងតម្លៃ កាលពីខែកុម្ភៈ ព្រោះតែតម្លៃអង្ករកើនឡើងច្រើនជាងដៃគូប្រកួតប្រជែងជាពិសេសវៀតណាម និងកំណើនតម្លៃប្រាក់បាតជាដើម ។
លោក Charoen Laothammatas ដែលជាប្រធានសមាគមន៍អ្នកនាំចេញអង្ករថៃបាននិយាយកាលពីថ្ងៃសុក្រ កន្លងមកថា ប្រទេសថៃនាំចេញអង្ករសរុបបាន ៦៨៧,៥៦០តោនកាលពីខែកុម្ភៈ ឬទាបជាងឆ្នាំមុន ២៧.៧% ឬស្មើ ៣៧០លានដុល្លារ និងទាបជាងឆ្នាំមុន ២៣.៥% ។
យោងទៅតាមលោក Charoen បានឲ្យដឹងដែរថា បើទោះជាការនាំចេញបានធ្លាក់ចុះពិតមែនកាលពីខែកុម្ភៈ អ្នកនាំចេញថៃនៅតែគិតថាវានឹងកើនឡើងវិញនៅខែមីនា មកស្មើប្រមាណពី៧០០,០០០ទៅ៨០០,០០០តោន ។ លោកបានបន្ថែមថា «ពួកយើងដែលជាអ្នកនាំចេញអង្ករនៅតែរក្សាការព្យាករណ៍ថា ប្រទេសថៃនឹងនាំចេញអង្ករបាន ៩.៥លានតោនក្នុងឆ្នាំនេះ ។ ស្ថានការឆ្នាំនេះនឹងពឹងផ្អែកលើគ្រោះរាំងស្ងួត»។
ប្រទេសថៃនាំចេញអង្ករសរុបបាន ១១.០៩លានតោនកាលពីឆ្នាំមុនឬទាបជាងឆ្នាំ ២០១៧ ប្រមាណ ៥% ដែលនាំចេញបាន ១១.៦៧លានតោន តែខ្ពស់ជាងឆ្នាំ ២០១៦ ដែលនាំចេញបាន ៩.៩១លានតោន ។ តម្លៃនៃការនាំចេញសរុបបានកើនឡើងពី៥.១៨ប៊ីលានដុល្លារក្នុងឆ្នាំ ២០១៧ ៨.៣%កាលពីឆ្នាំមុនមកស្មើ ៥.៦១ប៊ីលានដុល្លារ។ តម្លៃអង្ករនាំចេញជាមធ្យមស្មើ ៥០៧ដុល្លារក្នុងមួយតោនកាលពីឆ្នាំមុន ឬខ្ពស់ជាងឆ្នាំ ២០១៧ ប្រមាណ ១៤.១%ផងដែរ ។
ជាមួយគ្នានេះផងដែរ កិច្ចប្រជុំគណៈកម្មាធិការគោលនយោបាយអង្ករជាតិកាលពីថ្ងៃសុក្រ ដែលមានលោកនាយករដ្ឋមន្ត្រី Prayut Chan-o-Cha ជាអ្នកដឹកនាំបានបញ្ជាដល់ភ្នាក់ងារដែលជាប់ពាក់ព័ន្ធឲ្យចោលអង្ករក្នុងស្តុករដ្ឋប្រមាណ ២០០,០០០តោននៅខែឧសភាឆ្នាំនេះផងដែរ ។ អង្ករក្នុងស្តុករបស់រដ្ឋភាគច្រើនដែលលក់មិនចេញជាអង្ករដែលមិនត្រូវបានទទួលយកដោយនាយកដ្ឋានកែទម្រង់ ឬត្រូវបានបដិសេធដោយប្រទេសដែលដេញថ្លៃបានវិញ ។
ឧប្បនាយករដ្ឋមន្ត្រី Chatichai Sarikulya បាននិយាយថា លោកនាយករដ្ឋមន្ត្រីក៏បានបញញជាដល់ភ្នាក់ងារជាប់ពាក់ព័ន្ធដទៃឲ្យពន្លឿនបណ្តឹងទាក់ទិននឹងការបរាជ័យរបស់រដ្ឋាភិបាលអ្នកស្រី Yingluck Shinawatra ក្នុងការទិញអង្ករថៃផងដែរ ៕
ចែករំលែកព័តមាននេះ