ខេត្តកំពង់ស្ពឺ ៖ ក្មេងស្រីអាយុ៥ឆ្នាំម្នាក់ ត្រួវរថយន្តបុកបណ្តាលអោយនាងស្លាប់មួយរំពេជព្រោះតែការធ្វេសប្រហែសរបស់ឱពុកម្តាយ បណ្តោយអោយក្មេងរត់ឆ្លងផ្លូវតែឯង ។ ក្រោយកើតហេតុតៃកុងរថយន្តបានចុះរត់គេចខ្លួនបាត់ បន្សល់តែវត្ថុតាងនៅនឹងកន្លែងត្រូវបានសមត្ថកិច្ចអូសយកទៅរក្សាទុករង់ចាំស្រាវជ្រាវរកម្ចាស់អោយចូលខ្លួនមកដោះស្រាយជាមួយភាគីក្មេងស្រីរងគ្រោះតាមនីតិវិធី ។
ហេតុការណ៍គ្រោះថ្នាក់នេះកើតឡើង កាលពីវេលាម៉ោង១៥និង៤៦នាទីថ្ងៃទី៣១ ខែមីនា ឆ្នាំ ២០១៩ នៅលើផ្លូវក្រាលកៅស៊ូ ចំណុចភូមិក្បាលទឹក ក្រោមឃុំជាំសង្កែ ស្រុកភ្នំស្រួចខេត្តកំពង់ស្ពឺ ។
រថយន្តបង្កម៉ាកហ៊ីយ៉ាន់ដាយ ពណ៌ស ពាក់ផ្លាកលេខព្រះសីហនុ 3A- 2951 អ្នកបើកបរមិនស្គាល់ឈ្មោះ បើកបរពីទិសខាងលិចទៅទិសខាងកើត ចំណែកក្មេងស្រីរងគ្រោះឈ្មោះ ផេង កញ្ញា ភេទស្រី អាយុ៥ឆ្នាំ រស់នៅភូមិក្បាលទឹកក្រោម ឃុំជាំសង្កែ ស្រុកភ្នំស្រួច ខេត្តកំពង់ស្ពឺ ។
ប្រភពបានអោយដឹងថា មុនពេលកើតហេតុគេបានឃើញរថយន្តបើកបរទិសដៅខាងលើយ៉ាងលឿនលុះមកដល់ចំណុចកើតហេតុខាងលើបានបុកក្មេងស្រីរងគ្រោះដែលរត់ពីទិសខាងជើង ទៅទិសខាងត្បូង បណ្តាលអោយក្មេងឆ្លងផ្លូវស្លាប់នៅកន្លែងកើតភ្លាមៗតែម្តង ។ ក្រោយកើតហេតុតៃកុងរថយន្តបានចុះរត់គេចខ្លួនបាត់ បន្សល់តែវត្ថុតាងនៅកន្លែងកើតហេតុ ។ បន្ទាប់ពីធ្វើកំណត់ហេតុរួច សមត្ថកិច្ចបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី ។ ចំពោះវត្ថុតាងសមត្ថកិច្ចបានយកមករក្សារទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនីតិវិធី ។
ដោយឡែកនៅស្រុកបសេដ្ឋដែលមានព្រំប្រទល់ជាប់គ្នានឹងស្រុកភ្នំស្រួចដែរនោះ កាលពីវេលាម៉ោង១និង៣០នាទីយប់ ថ្ងៃទី០១ មេសា ២០១៩ នៅផ្លូវក្រាលកៅស៊ូពីផ្សាស្លាបលែងទៅផ្សារព្រៃប៉ាក្រុង ចំណុចភូមិព្រៃដុប ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ មានករណីគ្រោះថ្នាក់ចរាចរណ៍ ម៉ូតូបើកបុកបង្គោលចំណាំងផ្លាតមានម៉ូតូ០១គ្រឿងម៉ាក Exciter ពណ៌ស គ្មានផ្លាកលេខ គ្មានកញ្ចក់ បើកបរដោយឈ្មោះ ប៉ុក សុខេង ភេទប្រុស អាយុ១៩ឆ្នាំ នៅភូមិថ្មីខាងត្បូង ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ បើកបរមកពីទិសខាងលិចឆ្ពោះទៅទិសខាងកើតលុះដល់ចំណុចផ្លូវកោងទំនប់អូក្បៀបានជ្រុលទៅបុកជាមួយបង្គោលចំណាំងផ្លាតរួចធ្លាក់ទៅក្នុងទឹកទាំងម៉ូតូ និងមនុស្ស បណ្ដាលអោយស្លាប់លុះដល់វេលាម៉ោង០៧និង៣០នាទីទើបមានប្រជាពលរដ្ឋអូសអួនប្រទះឃើញសព និងម៉ូតូទើបរាយការណ៍ជូនសមត្ថកិច្ច ។
ក្រោយពីធ្វើកំណត់ហេតុរួចរាល់សមត្ថកិច្ចបានប្រគល់សពអោយក្រុមគ្រួសារទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ